Dziela dziaŭčyny, chvoraj na lejkiemiju, hulec viarnuŭsia ŭ svoj futbolny kłub. I ŭžo zabiŭ!

Eren Dzinkčy dapamoh «Vierderu» pieramahčy «Lejpcyh» — bremiency niečakana vyjhrali ź likam 3:1, a Dzinkčy adkryŭ lik užo na čaćviortaj chvilinie, piša Sports.ru.

Ale samaje pryhožaje ŭ hetaj historyi — nie pieramoha aŭtsajdara nad udzielnikam Lihi čempijonaŭ.

Eren pryśviaciŭ hoł svajoj dziaŭčynie Cyńje: jana z pačatku 2026 hoda zmahajecca ź lejkiemijaj.

Dzinkčy pierajšoŭ u «Vierder» mienavita dziela jaje: dziaŭčyna zachacieła viarnucca ŭ rodny Bremien, kab lepš spraŭlacca z chvarobaj.

«Jaje kamfort — pryjarytet». Eren pierajšoŭ u «Vierder» dziela dziaŭčyny

U papiarednim matčy «Vierder» razhromna prajhraŭ «Frajburhu» — 1:4, za jaki raniej hulaŭ Dzinkčy. Na matč z «Lejpcyham» było mała nadziej, ale Eren zabiŭ užo na čaćviortaj chvilinie i natchniŭ usiu kamandu. A śviatkavaŭ hoł svaim firmovym sercajkam: heta jaho lubimaje śviatkavańnie, jakoje jon pryśviaciŭ kachanaj Cyńje.

Eren apynuŭsia ŭ «Vierdery» mienavita z-za jaje. Cyńja rodam z Bremiena i letam zachacieła pierajechać na radzimu z Frajburha, kab lahčej pieranosić lačeńnie.

Da hetaha karjera Dzinkčy znachodziłasia ŭ niapeŭnym stanie: u «Frajburhu» jon byŭ nie asabliva patrebny, dy i ŭ atacy ŭ kamandy ŭsio było ŭkamplektavana. Ale biez zhody Cyńji Eren nikudy b nie pierajechaŭ.

U intervju Kicker jon kazaŭ: «Ja tut, u mianie jość kantrakt, a maja dziaŭčyna prachodzić lačeńnie ŭ klinicy ŭ Frajburhu. Pahladzim, što budzie dalej. Uličvajučy abstaviny, jana adčuvaje siabie adnosna dobra. Byvajuć paharšeńni i palapšeńni. Jana praciahvaje vydatna z usim spraŭlacca, i my zachoŭvajem pazityŭny nastroj. U hetaj situacyi bolš ničoha nie dapamahaje. Pryjarytet numar adzin — kab u jaje ŭsio było dobra».

U vyniku žadańnie Cyńji dapamahło Erienu nakiravać karjeru ŭ pravilnaje rečyšča: jak akazałasia, ich intaresy całkam supali.

Dzinkčy źbiraje zajaŭki na donarstva — z dapamohaj najbujniejšaj arhanizacyi pa baraćbie z rakam kryvi

Dyjahnaz Cyńji pastavili ŭ kancy studzienia — tady Eren byŭ u arendzie ŭ «Chajdenchajmie»: «Z hetaha momantu ŭsio rezka spyniajecca i ŭ toj ža čas pačynajecca šlach, jaki raniej było składana ŭjavić».

Pra svaju baraćbu Cyńja raskazvała ŭ sacyjalnych sietkach. Adnym z frahmientaŭ, jaki staŭ virusnym, było videa, dzie Eren stryže dziaŭčynu. Pierad abliččam biady jany tolki macniej abjadnalisia.

Pavialičyć

Dapamahali spravicca i inšyja. Hałoŭnuju dapamohu akazała DKMS — najbujniejšaja mižnarodnaja arhanizacyja pa baraćbie z rakam kryvi, jakaja bazujecca ŭ Hiermanii.

U supracoŭnictvie ź joj «Frajburh» i «Chajdenchajm» pierad svaim matčam viasnoj 2026 hoda arhanizavali zbor zajavak na donarstva stvałavych kletak dla Cyńji. U niekatorych vypadkach tolki heta moža vyratavać chvoraha na lejkiemiju, jak raspaviadaŭ Eren:

«Raptam važnym stała tolki adno: nadzieja. Chutka stała zrazumieła, što moža spatrebicca transpłantacyja stvałavych kletak, jak i mnohim inšym pacyjentam. U klinicy my kožny dzień sustrakajem ludziej ź ich unikalnymi historyjami, nadziejami i ciažkaściami. Usie jany čakajuć adzinaha šancu».

Dzinkčy — vychavaniec «Vierdera». Dla jaho heta šaniec pierazapuścić karjeru

Erenu 24 hady, jon vychavaniec bremiencaŭ: dla jaho heta taksama viartańnie na małuju radzimu. 

Pavialičyć

Ale ŭ «Vierdery» ŭ Erena nie atrymałasia — jon raskryŭsia tolki ŭ «Chajdienchajmie». Upieršyniu apynuŭsia tam u arendzie na siezon-2023/24, kali jamu byŭ 21 hod. I adrazu nabraŭ 10+4 u 33 matčach.

Paśla hetaha Dzinkčy pierajšoŭ u «Frajburh», ale tam u Erena zusim nie atrymałasia. U siezonie-2024/25 jon addaŭ tolki try halavyja pieradačy, a ŭ pieršaj pałovie minułaha siezona ŭ jaho naohuł było 0+0. Reanimavać karjeru jon pasprabavaŭ znoŭ u «Chajdienchajmie» — tam nabraŭ 3+1 za 14 turaŭ.

I ciapier Dzinkčy znoŭ u «Vierdery». Mahčyma, tut atrymajecca pačać usio spačatku. Start dobry.

• 3
• 0
• 0
• 1
• 0
• 0
• 0
• 1