U «Minskzialenbudzie» patłumačyli, čamu na praśpiekcie Niezaležnaści źviali jasieni i pasadzili lipy
U kancy lipienia na praśpiekcie Niezaležnaści ŭ Minsku vysadzili 150 lip u śpiecyjalnych kubavych kantejnierach. Takoje rašeńnie vyklikała abmierkavańnie ŭ biełaruskim siehmiencie Threads, bo raniej na hetym učastku raśli jasieni, piša ahienctva «Minsk-Naviny».
Jak rastłumačyŭ hienieralny dyrektar «Minskzialenbuda» Alaksandr Jermałovič, kala čatyroch hadoŭ tamu tut vysadzili zvyčajnyja jasieni. Hety vid drevaŭ dobra pasuje dla haradskich mahistralaŭ, bo viasnoj pračynajecca na tydzień-paŭtara paźniej za mnohija inšyja raśliny. Heta dazvalaje svoječasova pravodzić nieabchodnyja raboty — palivać drevy, abmyvać ich i apracoŭvać ad škodnikaŭ. Pry naležnym dohladzie jasień taksama davoli dobra pieranosić zasaleńnie hleby, vyklikanaje supraćhałalodnymi reahientami.
Adnak mienavita na praśpiekcie Niezaležnaści drevy apynulisia ŭ asabliva składanych umovach. Pad ziamloj prachodziać inžyniernyja kamunikacyi mietro, tamu dla karaniovaj sistemy praktyčna niama dastatkovaj prastory. Drevy rastuć u vielmi abmiežavanym abjomie hleby.
Akramia taho, uzimku supraćhałalodnyja reahienty traplajuć u pasadačnyja łunki i pranikajuć u hlebu, paśla čaho ich pahłynajuć karani. Dadatkovuju nahruzku stvaraje intensiŭny ruch aŭtamabilaŭ. U vyniku spałučeńnie abmiežavanaj prastory, zasaleńnia hleby i ŭździejańnia transpartu było zanadta ciažkim dla papiarednich pasadak.
Niahledziačy na rehularny dohlad, padkormku i apracoŭku drevaŭ, zachavać jasieni nie ŭdałosia. Tamu śpiecyjalisty vyrašyli vykarystać inšy padychod i źviarnulisia da vopytu rasijskich haradoŭ, dzie drevy ŭzdoŭž mahistralaŭ vysadžvajuć u śpiecyjalnyja dźviuchściennyja kubavyja kantejniery.
Takija kantejniery ŭcieplenyja, što pavinna abaraniać karaniovuju sistemu ad vymiarzańnia. U «Minskzialenbudzie» ŭžo majuć dośvied vykarystańnia padobnych jomistaściaŭ dla draŭnianych raślin i śćviardžajuć, što pry naležnym dohladzie raśliny ŭ ich adčuvajuć siabie dastatkova dobra.
Dla praśpiekta Niezaležnaści vybrali lipy. Hetyja drevy dobra pieranosiać farmovačnuju abrezku, tamu praź niekalki siezonaŭ ich płanujuć pačać farmavać, kab atrymać pryhožuju aleju.
Pavodle vopytu susiednich krain, lipy ŭ takich kantejnierach mohuć raści kala dziesiaci hadoŭ. Paśla hetaha drevy płanujuć pierasadzić razam z karaniovym komam u adkryty hrunt, dzie jany zmohuć praciahnuć rost.
U «Minskzialenbudzie» prakamientavali źjaŭleńnie na minskim praśpiekcie lip u vazonach
«Lipa va ŭsich sensach». Voś jak buduć vyhladać drevy ŭ vazonach na hałoŭnym minskim praśpiekcie. Błohiery atrymali zadańnie imi zachaplacca
U Minsku na miescy śsiečanych dreŭ buduć stavić drevy ŭ vazonach
Azijacki žuk-zabojca prajšoŭ praz Rasiju i Ukrainu da Jeŭropy. Jaho ŭžo vyjavili ŭ Biełarusi — pad udaram jasieni
Śpiecyjalisty patłumačyli, čamu ŭ Minsku dahetul nie raspuścilisia jasieni
Ciapier čytajuć
«Kali vy pazakryvajecie ja**lniki»: złoŭleny na dopinhu amapaviec z Hrodna pakazaŭ svajo vysokakulturnaje abličča10
Kamientary
Ja nie abaraniaju rašeńnie z kantejnierami, a dumaju pra pryčyny dehradacyi dreŭ na praśpiekcie ŭ apošnija dziesiacihodździ.