«Biełorusskij siłovik» mačulić ułady Rasii za spynieńnie ŭdaraŭ pa ŭkrainskaj enierhietycy
Rašeńnie Maskvy pahadzicca na ŭzajemny maratoryj na ŭdary pa enierhietyčnych abjektach vyklikała hyrkańnie na kanale, źviazanym ź biełaruskimi siłavymi strukturami.
Fašysckaje kryło łukašenkaŭcaŭ chacieła b vajny da pieramožnaha kanca i vystupaje suprać kampramisnaha skančeńnia kanfliktu. Takaja vysnova naprošvajecca z analizu taho, jak padaje infarmacyju kanał «Biełorusskij siłovik». Jon byŭ adnym ź pieršym, chto zabiŭ tryvohu ab spynieńni ŭdaraŭ pa enierhaabjektach Ukrainy.
«Tryvožnyja naviny pastupajuć», — tak pačynałasia pieršaje paviedamleńnie kanała pra maratoryj na ŭdary.
Kanał miarkuje, što maratoryj vyhadny Ukrainie.
«Nočču Tramp taksama zajaviŭ, što Rasija prypyniła ŭdary pa ŭkrainskich haradach i zajaviŭ, što «my vielmi heta cenim». A Ukraina jak cenić, słovami nie pieradać».
«Biełorusskij siłovik» krytykuje Kreml za takoje rašeńnie: «Prajšli sutki. Nul kamientaryjaŭ rasijskaha boku ab damoŭlenaściach z Trampam dać Ukrainie pieradyšku ŭ śfiery enierhietyki, jakaja ŭžo amal zdochła».
Udary pa elektrastancyjach, ciepłaelektracentralach i padstancyjach u hłybokim tyle ŭkrainskaj terytoryi nijak nie ŭpłyvajuć na bajazdolnaść ukrainskaj armii. Tym nie mienš, «Biełorusskij siłovik» vystupaje za taktyku tatalnaj vajny i nie bačyć sensu škadavać mirnaje nasielnictva. Jon pieradrukoŭvaje post kanała «Rybar», stvoranaha supracoŭnikami rasijskich śpiecsłužbaŭ:
«Kali ž havorka pra toje, kab paškadavać ukrainskaje nasielnictva ŭ chałodnaje nadvorje, to heta biessensoŭna i nie daść ničoha. A achvotnym parazvažać na temu taho, što «ŭ centry i na ŭschodzie t. zv. Ukrainy žyvuć, u asnoŭnym, našy ludzi, ale jany prosta zapałochanyja, jak možna ich pakidać bieź ciapła i elektryčnaści?» prapanujem zajści va ŭkrainskija haradskija kanały i pačytać tam kamientaryi tych samych našych ludziej».
«BS» robić pierapost i ź inšaha rasijskaha pravajennaha kanała «Dva majory», jaki asudžaje maratoryj, ale pryznaje, što nie chałopskaja heta sprava raźbiracca ŭ «ekanamičnych dy inšych» pryčynach, čamu Rasija vymušanaja pahadzicca na kampramis.
«Z adnaho boku — heta, viadoma, chrenova. Tolki pačali adčuvacca realnyja nastupstvy (i to vidavočna pierabolšanyja Kijevam), jak my faktyčna dajom čas na ramont i stabilizacyju.
Z druhoha boku, kiraŭnictvam [Rasii] ŭziaty kurs na ŭrehulavańnie/zamarozku kanfliktu i niejak hetuju hatoŭnaść treba dakazvać na spravie. Čamu taki kurs uziaty — pytańnie inšaje i nie da nas. Vidavočna jość ekanamičnyja i inšyja pryčyny».
«Biełorusskij siłovik» praciahvaje i źbirać dapamohu dla «druhoj armii śvietu»: «Na front patrebnyja hienieratary. Kali chtości moža sabie dazvolić nabyć i pieradać praz nas pacanam na pieradok ci ž jość biezhaspadarny, to budziem vielmi rady. Taksama hatovyja vykupić za svaje pa adekvatnaj canie».
Telehram-kanał «Biełorusskij siłovik» uźnik u sakaviku 2022 hoda, kali rasijanie šturmavali Kijeŭ. Dziakujučy kałabaracyjam z takimi ž rasijskimi Z-kanałami i raspalvańniu vajennaj isteryi jon uźlacieŭ da 437 tysiač padpisčykaŭ — biełarusaŭ siarod ich mała, jon pracuje na ŭnutryrasijskuju aŭdytoryju. «Naša Niva» pajšła pa śladach, pakinutych jaho stvaralnikam u internecie, i vyśvietliła raniej, što za kanałam staić Artur Hajko, aficer HUBAZiKa Ministerstva ŭnutranych spraŭ Biełarusi.
Ciažka skazać, nakolki vialikaja častka biełaruskich siłavikoŭ całkam identyfikujuć siabie z Rasijaj i kirujucca takimi čałaviekanienavisckimi idejami, jak aŭtary «Biełorusskoho siłovika». Adnak vidavočna, što hetaja častka maje kartbłanš dla dziejańnia i prapahandy svajoj ruskamirnaj, faktyčna rusafašysckaj ideałohii.
Kamientary
«Vieniesueła, kraina z najvialikšymi zapasami nafty ŭ śviecie, časovaja vykanaŭca abaviazkaŭ prezidenta Delsi Radryhies padpisała zakon, jaki dazvalaje pryvatyzacyju naftavaha siektara krainy.»
-BBC