Simańjan paskardziłasia, što ludzi cicha bajkatujuć tvory Z-piśmieńnikaŭ i kiniematahrafistaŭ
Prapahandystka padtrymała prapanovu Sałaŭjova «ŭsich hetych pratesnych akuratna sabrać i praź Vierchni Łars — preč z krainy».
Kiraŭnica RT Marharyta Simańjan paskardziłasia na «pratesnaje hałasavańnie» žury hałoŭnych litaraturnych premij Rasii za knihu Zachara Prylepina «Tuma», piša «Ahientstvo».
U efiry «Niadzielnaha viečara z Uładzimiram Sałaŭjovym» Simańjan zajaviła, što siabry žury adnoj z hałoŭnych litaraturnych premij staviać ramanu Prylepina nulavyja adznaki z palityčnych mierkavańniaŭ. Jakuju mienavita premiju jana mieła na ŭvazie, Simańjan nie ŭdakładniła.
«Zachar Prylepin, jaki ledź nie zahinuŭ za toje, što Radzimu abaraniaŭ, napisaŭ nadzvyčajnuju knihu «Tuma» i ŭvohule piša nadzvyčajnyja knihi. I ludzi, jakija siadziać u žury premij, hałoŭnych premij krainy, nie budu ich nazyvać, staviać jamu nul jak pratesnaje hałasavańnie», — skazała jana.
Sałaŭjoŭ u adkaz prapanavaŭ «usich hetych pratesnych akuratna sabrać i praź Vierchni Łars — preč z krainy». Simańjan adkazała, što «było b vydatna».
Razmova pačałasia z abmierkavańnia sieryjała Jahora Biarojeva «Maryk» pra vajennaha doktara. Raniej paviedamlałasia, što na fiestyvali «PIŁOT-2026» u Ivanavie 12 krytykaŭ admovilisia vystaŭlać jamu adznaki, i sieryjał zaniaŭ apošniaje miesca.
Raman Prylepina «Tuma» letaś atrymaŭ premiju «Kniha hoda», sioleta — premiju «Słova», a taksama ŭvajšoŭ u šort-list «Vialikaj knihi» i łonh-list «Jasnaj Palany».
Sama Simańjan na minułym tydni stała łaŭreatkaj «Knihi hoda» ŭ naminacyi «Proza hoda» za raman «Spačatku było Słova — u kancy budzie Ličba». Knihu taksama ŭklučyli ŭ šort-list «Vialikaj knihi», chacia i sa skandałam.
Kamientary
[Zredahavana]