Dačnik z-pad Homiela padaŭ u sud na susieda za toje, što toj trymaje pieŭniaŭ. I navat padličyŭ, jak časta jany kukarekajuć
U 2025 hodzie ŭ Homielskim rajonie razhareŭsia niezvyčajny kanflikt pamiž susiedziami z sadovaha tavarystva. 55‑hadovy ŭładalnik dvuch učastkaŭ źviarnuŭsia ŭ sud z patrabavańniem zabaranić susiedu trymać pieŭniaŭ, bo ich hučnaje kukarekańnie, maŭlaŭ, pieraškadžała jamu i jahonaj siamji adpačyvać, paviedamlaje «Hrodzienskaja praŭda».
Susied, 75‑hadovy piensijanier, trymaŭ na placy 20 kurej i dvuch pieŭniaŭ. Da kurej u pazoŭnika pretenzij nie było, a voś pieŭni, pavodle jaho słoŭ, byli zanadta hałasistyja. Mužčyna navat paličyŭ, što ŭ adzin ź dzion z 12‑j da 16‑j hadziny ptuški prakukarekali 108 razoŭ.
Spačatku maci pazoŭnika źviarnułasia ŭ milicyju, ale padčas pravierki parušeńniaŭ nie znajšli i paraili vyrašać pytańnie praz sud. U svajoj zajavie mužčyna spasłaŭsia na praviły dla sadovych tavarystvaŭ, pavodle jakich žyvioł možna trymać na ŭčastku, kali jany nie pieraškadžajuć adpačynku susiedziaŭ. Dla ŭtrymańnia ptušak taksama patrabujecca piśmovaja zhoda ŭładalnikaŭ sumiežnych učastkaŭ.
Adnak padčas razhladu vyśvietliłasia, što ŭčastki mužčyn navat nie miažujuć niepasredna. Pamiž imi znachodzicca trochmietrovaja mielijaracyjnaja kanava. Ptušnik adkazčyka raźmiaščaŭsia za 21 mietr ad kanavy, a ad kanavy da płota pazoŭnika było jašče 25 mietraŭ. Takim čynam, pamiž učastkami było kala 49 mietraŭ. Akramia taho, uładalnik ptušak atrymaŭ nieabchodnuju piśmovuju zhodu ad haspadaroŭ sapraŭdy sumiežnych placaŭ.
Piensijanier patłumačyŭ, što amal uvieś hod žyvie na leciščy z žonkaj, a svojskija jajki jamu nieabchodnyja z pryčyny stanu zdaroŭja. Pieŭni patrebnyja jamu dla padtrymańnia pahałoŭja kurej.
Da razhladu sprečki pa sutnaści sprava tak i nie dajšła. Da sudovaha pasiadžeńnia pieŭniaŭ na nadziele adkazčyka ŭžo nie było, tamu pradstaŭnica pazoŭnika admoviłasia ad pazovu i ad patrabavańnia kampiensavać sudovyja vydatki. Piensijanier suprać spynieńnia spravy nie piarečyŭ.
Kamientary