Adnym z hałoŭnych vynikaŭ udziełu Śviatłany Cichanoŭskaj u samicie Jeŭrapiejskaj palityčnaj supolnaści ŭ Jerevanie stała damoŭlenaść pra jaje vizit va Ukrainu: uzhodnieny kankretnyja ŭmovy i časavyja ramki. Pra heta «Lusterku» raspavioŭ dypłamatyčny daradca lidarki demsił Dzianis Kučynski.
Vizit Śviatłany Cichanoŭskaj u Armieniju, dzie 4−5 maja prajšoŭ samit Jeŭrapiejskaj palityčnaj supolnaści, prynios važny vynik va ŭkrainskim kirunku. Pavodle słoŭ Dzianisa Kučynskaha, na palach samitu adbyłasia sustreča ź ministram zamiežnych spraŭ Ukrainy Andrejem Sibiham, padčas jakoj udałosia dasiahnuć značnaha prahresu ŭ padrychtoŭcy pajezdki lidarki demakratyčnych sił u Kijeŭ.
— My atrymali vyznačanaść nakont farmatu hetaha vizitu. Ź mierkavańniaŭ biaśpieki ja nie mahu nazyvać usich detalaŭ, ale sapraŭdy liču, što pieramovy ŭ Armienii ź ministram Sibiham, pieršaja dvuchbakovaja sustreča Cichanoŭskaj z prezidentam Uładzimiram Zielenskim, padčas jakoj my atrymali zaprašeńnie va Ukrainu, a taksama dalejšaja kamunikacyja našych kamand byli vielmi važnymi, — raspavioŭ Kučynski.
Akramia ŭkrainskaha kirunku, u Jerevanie Cichanoŭskaja praviała bolš za 20 dvuchbakovych sustreč, u tym ź lidarami krain «Vialikaj siamiorki».
Adnoj z klučavych stała pieršaja sustreča z novym premjer-ministram Kanady Markam Karni.
— U nas było davoli dobraje supracoŭnictva z byłym premjer-ministram Džaścinam Trudo, i zaraz važna było sustrecca, paznajomicca z novym premjeram. My razmaŭlali pra vizit u Atavu, kab adna z najbujniejšych i najvažniejšych krain G7 na ŭzroŭni premjer-ministra pryniała tam Śviatłanu Cichanoŭskuju. My razmaŭlali pra praktyčnuju padtrymku dla biełarusaŭ i žurnalistaŭ u pryvatnaści, uličvajučy, što ŭ ich užo jość prahrama padtrymki biełaruskich miedyja, — raspavioŭ Kučynski.
Taksama adbylisia razmovy z premjer-ministrami Armienii Nikołam Pašynianam i Słavakii Robiertam Ficam, prezidentam Francyi Emaniuelem Makronam, kiraŭnicaj Jeŭraparłamienta Rabiertaj Mietsołaj, staršynioj Jeŭrakamisii Ursułaj fon der Lajen, prezidentam Jeŭrasavieta Antoniu Koštam, hiensiekam NATA Markam Rute i inšymi suśvietnymi lidarami.
Sam fakt praviadzieńnia samitu ŭ Jerevanie ŭ Ofisie Cichanoŭskaj ličać važnym hieapalityčnym sihnałam i demanstracyjaj vybaru Armienii na karyść jeŭrapiejskaha šlachu raźvićcia.
— Zaprašeńnie ŭ Jerevan ad armianskaha kiraŭnictva — heta davoli śmieły žest, jaki jasna padkreślivaje, što Armienija zrabiła vybar, u jakim kirunku jana ruchajecca — u jeŭrapiejskim. Heta tyčycca i pytańnia Biełarusi: z Alaksandram Łukašenkam u ich nijakich spraŭ być nie moža, i jany vybirajuć pracavać sa Śviatłanaj Cichanoŭskaj, — patłumačyŭ Kučynski.
-
«Imia Karatkieviča — instrumient u brudnych rukach, dubina ŭ palityčnych bojkach». Što prapahanda adkazała nakont zaniadbanaha doma siamji kłasika
-
Palitviazień ažaniŭsia z kachanaj pa pierapiscy — raźvialisia praz dva miesiacy na voli
-
Jak vyžyć u anamalnuju śpioku. Niečakanyja, ale dziejsnyja parady navukoŭcaŭ
Ciapier čytajuć
U Biełarusi množacca placoŭki dla tancaŭ na śviežym pavietry — pahladzicie, jak adpalvajuć razam moładź i piensijaniery ŭ Sierabrancy5
Kamientary