«Pryjšło SMS: zapłacicie 450 rubloŭ». Dziciaci minčuka prychodziać paviedamleńni pra čužyja daŭhi
Minčuk Dźmitryj raspavioŭ žurnalistu MYFIN dziŭnuju historyju pra daŭhi. I havorka idzie nie pra ašukancaŭ.
«Hetaja historyja pačałasia jašče ŭ studzieni, — raskazvaje Dźmitryj. — Dva hady tamu my padklučyli dziciaci sim-kartu. Niejak ja staviŭ telefon dziciaci na zaradku i ŭbačyŭ, što ŭ jaho dziasiatki niepračytanych SMS-paviedamleńniaŭ. Adkryvaju i baču: «Apłacicie doŭh 450 rubloŭ». Pieršapačatkova ja padumaŭ, što syn niedzie nakasiačyŭ — moža, spampavaŭ niejkuju płatnuju prahramu».
«Kali my z žonkaj ubačyli hetaje paviedamleńnie, dzicia ŭžo spała. Žonka patelefanavała ŭ MTS — joj adkazali, što raz u paviedamleńni paznačana kampanija A1, to i vyrašać pytańnie treba z A1. Žonka nabrała koł-centr A1 — joj spačatku adkazali, što takoha numara naohuł u ich niama ŭ bazie i kab jana telefanavała raźbiracca ŭ MTS. Jana znoŭ patelefanavała ŭ daviedačnuju A1, kab udakładnić: kali numara niama ŭ bazie, to, atrymlivajecca, i nijakaha doŭhu niama? Adkazała ŭžo inšaja rabotnica. Paćvierdziła, što doŭhu na numary niama i skazała, što adklučyć numar ad rassyłki hetych paviedamleńniaŭ».
Ale nieŭzabavie pryjšło novaje SMS pra novy doŭh. A potym jašče adno. Sumy mianialisia: to pamianšalisia, to pavialičvalisia.
«My navat niejak pryzvyčailisia da hetych SMS i časova pierastali źviartać na ich uvahu. Ale potym heta ŭsio ž nadakučyła. Što za doŭh? Adkul sumy? Ci dakładna my ničoha nie vinny? U SMS-paviedamleńni paznačana spasyłka dla klijenta z padrabiaznaściami pra doŭh, ale zarehistravacca pa joj u nas nie atrymałasia. Kali ŭ sakaviku situacyja praciahnułasia, my adpravili piśmovy zvarot anłajn-kansultantu ŭ A1. I atrymali niečakany adkaz».
«Vaš numar paznačany kantaktnym»
«Treciaja sproba razabracca akazałasia paśpiachovaj. Anłajn-kansultant patłumačyła, što naš numar paznačany kantaktnym u inšaha (mahčyma, užo byłoha) klijenta kampanii A1». Jak takoje mahło atrymacca?
Chutčej za ŭsio, adkaz vielmi prosty: «Kali my afarmlali dziciaci hetuju sim-kartu, nam nie skazali, što byvajuć «čystyja» sim-karty i karty «z historyjaj». Numar telefona našaha dziciaci raniej kamuści ŭžo naležaŭ. Mabyć, były ŭładalnik niekali niešta na siabie aformiŭ u A1, tamu naša dzicia i atrymlivaje hetyja apaviaščeńni pra doŭh».
«Pa sutnaści, nichto nie vinavaty, tak skłalisia abstaviny, — kaža Dźmitryj. — Ciapier mnie treba kudyści iści, zapaŭniać niejkija zajavy, kab SMS pierastali prychodzić. Nie vielmi chočacca hetym zajmacca. Moj dośvied kaža: kali padklučajecie sim-kartu — vam budzie spakajniej, kali voźmiecie «čysty» numar, jaki raniej dakładna nikomu nie naležaŭ».
Kamientary