Bieły dom čakaje adkazu Irana pa klučavych pałažeńniach u najbližejšyja 48 hadzin.
ZŠA i Iran blizkija da zaklučeńnia karotkaha miemarandumu ab uzajemarazumieńni, jaki pavinien zafiksavać spynieńnie kanfliktu na Blizkim Uschodzie i vyznačyć ramki dalejšych pieramovaŭ pa jadziernaj prahramie, paviedamlaje Axios sa spasyłkaj na amierykanskich čynoŭnikaŭ i krynicy, znajomyja z pracesam.
Pavodle surazmoŭcaŭ vydańnia, Bieły dom čakaje adkazu Irana pa klučavych pałažeńniach u bližejšyja 48 hadzin. Kančatkovych damoŭlenaściaŭ pakul niama, adnak baki, jak adznačajecca, nablizilisia da pahadnieńnia macniej, čym na papiarednich etapach pieramovaŭ.
Prajekt dakumienta praduhledžvaje prypynieńnie ŭzbahačeńnia ŭranu Iranam, paetapnaje źniaćcie sankcyj ZŠA i razbłakiroŭku častki zamarožanych iranskich srodkaŭ. Taksama abmiarkoŭvajecca pastupovaja admiena abmiežavańniaŭ na sudnachodstva praz Armuzski praliŭ i źnižeńnie vajennaj napružanaści ŭ rehijonie. Pavodle krynic, asobny 30‑dzionny etap pieramovaŭ dla padrychtoŭki bolš detalovaha pahadnieńnia moža adbycca ŭ Ženievie abo Isłamabadzie. U hety pieryjad miarkujecca pastupovaje źmiakčeńnie abmiežavańniaŭ z abodvuch bakoŭ.
U miežach mierkavanaha maratoryju na ŭzbahačeńnie ŭranu razhladajucca terminy ad 12 da 15 hadoŭ — raniej Iran prapanoŭvaŭ piacihadovy maratoryj, a ZŠA — 20-hadovy.
Taksama abmiarkoŭvajucca ŭzmocnienyja inśpiekcyi Mižnarodnaha ahienctva pa atamnaj enierhii (MAHATE), uklučajučy mahčymaść raptoŭnych pravierak, i abaviazacielstvy Irana nie raźvivać jadziernuju zbroju.
ZŠA, zhodna z prajektam, mohuć paetapna źmiakčać sankcyi i razbłakiroŭvać značnyja abjomy zamarožanych iranskich aktyvaŭ. Abmiarkoŭvajecca taksama mahčymaść vyvazu vysokaŭzbahačanaha ŭranu za miežy Irana.
Pry hetym u Biełym domie adznačajuć, što ŭnutranaja pazicyja kiraŭnictva Irana zastajecca nieadnarodnaj, što moža ŭskładnić dasiahnieńnie kančatkovych damoŭlenaściaŭ. Kančatkovaje pahadnieńnie pamiž bakami pakul nie dasiahnuta.
Ciapier čytajuć
Što viadoma pra viciebčuka, jakoha vinavaciać u sprobie padryvu samalota ŭ Hiermanii16
Kamientary
Čto iźmieniłoś ?
Pochožie, śledujuŝije 25 let budut takimi žie, do novoho Trampa !