«Jakoje ž marnavańnie hrošaj». U Lidzie budujuć pieršy padziemny pierachod, jaki nikomu nie patrebny

U Lidzie padčas rekanstrukcyi abjaznoj darohi pabudujuć pieršy ŭ horadzie padziemny piešachodny pierachod. Ułady padajuć jaho jak adnu z hałoŭnych navin prajekta: pierachod abstalujuć liftam i prystasujuć dla ludziej z abmiežavanymi mahčymaściami. Voś tolki sami lidčanie nie razumiejuć, navošta darahi abjekt spatrebiŭsia. Žychary Lidy chočuć zvyčajny pierachod, a nie padziemny.

Padziemny pierachod źjavicca kala hipiermarkieta i pavarotu na Baroŭku. U «Hrodnaaŭtadory» abiacajuć, što jon budzie adpaviadać sučasnym patrabavańniam, a dla małamabilnych ludziej praduhledziać lift, piša BGmedia.

Pavialičyć

Mienavita dastupnaść pierachodu vyklikała asobnyja pytańni. «Pasadzić by hetaha inžyniera ŭ vazok. I pahladzieć, jak jon im skarystajecca», — piša adzin z žycharoŭ.

Inšyja nahadvajuć pra dačnikaŭ, jakija jeździać tut ź viełasipiedami i ciapier buduć vymušanyja spuskacca pad ziamlu.

Jašče adno papularnaje pytańnie — navošta tut uvohule patrebny padziemny pierachod pry paraŭnalna nievialikim patoku piešachodaŭ.

«A chto budzie chadzić pa hetym pierachodzie? Jaki tam patok piešachodaŭ?», «A čaho vy jaho jašče dalej nie pabudavali, dzie ŭ poli?», «Jakoje ž marnavańnie hrošaj», — aburajucca lidčuki.

Niekatoryja prapanujuć značna praściejšaje rašeńnie — zvyčajny rehulavany pierachod z knopkaj.

Inšyja źviartajuć uvahu, što vakoł Lidy chapaje daroh, jakija patrabujuć ramontu, tamu budaŭnictva pieršaha ŭ horadzie padziemnaha pierachodu mienavita tut ličać dziŭnym pryjarytetam.

Jość i jašče adna apaska — vada. Žychary adrazu ŭspomnili miescy ŭ Lidzie, jakija rehularna zataplaje paśla daždžoŭ. «Nie zabudźciesia zrabić liŭnioŭku, kab nie zatapiła pierachod», — iranizujuć u kamientarach. Inšy karystalnik adkazvaje: «Navošta liŭnioŭka? Pierachod płaŭna piarojdzie ŭ basiejn».

Sam padziemny pierachod — tolki častka vialikaj rekanstrukcyi abjaznoj darohi. U 2024 hodzie tut užo adkryli abnoŭleny ŭčastak daŭžynioj 4,3 kiłamietra, a ŭ krasaviku 2026‑ha darožniki ŭzialisia za nastupnyja 3,8 kiłamietra. Košt ciapierašniaha etapu składaje 42 młn rubloŭ, hrošy vydzialajucca z respublikanskaha biudžetu. Skončyć pracy płanujeca ŭ kastryčniku 2027 hoda.

Darohu pašyrać da čatyroch pałos z raździalalnaj pałasoj, zrobiać aśviatleńnie, piešachodnyja i viełasipiednyja darožki. Akramia padziemnaha pierachodu, prajekt praduhledžvaje piać rehulavanych naziemnych. Ułady raźličvajuć, što abnoŭlenaja abjaznaja pavialičyć prapusknuju zdolnaść i dazvolić uvieści častku tranzitnaha transpartu z centra Lidy.

• 0
• 0
• 2
• 8
• 0
• 0
• 0
• 0