11 žniŭnia pajšoŭ z žyćcia lehiendarny biełaruski trenier pa frystajle Mikałaj Kazieka. Pra heta na svajoj instahram-staroncy paviedamiŭ biełaruski kidalnik mołata i alimpijski srebny miedalist Vadzim Dzieviatoŭski, piša «Trybuna». Jamu było 76 hadoŭ.
Mikałaj Kazieka naradziŭsia 5 krasavika 1950 hoda ŭ Minsku. Jon pachodziŭ ź intelihientnaj siamji. Maci budučaha treniera Volha Dźmitryjeŭna pracavała nastaŭnicaj małodšych kłasaŭ, a baćka Ivan Darafiejevič Kazieka byŭ hałoŭnym redaktaram Biełdziaržvydata.
U junactvie Mikałaj Kazieka zajmaŭsia skačkami na batucie. U 1965 hodzie jon udzielničaŭ u pieršych Usiesajuznych spabornictvach pa hetym vidzie sportu, jakija prajšli ŭ Jerevanie. Najbolšaha pośpiechu jak spartsmien dasiahnuŭ u 1972 hodzie, kali staŭ čempijonam SSSR pa skačkach na batucie. Akramia hetaha, jon nieadnarazova stanaviŭsia pryzioram usiesajuznych spabornictvaŭ.
Paśla zaviaršeńnia spartyŭnaj karjery Kazieka pierajšoŭ na trenierskuju pracu. Spačatku jon pracavaŭ trenieram pa skačkach u vadu. U 1986 hodzie staŭ staršym trenieram zbornaj BSSR pa frystajle ŭ dyscyplinie «łyžnaja akrabatyka».
Paśla abviaščeńnia niezaležnaści Biełarusi Kazieka praciahnuŭ pracu z nacyjanalnaj kamandaj. Z 1993 hoda jon uznačalvaŭ zbornuju Biełarusi pa frystajle. Za hady trenierskaj dziejnaści jaho vychavancy damahlisia značnych pośpiechaŭ na mižnarodnaj arenie i prynieśli Biełarusi šmat alimpijskich uznaharod.
Asobnaje miesca ŭ jaho bijahrafii zajmajuć padziei 2020 hoda. 18 žniŭnia Mikałaj Kazieka razam ź inšymi pradstaŭnikami biełaruskaj spartyŭnaj śfiery padpisaŭ adkryty list, u jakim vykazvałasia patrabavańnie pryznać niesapraŭdnymi prezidenckija vybary ŭ Biełarusi. Paśla hetaha ŭ jaho zabrali prezidenckuju stypiendyju, a taksama pierastali zaprašać na zbory nacyjanalnaj kamandy. Nieŭzabavie trenier byŭ całkam adchileny ad pracy ŭ zbornaj.
Tym nie mienš, z historyi biełaruskaha sportu imia Mikałaja Kazieki vykraślić niemahčyma, a hałoŭnym vynikam šmathadovaj pracy zastajucca jaho vychavancy. Dźmitryj Daščynski, Alaksiej Hryšyn, Ała Cupier, Anton Kušnir i Hanna Huśkova zavajavali na zimovych Alimpijskich hulniach vosiem miedaloŭ roznaj vartaści, ź jakich čatyry byli załatymi. I heta tolki samyja tytułavanyja z tych šmatlikich spartsmienaŭ, ź jakimi słavuty śpiecyjalist pracavaŭ. Heta zrabiła Mikałaja Kazieku najbolš paśpiachovym biełaruskim i adnym z najpaśpiachoviejšych u śviecie trenieraŭ pa frystajle.
Kamientary
Śvietłaja pamiać!
Dziakuju za sumleńnie ŭ 2020!