«Kvatera nahadvaje zakinutuju». Žychary paharełych damoŭ na Lenina — pra «našeście» ćvili
Zharełyja ŭ kancy červienia damy №9 i 11 na vulicy Lenina vizualna vyhladajuć całkam narmalna, ale ŭnutry dahetul panuje chaos. Žychary kvater spačatku ratavali techniku i meblu, potym zryvali špalery i vykryvali padłohi, a ciapier litaralna ahalajuć pamiaškańni da samaj asnovy.
Usio tamu, što ahoń paškodziŭ dach, vada pramočyła ŭsiu majomaść da pieršaha paviercha, ale źjaviłasia novaja napaść — ćvil. A jana, skažam ščyra, choć i nie źniščaje ŭsio na svaim šlachu, ale dakładna psuje rečy niezvarotna, piša Onliner.by.
«Navat kali vizualna stol i padłoha čystyja, unutry moža być ćvil»
Ihar źjaŭlajecca ŭładalnikam kvatery na čaćviortym paviersie pieršaha padjezda doma №11. Usie dni paśla pažaru mužčyna niastomna ŭklučaŭ asušalnik pavietra, jaki ŭvohule dobra spraŭlaŭsia sa svajoj zadačaj: ćvili na abtynkavanaj stoli nie źjaviłasia. Ale nie tut-to było. Niadaŭna Ihar vyrašyŭ źniać na kamieru, što adbyvajecca pad tynkoŭkaj, i vielmi ździviŭsia.
— My znajšli dakumient 50‑ch hadoŭ, na jakim vyrazna bačnaja kanstrukcyja pierakryćciaŭ, — raskazvaje minčanin. — U bolšaści kvater jany draŭlanyja, z drankaj. Usio heta źvierchu zamazvałasia tynkoŭkaj, pad jakoj zastavalisia połaści.
— Ja pranik pad tynkoŭku z dapamohaj inśpiekcyjnaj kamiery, kab źniać, što tam adbyvajecca. I kali na samoj stoli byli tolki padcioki, to ŭnutry akazałasia šmat vilhaci i ćvili.
— Učora da nas prychodzili rabotniki Instytuta žylla, dadatkova vykryvali stol, pierakanalisia, što tam sapraŭdy mokra i jość ćvil. Pahladzieli va ŭsich pakojach, zapisali ŭ spravazdaču.
Tak što navina niesuciašalnaja: navat kali vizualna stol i padłoha čystyja, ich treba vykryvać i hladzieć hłybiej.
Usim žycharam treba danieści infarmacyju (chacia b žycharam apošnich pavierchaŭ) pra hetuju nieabchodnaść. Pieršaje: vykryć padłohi, vyhrabci piasok i budaŭničaje śmiećcie. Usio heta tam mokraje i zalažałaje. Pakul jano budzie sochnuć, vilhać pojdzie ŭ suchija belki. A kali zhnijuć belki pierakryćcia, to, viadoma, u domie budzie niebiaśpiečna žyć.
Druhoje: z advarotnaha boku žycharam nieabchodna zdymać tynkoŭku sa stolaŭ, prybirać dranku, kab usio dobra prasochła.
Pry hetym možna mierkavać, što daloka nie ŭsim udajecca jakasna prasušyć svaje pamiaškańni. Tak, u adnoj z kvater ćvil pačała raspaŭzacca sa stoli ŭniz pa ścienach praz zališniuju vilhać u padłozie kvatery źvierchu.
«Kvatera nahadvaje zakinutuju»
Pra kvateru baćki Iryny žurnalisty pisali ŭ minułym repartažy. Trochpakajovaja kvatera znachodzicca ŭ domie №9. I kali jašče dva tydni tamu jana vyhladała bolš-mienš prystojna, to ciapier ad zvykłaha žylla ničoha nie zastałosia — usio demantavana.
— Na hety momant kvatera nahadvaje zakinutuju abo niešta jašče horšaje. U pakojach całkam źbitaja tynkoŭka sa ścien. Padłoha razabranaja nastolki, što amal možna ŭbačyć kvateru susieda, tamu što pierakryćci akazalisia draŭlanymi. Usio heta pryjšłosia raźbirać, bo ničoha nie sochnie. Asušalnik pavietra pracavaŭ na praciahu miesiaca. Jon vyciahvaŭ vilhać z pavierchniaŭ, ale da hłybini dabracca nie zmoh.
— Dobra, parkiet, dobra, čarnavaja doška — na vykid. Ale łahi taksama ŭ ćvili, — praciahvaje Iryna. — I navat heta nie samaje strašnaje. Vyrazna vidać, što na apornych belkach taksama jość paškodžańni: belki čornyja, mokryja.
Ciapier ja budu praciahvać prasušku pamiaškańniaŭ, a paralelna pravodzić apracoŭku ad ćvili. Moža być, usio vysachnie, a moža, i nie.
«Patrebna pramysłovaja suška kanstrukcyj budynka»
Žychary stalinskich damoŭ raskazali, jak jany bačać dalejšyja dziejańni pa vyratavańni budynkaŭ, jakija dla ich źjaŭlajucca rodnym miescam žycharstva, a dla horada — historyka-kulturnaj kaštoŭnaściu:
— Patrebna pramysłovaja suška kanstrukcyj budynka, kvater, padjezdaŭ, padsobnych i inšych pamiaškańniaŭ, a taksama pramysłovaja apracoŭka ad ćvili. Siońnia maštaby hrybka kałasalnyja!
Ciapier čytajuć
26‑hadovaha supracoŭnika elitnaha padraździaleńnia mytni asudzili na 16 hadoŭ pa nabory palitartykułaŭ. Siarod ich i «zdrada dziaržavie»7
Kamientary