Biełaruski dyzajnier zrabiŭ futra, natchniŭšysia vybivańniem dyvanoŭ na śniezie
Cykłon Uli razam sa śnieham i marazami prynios tony kreatyvu: biełarusy rabili miemy, zdymali tyktoki na łyžach i kańkach, lapili skulptury i zabaŭlalisia sa štučnym intelektam. Adzin z prykołaŭ zajšoŭ zanadta daloka. Hrafičny dyzajnier Loša Limonaŭ pakazaŭ kancepty biełych futraŭ z dekoram u vyhladzie šuflaŭ, śniehaŭboračnych MAZaŭ, łyžnikaŭ i vyhalenych «aniołaŭ». Heta stała nastolki papularnym, što pryjšłosia pa-sapraŭdnamu stanavicca jašče i modnym dyzajnieram, piša «Anłajnier».
«Siadzieŭ kala akna, hladzieŭ na śnieh, kruciŭ u hałavie idei. Spačatku prosta pryjšoŭ vobraz aranžavaha šufla — padumaŭ, što budzie prykolna raźmiaścić jaho na biełaj cišotcy. Potym užo pryjšło azareńnie: heta pavinna być nie cišotka, a futra. Tak jaho miakkaja tekstura stała miescam dla niejkich zrazumiełych haradskich siužetaŭ: čałaviek z šuflem, sami šufli, raskidanyja na śniezie, śniehaŭboračnyja aŭtamabili, matyvy z sabakami (kali pryadčynić niekatoryja miescy na futry, bačnyja ich haŭniaški)», — raskazaŭ Limonaŭ žurnalistu «Anłajniera».
Dyzajnier uvasobiŭ svaje fantazii ŭ ilustracyjach z dapamohaj ŠI, vykłaŭ u Instagram — i pačałosia. Adna tolki padborka fatahrafij z futrami sabrała bolš za 200 tysiač prahladaŭ, post łajkali zorki, a kamientary byli zavaleny pytańniami: «Dzie kupić?» i «Kolki kaštuje?»
Loša žartuje, što paśla taho, jak na jaho sacsietki padpisaŭsia viadomy madeljer Dzianis Simačoŭ, dakładna vyrašyŭ: treba rabić sapraŭdnaje futra.
Biełaje futra dla ekśpierymientu achviaravaŭ adzin ź biełaruskich brendaŭ, jakim Loša pisaŭ z prośbaj ab kałabaracyi. Dyzajnier prynios reč dadomu, uziaŭ zvyčajny trymier, jakim holić hałavu, i pačaŭ vyholvać na futry miescy dla budučych dyzajnierskich elemientaŭ.
Tut i atrymaŭsia pieršy «kasiak»: futra zanadta mocnaje. Bolš mahutnaja mašynka dla stryžki jaho taksama «nie ŭziała».
«Užo rasstroiŭsia: ech, takaja kłasnaja ideja, a tak składana realizavać… U vyniku zajšoŭ u hruminh-sałon kala doma, pakazaŭ im futra. Dziaŭčyna ŭziała mašynku dla stryžki sabak — i lohka vyhaliła kavałak. Ja litaralna praz hadzinu kupiŭ sabie takuju samuju i sieŭ za pracu».
U vyniku atrymałasia «śniežnaje» futra z nastalhičnymi detalami: savieckimi dyvanami i vybivałkami. Vierahodna, tyja, chto naradziŭsia paźniej za 2000 hod, mohuć navat nie zrazumieć, da čaho adsyłaje takaja kampazicyja, ale ŭ ludziej starejšaha ŭzrostu zaraz, vidać, hłucha zastukała ŭ hałavie. U modny slavic core taksama jak byccam upisvajecca idealna.
Pakul reč isnuje ŭ adzinym ekzemplary, choć Loša nie vyklučaje vytvorčaść takich ža pad zakaz. Jość u dyzajniera i dumki nakont kalarovaj sieryi futraŭ z padobnymi «vyhalenaściami» i biełaruskimi siužetami: rapsavyja pali, kambajny i ŭsio ŭ takim duchu.
Zakinutuju siadzibu Bahdanovičaŭ pierarobiać u bucikovy hatel FOTY
Novy trend u płaniroŭcy pamiaškańniaŭ: sanvuzły ŭnutry pakojaŭ za rassoŭnymi ścienami ci navat bieź ich
Jurysta, jaki pajšoŭ u hiejmdyzajniery i stvaraŭ «Śviet karabloŭ», pasadzili za palityku na try hady
Try hady valili les u Finlandyi. Viarnulisia i adkryli svaju majsterniu pad Fanipalem
Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju22
Kamientary