Kalininhradziec zažyva spaliŭ siabie ŭ znak pratestu suprać vajny, ale ŭłady nie dazvolili nikomu pra heta daviedacca
U Kalininhradzie ŭ treciuju hadavinu poŭnamaštabnaha ŭvarvańnia Rasii va Ukrainu 37‑hadovy prahramist Alaksandr Okunieŭ učyniŭ samaspaleńnie ŭ znak pratestu suprać vajny. I nichto nie daviedaŭsia pra heta, pišuć «Važnyje istorii».
Pieršaja zhadka pra hety vypadak źjaviłasia ŭ adkrytym dakładzie estonskaj źniešniaj raźviedki biez udakładnieńnia imia zahinułaha.
«U treciuju hadavinu poŭnamaštabnaj ahresiŭnaj vajny Rasii, a piataj hadzinie ranicy 24 lutaha 2025 hoda, mužčyna 1988 hoda naradžeńnia napisaŭ na śniezie kala pomnika rasijskamu sałdatu ŭ Kalininhradzie «Nie vajnie» i padpaliŭ siabie ŭ znak pratestu», — havaryłasia ŭ dakumiencie.
Jak stała viadoma z daviedki pra vyniki dziažurstva śledčych, abhareły trup Okunieva znajšoŭ minak kala 06:40 ranicy la pomnika 1200 hvardziejcam, dzie mieścicca Viečny ahoń.
Pobač ź ciełam na śniezie bałončykam z farbaj było napisana «Nie vajnie».
Pra toje, što adbyłosia, dałažyli kiraŭniku haradskoj administracyi Alenie Dziatłavaj, jakaja nieadkładna ŭziała spravu pad svoj kantrol. Joj dapamahali Jaŭhien Masłaŭ, kiraŭnik miascovaj słužby achovy abjektaŭ kulturnaj spadčyny, i Andrej Jermak, ministr kultury i turyzmu Kalininhradskaj vobłaści.
Apošni asabliva chvalavaŭsia, što samaspaleńnie adbyłosia kala pomnika Vialikaj Ajčynnaj — zanadta simvalična.
Čynoŭniki vyrašyli schavać zdareńnie. Užo da 09:15 ślady samaspaleńnia prybrali, a ŭłady horada adrapartavali načalstvu, što nichto ničoha nie bačyŭ. U vyniku infarmacyja sapraŭdy nie źjaviłasia ni ŭ adnym sa ŚMI i nie zhadvałasia ŭ sacsietkach. Rodnyja Okunieva pra samaspaleńnie taksama nie raskazvali.
Členy siamji raspaviali pra niejkija «ekśpiertyzy» ŭ miežach rasśledavańnia, jakija ŭstanavili — «nijakaha ŭpłyvu zvonku nie było».
Rodnych dapytali ŭ Śledčym kamitecie; palicyja prychodziła da byłych kaleh Okunieva pa «charaktarystyku», ale pajšła ni z čym: «Skazali, pracavaŭ dobra, ni z kim nie kamunikavaŭ. Jak jašče acharaktaryzavać?»
Blizki Okunieva pierakazaŭ «Važnym istorijam» źmiest jaho pieradśmiarotnaj zapiski:
«Napisaŭ, što jość inšy šlach.
U jaho śviecie, vidać, pavinien byŭ być mir va ŭsim śviecie. Jon nie zachacieŭ bolš žyć u takim śviecie, tamu pryniaŭ takoje rašeńnie».
Padrabiaźniej možna pačytać tut.
Ciapier čytajuć
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku44
Kamientary