Doli Partan pakinuła svaim prychilnikam sakretnuju pieśniu. Pasłuchać jaje možna budzie tolki ŭ 2045 hodzie
Amierykanskaja kantry-lehienda Doli Partan užo raźvitałasia i sa scenaj, i z žyćciom, ale akazałasia, što jaje prychilnikaŭ čakaje jašče adzin muzyčny siurpryz. Praŭda, pačuć jaho jany zmohuć tolki praz amal 20 hadoŭ, piša Euronews.
Za niekalki hadoŭ da śmierci Partan zapisała pieśniu My Place in History i ŭ 2015 hodzie źmiaściła jaje ŭ śpiecyjalnuju «skrynku mary» ŭ hateli DreamMore Resort pry tematyčnym parku Dollywood u amierykanskim štacie Tenesi.
Śpiavačka zahadała nie adkryvać kaštoŭnuju skrynku da 19 studzienia 2045 hoda. Kažuć, što razam z zapisam jana pakinuła ŭ kapsule navat CD-płejer i instrukcyju pa prajhravańni dyska — na vypadak, kali da taho času hety farmat stanie sastarełym.
Pavodle źviestak Dollywood, pieśnia była napisanaja śpiecyjalna dla budučyni i adlustroŭvaje nadziei i mary Partan adnosna taho, jakim budzie śviet.
U 2021 hodzie ŭ šou Keli Kłarksan śpiavačka raskazała, što napisała pieśniu, jakuju nichto nie pačuje, pakul joj nie spoŭnicca 99 hadoŭ. Tady jana spadziavałasia dažyć da momantu, kali skrynku adkryjuć.
U 2023 hodzie Partan pryznałasia akcioru i televiadučamu Džymi Fełanu, što joj było ciažka nie dumać pra hety zapis, bo jana ličyła pieśniu sapraŭdnym chitom. Śpiavačka navat žartavała, što chacieła b adkapać skrynku i zamianić jaje inšaj, mienš udałaj kampazicyjaj.
Pry hetym jana pažadała budučym słuchačam atrymać zadavalnieńnie ad siurpryzu: kali jany buduć žyvyja ŭ 2045 hodzie, to spadziajecca, što im spadabajecca jaje pieśnia.
Siamja Partan raniej paviedamiła, što śpiavačku, jakaja pamierła 25 žniŭnia, pachavali 28 žniŭnia paśla pryvatnaj cyrymonii na mohiłkach Woodlawn Memorial Park and Mausoleum u Nešvile. Jaje pachavali pobač z mužam Karłam Dzinam, ź jakim śpiavačka pražyła kala 60 hadoŭ. Dzin pamior u sakaviku 2025 hoda.
Plamieńnica Doli, Łejni Partan, paśla pachavańnia apublikavała kranalny ŭspamin pra svaju ciotku. Jana napisała, što Doli ź dziacinstva davała joj adčuvać siabie dastatkovaj i nikoli nie prymušała sumniavacca ŭ svaich marach. Pavodle Łejni, jana nie moža ŭspomnić pra Doli nivodnaha drennaha ŭspaminu.
Jašče pry žyćci Partan vyrazna zajaviła, što choča nievialikaj pryvatnaj cyrymonii tolki dla blizkich. Jana taksama zahadała vykanać na svaim pachavańni kantry-haśpieł-pieśniu If We Never Meet Again.
Kamientary