U Biełaviežskaj puščy znajšli hryb, jaki nie sustrakajecca bolš nidzie ŭ Jeŭropie
U Biełaviežskaj puščy navukoŭcy znajšli najbujniejšuju viadomuju ŭ śviecie papulacyju redkaha hryba Osteina rhodophila. Na siońnia ŭ Jeŭropie hety vid zafiksavany tolki tut. Najbližejšyja viadomyja miescy jaho rostu znachodziacca ŭ dvuch izalavanych łakalitetach u Lasnym Pavołžy Rasii, paviedamiła pres-słužba Nacyjanalnaha parku «Biełaviežskaja pušča».
Daśledčykam nacyjanalnaha parku ŭžo ŭdałosia znajści 14 miescaŭ, dzie hryb stabilna ŭtvaraje pładovyja cieły. Takaja vysokaja kancentracyja ličycca vynikam asablivaha achoŭnaha režymu Biełaviežskaj puščy.
Osteina rhodophila maje vielmi vuzkuju śpiecyjalizacyju. Jon raźvivajecca vyklučna na starych admierłych pładovych ciełach inšaha redkaha hryba — ružovaha trutavika (Fomitopsis rosea), jaki zaniesieny ŭ Čyrvonuju knihu. Mienavita tamu nazva rhodophila pierakładajecca jak «toj, chto lubić ružovaje». Sami pładovyja cieły asteiny padčas rostu taksama nabyvajuć charakterny dalikatna-ružovy koler. Sporanosny słoj u hryba trubčasty, z hłybokimi porami niapravilnaj łabiryntapadobnaj formy.
U lasnoj ekasistemie asteina vykonvaje rolu tak zvanaha destruktara druhoha paradku. Spačatku ružovy trutavik raskładaje miortvuju draŭninu jełki. Paśla admirańnia jaho pładovych ciełaŭ jany stanoviacca substratam dla Osteina rhodophila. Hryb praciahvaje raskładać reštki arhaničnaha materyjału i tym samym spryjaje viartańniu pažyŭnych rečyvaŭ u pryrodny kruhavarot.
Dla isnavańnia hetaha vidu nieabchodnyja vielmi śpiecyfičnyja ŭmovy: bujnyja admierłyja jełki na poźnich stadyjach raskładańnia, užo zasielenyja ružovym trutavikom, a taksama stabilny mikraklimat. Tamu lubaja haspadarčaja dziejnaść — u tym liku sanitarnyja vysiečki abo prybirańnie pavalenych i admierłych dreŭ — moža razburyć uvieś ekałahičny łancužok, nieabchodny dla jaho isnavańnia.
Vyjaŭleńnie adrazu 14 stabilnych miescaŭ rostu Osteina rhodophila stała dla navukoŭcaŭ jašče adnym śviedčańniem taho, što zapaviedny režym Biełaviežskaj puščy dazvalaje zachoŭvać składanyja pryrodnyja pracesy i ŭnikalnyja ekasistemy pieršabytnaha lesu.
Kamientary
Taki čas, što navat za valož u lesie treba niejkimi padpolnymi mietadami zmahacca.