Niamiecki ŭrad zasakreciŭ infarmacyju ab prajektach u Biełarusi, jakuju zapytvaje «Alternatyva dla Hiermanii»
Urad Hiermanii admoviŭsia raskryvać infarmacyju pra svaje prajekty ŭ Biełarusi, a taksama ŭ Nikarahua i Mjanmie, na zapyt ultrapravaj partyi «Alternatyva dla Hiermanii». Hetyja źviestki byli zasakrečanyja ź mierkavańniaŭ biaśpieki, piša vydańnie «Pozirk».
Niamiecki kabiniet ministraŭ adchiliŭ try deputackija zapyty, nakiravanyja «Alternatyvaj dla Hiermanii» ŭ śniežni 2025 hoda. Zapyty datyčylisia prajektaŭ, jakimi zajmajecca Fiederalnaje ministerstva ekanamičnaha supracoŭnictva i raźvićcia. Apisańni hetych inicyjatyŭ adsutničajuć jak na aficyjnym sajcie viedamstva, tak i ŭ mižnarodnaj sistemie prazrystaści dapamohi IATI.
Što tyčycca Biełarusi, to havorka idzie pra dva prajekty ahulnym abjomam finansavańnia 720 tysiač jeŭra. Adzin ź ich, najbolš bujny, realizujecca z kanca 2024 da vosieni 2027 hoda i nakiravany na raźvićcio demakratyčnaha i inkluziŭnaha kiravańnia, padtrymku ludziej ź invalidnaściu i zabieśpiačeńnie hiendarnaj roŭnaści. Druhi, mienšy pa biudžecie, dziejničaje z pačatku 2024‑ha da kanca 2027 hoda i pryśviečany pytańniam repraduktyŭnaha, maciarynskaha i dziciačaha zdaroŭja.
Deputaty AdH patrabavali raskryć nazvy prajektaŭ, ich kankretnyja mierapryjemstvy i rastłumačyć, čamu infarmacyja pra ich zakrytaja, niahledziačy na finansavańnie ź fiederalnaha biudžetu.
U adkaz urad FRH zajaviŭ, što, choć Hiermanija i abaviazałasia vykonvać pryncypy prazrystaści mižnarodnaj dapamohi, heta nie moža adbyvacca z parušeńniem pravił abarony kanfidencyjnych danych.
Ułady padkreślili, što ŭ Biełarusi dziejničaje žorstki represiŭny aŭtarytarny režym, a publičnaje raskryćcio infarmacyi moža pastavić pad pahrozu biaśpieku pradstaŭnikoŭ hramadzianskaj supolnaści, miascovych NDA i ich partnioraŭ — u tym liku niamieckich.
Na dumku ŭrada, abnarodavańnie takich źviestak mahło b pryvieści da źniščeńnia niezaležnych arhanizacyj i stvaryć realnuju niebiaśpieku dla žyćcia, svabody i pravavoj abaronienaści ludziej, jakija ŭdzielničajuć u realizacyi prajektaŭ.
Partyja «Alternatyva dla Hiermanii» nieadnarazova, pad vyhladam abarony nacyjanalnych intaresaŭ, nakiroŭvała padobnyja zapyty nakont padtrymki biełaruskich demakratyčnych inicyjatyŭ. Krytyki partyi śćviardžajuć, što pa styli takija zapyty nahadvajuć mietady śpiecsłužbaŭ.
Raniej biełaruskija dziaržaŭnyja ŚMI paviedamlali pra pieratrusy ŭ niezaležnych rehijanalnych miedyjach, jakija supracoŭničali z pasolstvam Hiermanii. Akramia taho, šyroki rezanans vyklikała sprava ab vykarystańni pracy biełaruskich palitviaźniaŭ firmaj, źviazanaj z deputatam AdH u Saksonii Jorham Dornaŭ.
Stała viadoma, kali adbylisia pieratrusy ŭ miedyja, pra jakija paviedamiŭ ANT
Deputatu ad AdH pakinuli ŭ sile štraf 20 tysiač jeŭra za fiermu z cybulaj u Biełarusi
Niamiecki deputat, jaki maje pad Lidaj firmu pa pierapracoŭcy cybuli, vyklikaŭ palicyju na žurnalistaŭ i byłoha biełaruskaha viaźnia
«Maleńkaja pasłuha biełaruskim uładam». Deputaty «Alternatyvy dla Hiermanii» zrabili zapyt svajmu ŭradu pra finansavańnie «Bajsoła» i biełaruskich palitviaźniaŭ
Ciapier čytajuć
Džefry Epštejn niekalki razoŭ atrymlivaŭ vizu ŭ Biełaruś. I dakładna naviedvaŭ našuju krainu3
Kamientary