Biełarus nie atrymaje $40 tysiač za syna, jaki zahinuŭ na froncie. Byłaja žonka i ŭnučka akazalisia sprytniejšymi
Alaksandr Jakuboŭski daŭno kinuŭ siamju, a jak stali razdavać hrabavyja, to zapisaŭsia ŭ čarhu. Maŭlaŭ, alimienty ž płaciŭ — dyk chaj i jamu niešta pierapadzie.
Žychar pasiołka Savinski Archanhielskaj vobłaści Alaksiej Jakuboŭski zahinuŭ na froncie 27 sakavika 2024 hoda. U niekrałohu napisali, što jaho rašeńnie pajści na front było asensavanym, choć u bazie zahinułych paznačana, što Jakuboŭskaha zabrali na vajnu z-za krataŭ. Zrešty, adno druhomu moža i nie supiarečyć — moža, jon asensavana vyrašyŭ nie siadzieć u turmie, a pajści zabivać.
Na momant śmierci Jakuboŭskamu było 29 hadoŭ. U jaho zastałasia dačka Ksienija.
Dziaŭčynka jašče zamałaja, kab udzielničać u bojcy za tatavy hrabavyja, ale niechta ŭ sudzie pradstaŭlaŭ i jaje intaresy.
A vajavali na adnym baku toj samy pradstaŭnik dački i Valancina Kraŭčanka (heta maci zahinułaha). Z druhoha — hramadzianin Biełarusi Alaksandr Jakuboŭski, baćka zahinułaha.
Baćka chacieŭ atrymać svaju tracinu ad mahilnych $115 tysiač, ale astatnija sprabavali adsunuć jaho ad stała.
Pieradhistoryja takaja. Alaksandr Jakuboŭski i Valanina Kraŭčanka byli ŭ šlubie, u ich naradziłasia dvoje synoŭ. Kali małodšy syn byŭ jašče dziciem, baćka pakinuŭ siamju i pierajechaŭ na pastajannaje žycharstva ŭ Biełaruś. Aficyjna raźvialisia značna paźniej. Alaksandr nijakaha ŭdziełu ŭ vychavańni i žyćci synoŭ nie braŭ: nie sustrakaŭsia ź imi, nie cikaviŭsia ich zdaroŭjem i adukacyjaj. Heta paćvierdzili ŭ sudzie starejšy syn Uładzimir i susiedka siamji. Aboje zaśviedčyli, što baćka sam paźbiahaŭ sustreč ź dziećmi, navat kali žyŭ niepadalok ad ich.
Sam Alaksandr u sudzie nastojvaŭ, što heta byłaja žonka pieraškadžała jamu bačycca z synam. A hałoŭnym arhumientam na karyść svajho baćkoŭstva ličyŭ toje, što zapazyčanaści pa alimientach u jaho nie było.
Ale sud vyrašyŭ što heta niavažna — maŭlaŭ, hrabavyja płaciać nie abaviazkova bijałahičnym baćkam, a kab «padziakavać ad imia dziaržavy mienavita tym, chto realna vychavaŭ abaroncu Ajčyny».
Tak što Alaksandr Jakuboŭski zastaŭsia ź ni čym. $115 tysiač padzialili miž saboj maci vajskoŭca i jahonaja dačka.
Ciapier čytajuć
«Ja nie śviataja, ale ŭ mianie nie było nadziejnaha plača pobač»: maci Ksiušy z SMA mohuć pazbavić baćkoŭskich pravoŭ, jana ž davodzić, što zdolnaja vypravicca1515
Kamientary