U Minsku skłali partret typovaha zahinułaha na vadzie

Pa słovach kiraŭnika Minskaj haradskoj arhanizacyi Tavarystva ratavańnia na vodach Dźmitryja Maciuški, z pačatku kupalnaha siezona i pa 12 žniŭnia ŭ vadajomach stalicy patanuli dzieviać čałaviek. Usie jany znachodzilisia ŭ stanie ałkaholnaha apjanieńnia. Pry hetym ratavalnikam udałosia vyratavać 16 čałaviek, a z pačatku hoda — 21.

Pavodle analizu vypadkaŭ, typovy zahinuły na vadzie ŭ Minsku — mužčyna va ŭzroście ad 21 da 69 hadoŭ, jaki nie pracuje i ŭ toj ci inšaj stupieni złoŭžyvaje ałkaholem. Asnoŭnymi faktarami ryzyki zastajucca mienavita ałkahol i kupańnie ŭ nočy.

U staličnaj arhanizacyi tavarystva pracujuć vosiem vyratavalnych stancyj, manieŭrana-pošukavaja hrupa i bolš za 20 vyratavalnych pastoŭ, jakija dziejničajuć padčas kupalnaha siezona. Adnak štatnyja praviły praduhledžvajuć dziažurstva supracoŭnikaŭ tavarystva ad uzychodu sonca da nastupleńnia ciemry, tamu načny kantrol za vadajomami siłami ratavalnikaŭ nie praduhledžany.

Najbolšaja kolkaść vypadkaŭ utapleńnia adbyłasia ŭ červieni. Paśla analizu zdareńniaŭ ułady vyznačyli dadatkovyja miery biaśpieki.

Pavialičvajecca kolkaść sumiesnych rejdaŭ Tavarystva ratavańnia na vodach, milicyi i MNS. Intervały pamiž abchodami skaračajuć da 30 chvilin. Da pracy załučajuć bolš ratavalnikaŭ i płavalnych srodkaŭ, a nazirańnie za akvatoryjaj arhanizujuć taksama z vady.

U vychadnyja dni na kožnaj vyratavalnaj stancyi z 10:00 da 22:00 znachodzicca supracoŭnik milicyi. Razam z rabotnikami Tavarystva ratavańnia na vodach jon udzielničaje ŭ abchodach, rejdach i prafiłaktyčnych mierapryjemstvach, u tym liku vyjaŭlaje ludziej, jakija znachodziacca na plažach u stanie ałkaholnaha apjanieńnia.

Taksama było prapanavana pavialičyć kolkaść milicejskich patruloŭ na plažach napiaredadni vychadnych, u vychadnyja i śviatočnyja dni paśla 21:00. Prapanova atrymała padtrymku — siłaviki buduć dziažuryć u zonach plažnaha adpačynku da 2‑j hadziny nočy.

Pry hetym u Minharvykankamie źviarnuli ŭvahu, što ŭzmocnieny kantrol patrebny nie tolki ŭ vychadnyja. Pa słovach namieśnika staršyni Minharvykankama Aleha Korzuna, u budnyja viečary na plažach taksama šmat ludziej.

Na praciahu kupalnaha siezona za kupańnie ŭ zabaronienych miescach užo skłali 152 administracyjnyja pratakoły. Akramia taho, na plažach nadalej pryciahvać da adkaznaści za raśpićcio ałkaholu i piva, pakolki plažy źjaŭlajucca hramadskimi miescami.

Ułady adznačajuć, što častka ludziej śviadoma ihnaruje zabarony i miery biaśpieki. Tamu prafiłaktyčnuju pracu z nasielnictvam płanujuć praciahvać, vykarystoŭvajučy ŭsie dastupnyja sposaby, kab źnizić kolkaść trahičnych vypadkaŭ na vadzie.

• 1
• 0
• 1
• 0
• 0
• 1
• 0
• 0