Vy nie paznajecie rajona płoščy Pieramohi. Tam źjavicca piešachodnaja vulica i niezvyčajny tramvaj
Da 2029 hoda zvykły maršrut vakoł płoščy Pieramohi zaŭvažna pieraŭtvorycca. Da hetaha času ŭ kvartale DEPO płanujecca zaviaršyć budaŭnictva novaj piešachodnaj vulicy — jana budzie prachodzić praz terytoryju byłoha tramvajnaha depo i prakładzie novy šlach pamiž vulicami Kazłova i Čyrvonaj.
Jak novaja vulica źmienić hetuju častku centra Minska, što źjavicca ŭzdoŭž maršrutu i čamu adnym ź jaho hałoŭnych aryjenciraŭ stanie tramvaj z kartenaŭskaj stali, piša Realt.
Novy maršrut praz centr
Siońnia terytoryja pamiž vulicaj Kisialova, praśpiektam Mašerava i Čyrvonaj usprymajecca jak asobny haradski frahmient, jaki piešachodam davodzicca abychodzić. Paśla zaviaršeńnia budaŭnictva DEPO tut źjavicca mahčymaść prajści praz kvartał naprastki.
Piešachodnaja vulica praciahnie horadabudaŭničuju voś vulicy Kazłova i źviaža jaje z vulicaj Čyrvonaj i viežaj byłoha radyjozavoda. Dla horada heta aznačaje źjaŭleńnie dadatkovaj piešachodnaj suviazi ŭ centry, a dla rajona płoščy Pieramohi — novuju haradskuju prastoru.
Praciahłaść vulicy składzie 307 mietraŭ. Piešachodnaja linija projdzie pad vuhłom 45 hradusaŭ da praśpiekta Mašerava. Pad tym ža vuhłom raźmieščanyja damy BRILL u kvartale DEPO ŭ dačynieńni da «stalinskaj» zabudovy. Hetaje rašeńnie nadaje kampazicyi kvartała cełasnaść i naležyć aŭtaru DEPO — architektaru Siarhieju Skuratavu.
Nie prosta daroha z punkta «A» ŭ punkt «B»
Adnak zadača novaj vulicy nie abmiažoŭvajecca mahčymaściu chutčej prajści praz kvartał.
Uzdoŭž jaje raźmieściacca kaviarni i restarany, kramy i buciki, adukacyjnyja i miedycynskija prastory, wellness– i lifestyle-siervisy. Za košt hetaha vulica musić pracavać jak samastojnaja hramadskaja prastora, dzie možna pravieści čas, sustrecca ź siabrami abo sumiaścić špacyr z paŭsiadzionnymi spravami.
Rejki byłoha depo zastanucca na svaim miescy
Histaryčny kantekst tut hraje asobnuju rolu. Z 1929 hoda na hetaj terytoryi pracavała pieršaje minskaje tramvajnaje depo, i častku jaho spadčyny vyrašyli intehravać.
I viadoma, samym zaŭvažnym nahadvańniem pra minułaje miesca musić stać art-abjekt, jaki źjavicca ŭ finalnaj častcy piešachodnaj vulicy.
U DEPO ŭstalujuć poŭnapamierny art-abjekt u vyhladzie tramvaja. Da raspracoŭki prajekta pryciahnuli architekturnuju majsterniu Alaksieja Kozyra.
Heta nie rekanstrukcyja kankretnaha histaryčnaha vahona. Aŭtary stvarajuć zborny vobraz minskich tramvajaŭ 1920—1930‑ch hadoŭ, zachoŭvajučy praporcyi i charaktarnyja detali transpartu taho času.
Art-abjekt vykanajuć z kartenaŭskaj stali. Heta daŭhaviečny materyjał, jaki cikava źmianiajecca z časam.
Pavodle papiaredniaj acenki, vyrab kanstrukcyi zojmie kala šaści miesiacaŭ. Tramvaj stvorać asobnymi siekcyjami, a kančatkova źbiaruć užo na terytoryi kvartała.
Jašče adna niezvyčajnaja častka maršrutu — most, jaki prachodzić praz dom TATRA 4. Ź jaho budzie adkryvacca dadatkovy rakurs na centralnuju płošču kvartała. Ale dla zachavańnia pryvatnaści most budzie dastupny tolki žycharam kvartała.
U pakryćci piešachodnaj vulicy zachavajuć aryhinalnyja tramvajnyja rejki. U centralnaj častcy maršrutu jany pierasiakucca, utvarajučy znak, jaki nahadvaje łahatyp DEPO.
A adzin z restaranaŭ raźmieścicca ŭ budynku, architekturny vobraz jakoha adsyłaje da myjni tramvajaŭ, što isnavała tut raniej. Pobač źjavicca vodnaja prastora: uletku jana budzie pracavać jak sažałka, a ŭ chałodnuju paru hoda zmoža pieratvaracca ŭ placoŭku dla art-instalacyj i inšych prajektaŭ.
Užo chutka terytoryja byłoha depo znoŭ stanie častkaj haradskoha maršrutu — tolki ciapier užo piešachodnaha. A tramvaj, jaki kaliści byŭ častkaj paŭsiadzionnaha žyćcia hetaha miesca, vierniecca siudy ŭžo ŭ inšaj jakaści — jak jaho novy haradski simvał.
Małodšy syn Sachaščyka abvieščany źnikłym bieź viestak. Vyhladaje, jon vajavaŭ za Rasiju88
Kamientary