«Chto siońnia tabie harantuje, što projdzieš kantrol?» Jak biełarusy dabirajucca z Polščy na radzimu praz Hruziju i Rasiju

Z Varšavy — u Kutaisi, a adtul — u Maskvu

Praca Arcioma ŭ Polščy źviazanaja z častymi raźjezdami pa krainach ES. Padavać dakumienty na DNŽ jon nie staŭ: zanadta doŭha čakać lehalizacyi. Zamiest hetaha pieryjadyčna jeździć u rodny horad, kab zrabić pracoŭnuju vizu.

Arciom užo niekalki razoŭ lotaŭ z Varšavy ŭ Kutaisi, adtul — u Maskvu, a z Maskvy aŭtobusam dabiraŭsia da Minska. Usia daroha zajmaje ŭ jaho kala paŭtara sutak. Košt pajezdki roźnicca. Ale kali ŭdajecca złavić niedarahija bilety, układajecca ŭ 300 jeŭra.

«Sprabuju vybirać pajezdki ŭ nizki siezon, tady možna dobra aščadzić na avijapieralotach», — kaža biełarus.

Farmalnych pieraškod dla viartańnia na radzimu ŭ Arcioma niama. U Biełarusi na jaho nie zaviedziena kryminalnaj spravy, choć jon i braŭ udzieł u vuličnych pratestach. Ale pierasiakać biełaruska-polskuju hranicu jon usio roŭna aścierahajecca.

«Chto siońnia tabie harantuje, što ty biez prablem projdzieš kantrol na miažy? Z vopytu svaich siabroŭ i znajomych ja viedaju, što zaŭsiody možna adšukać jaki-niebudź kamientaryj ci łajk», — tłumačyć Arciom, čamu vybiraje mienavita taki maršrut.

Z Varšavy — u Kalininhrad

Maksim žyvie ŭ Polščy ŭžo amal dziesiać hadoŭ. Raniej jon jeździŭ na radzimu raz na hod, a to i čaściej — naviedać rodnych. Žyvučy ŭ polskim horadzie, jon chadziŭ hałasavać u žniŭni 2020 hoda, a potym jašče niekatory čas braŭ udzieł u pratesnych akcyjach u Polščy. Kali biełaruskija siłaviki zajavili, što buduć zavodzić kryminalnyja spravy suprać usich, chto ŭdzielničaje ŭ pratestach za miežami krainy, Maksim jeździć u Biełaruś pierastaŭ. Pakul surjozna nie zachvareła jahonaja babula.

«Ja chacieŭ paśpieć pryjechać da jaje, kab pabyć ź joj i ŭ vypadku čaho raźvitacca. Staŭ daviedvacca, jak možna źjeździć u Biełaruś biaśpiečna. Varyjantaŭ było niekalki: praz Hruziju, Stambuł, Jerevan i inšyja. Ale mnie bolš za ŭsio padychodziŭ varyjant praz Kalininhrad».

Maršrut atrymaŭsia takim: aŭtobus z Varšavy da Kalininhrada, a dalej ciahnik da Maskvy. Potym z Maskvy Maksim dabiraŭsia da rodnaha horada ŭžo na maršrutcy. Šlach zaniaŭ bolš za dvoje sutak. Dakładny košt kvitkoŭ mužčyna nie pamiataje, ale ŭsia daroha abyšłasia jamu prykładna ŭ 250‑300 jeŭra.

«Sprava moža źjavicca, jak tolki siłaviki daviedajucca pra vaša znachodžańnie ŭ Biełarusi»

Nakolki takija šlachi biaśpiečnyja i čym ryzykujuć biełarusy, jakija imi karystajucca, Most spytaŭ Dźmitryja Jahorava, pradstaŭnika arhanizacyi Bysol.

— Pazicyja našaj arhanizacyi, zychodziačy ź ciapierašniaj situacyi, takaja, što my rekamiendujem ustrymacca ad pajezdak u Biełaruś, asabliva tym, chto ŭdzielničaŭ u pratestach. Jedziecie vy praz Hruziju, Rasiju — usio roŭna heta nie harantuje biaśpieki, u tym liku na miažy. Siłaviki Biełarusi i Rasii aktyŭna supracoŭničajuć, abmieńvajucca danymi, majuć ahulnyja bazy. Dopyty na miažy ŭ vyhladzie prahladu źmieściva telefona — heta samy lohki varyjant niepryjemnaściej. Navat kali vam nieviadoma pra kryminalnuju spravu suprać vas, jana moža źjavicca, jak tolki biełaruskija siłaviki daviedajucca pra vaša znachodžańnie ŭ Biełarusi: vyjezd budzie zakryty, vas mohuć pačać adrazu ž šukać abo zatrymać pry sprobie pakinuć krainu.

— Vy zhadali, što kryminalnaja sprava moža źjavicca ŭžo paśla taho, jak čałaviek apyniecca ŭ Biełarusi. Možacie raskazać, jak heta adbyvajecca na praktycy?

— U nas jość kiejsy sa Słužby evakuacyi, i nie adzin. Jany vielmi typovyja i paŭtarajucca, što śviedčyć pra sistemu. Čałaviek pierasiakaje miažu, pry hetym kantrol prachodzić bieź siurpryzaŭ. Adnak u pamiežnych bazach spracoŭvaje «ściažok», infarmacyja pra pierasiačeńnie miažy traplaje siłavikam. Zavodzicca kryminalnaja sprava.

— Jak źjaŭlajecca taki «ściažok»?

— Dapuścim, u siłavikoŭ jość infarmacyja pra ŭdzieł niekalkich ludziej u dvarovym telehram-čacie ŭ 2020 hodzie abo ŭ pratestach. Śledčyja praviarajuć, da kaho mohuć daciahnucca, chto ŭ Biełarusi, i pryciahvajuć u miežach kryminalnaj spravy. Astatnija — naprykład, kali chtości vyjechaŭ — zastajucca ŭ śpisie. Mienavita na ich spracoŭvaje sistema, kali jany viartajucca ŭ krainu.

Aŭtamatyčna im zabaraniajecca vyjezd, i śledčyja spakojna, nie śpiašajučysia, zavodziać novuju spravu, šukajuć čałavieka i zatrymlivajuć. Kali chtości pryjechaŭ u Biełaruś biez prablem na paru dzion, a na vyjeździe akazałasia, što jon nievyjazny, choć nie było ni pozvaŭ, ni zvankoŭ, — chutčej za ŭsio, da jaho jašče prosta nie dajšli. U takoj situacyi varta pakinuć krainu (majecca na ŭvazie praz Słužbu evakuacyi, jakaja arhanizuje takija ŭcioki. — Zaŭv. Most).

— Kali čałaviek usio ž prymaje rašeńnie jechać, niahledziačy na vašu rekamiendacyju ŭstrymacca, ci jość jakija-niebudź bazavyja rečy, jakija varta viedać zahadzia: kudy paviedamić blizkim, da kaho źviartacca ŭ vypadku zatrymańnia?

— My rekamiendujem nie jechać u Biełaruś, tamu my nie budziem davać jakich-niebudź rekamiendacyj pa biaśpiecy ŭ płanie pajezdki, bo jany nie dajuć nijakaj harantyi, ale mohuć stvaryć iluziju, što situacyja pad kantrolem i jechać bolš-mienš biaśpiečna, kali vykananyja rekamiendacyi Bysol. Naša rekamiendacyja — ustrymacca ad pajezdki. Heta ryzyka, canoj moža być źniavoleńnie, katavańni, razburanaje zdaroŭje.

• 9
• 0
• 0
• 0
• 0
• 1
• 1
• 0