Pa atradzie pierasoŭvajecca navobmacak, pieryjadyčna atrymlivaje raparty: što viadoma pra palitviaźnia Vacłava Arešku
71‑hadovy aktyvist prafsajuza Radyjoelektronnaj pramysłovaści Vacłaŭ Areška znachodzicca za kratami ŭžo bolš za čatyry hady. Napačatku 2023 hoda palitviaźnia asudzili da vaśmi hadoŭ pazbaŭleńnia voli pa spravie biełaruskich niezaležnych prafsajuzaŭ. Za čas źniavoleńnia jon praktyčna aślep, ale invalidnaść u kałonii jamu da hetaha času nie afarmlajuć.
Niahledziačy na ŭzrost i stan zdaroŭja režym Łukašenki praciahvaje ŭtrymlivać piensijaniera ŭ niavoli. «Viasna» parazmaŭlała z byłym palitviaźniem, jaki adbyvaŭ pakarańnie razam z Vacłavam Areškam, i daviedałasia apošnija naviny pra jaho.
71‑hadovy Vacłaŭ — biełaruski palitołah i hramadski dziejač, aktyvist prafsajuza REP, jaki byŭ pryznany «ekstremisckim farmavańniem». Za kratami ŭtrymlivajecca mužčyna z 19 krasavika 2022 hoda.
U źniavoleńni ŭ Vacłava Areški surjozna pahoršyłasia zdaroŭje — jon faktyčna straciŭ zrok. Były palitviazień, jaki znachodziŭsia ŭ adnoj kałonii z Vacłavam, adznačaje, što pa terytoryi łakalnaha siektara i pa atradzie Vacłaŭ pierasoŭvajecca samastojna — navobmacak. U inšych vypadkach jon patrabuje dapamohi, tamu jaho zvyčajna supravadžajuć inšyja viaźni.
«Atrad jon vyvučyŭ cudoŭna: dzie, što i jak! Kali idzie pa łakałcy, zvyčajna jamu chłopcy hukajuć, padkazvajuć, kudy paviarnuć, dzie prystupki, dzie bardziur abo płot. Chodzić samastojna i dniom, i nočču.
Ale praz toje, što jon ničoha nie bačyć, jamu duža ciažka chadzić u stałoŭku ci ŭ miedčastku, zaŭsiody ź im idzie čałaviek, jaki jaho supravadžaje! Hety čałaviek, u asnoŭnym, nie adzin i toj samy, a roznyja».
Ale, pa słovach surazmoŭcy, čas ad času administracyja zabaraniaje inšym viaźniam dapamahać piensijanieru.
Ahułam, pa stanie na pačatak leta, samaadčuvańnie ŭ Vacłava było niadrennaje, z ulikam usich asablivaściaŭ utrymańnia, kaža były palitviazień. Pa jaho słovach, administracyja časam vypisvaje Vacłavu raparty i spahnańni, ale za što — nieviadoma.
Pa infarmacyi «Viasny», palitviaźniu dazvolenyja telefonnyja razmovy, ale spatkańniaŭ sa svajakami za čas źniavoleńnia ŭ jaho nie było.
-
Cichanoŭskaja: Biełaruskija ŭłady zaklikajuć žančyn naradžać, ale paśla naradžeńnia dziciaci mnohija sutykajucca ź finansavaj jamaj
-
Jamu vybili čatyry zuby, a paśla vykinuli z krainy. Ciapier byłoha palitviaźnia aryštavali ŭ Łatvii z šaściu mihrantami ŭ mašynie
-
U vieraśni Polšča dała mižnarodnuju abaronu 24 hramadzianam Biełarusi
Ciapier čytajuć
Jamu vybili čatyry zuby, a paśla vykinuli z krainy. Ciapier byłoha palitviaźnia aryštavali ŭ Łatvii z šaściu mihrantami ŭ mašynie8
Kamientary