Калінінградзец зажыва спаліў сябе ў знак пратэсту супраць вайны, але ўлады не дазволілі нікому пра гэта даведацца
У Калінінградзе ў трэцюю гадавіну поўнамаштабнага ўварвання Расіі ва Украіну 37‑гадовы праграміст Аляксандр Окунеў учыніў самаспаленне ў знак пратэсту супраць вайны. І ніхто не даведаўся пра гэта, пішуць «Важные истории».
Першая згадка пра гэты выпадак з’явілася ў адкрытым дакладзе эстонскай знешняй разведкі без удакладнення імя загінулага.
«У трэцюю гадавіну поўнамаштабнай агрэсіўнай вайны Расіі, а пятай гадзіне раніцы 24 лютага 2025 года, мужчына 1988 года нараджэння напісаў на снезе каля помніка расійскаму салдату ў Калінінградзе «Не вайне» і падпаліў сябе ў знак пратэсту», — гаварылася ў дакуменце.
Як стала вядома з даведкі пра вынікі дзяжурства следчых, абгарэлы труп Окунева знайшоў мінак каля 06:40 раніцы ля помніка 1200 гвардзейцам, дзе месціцца Вечны агонь.
Побач з целам на снезе балончыкам з фарбай было напісана «Не вайне».
Пра тое, што адбылося, далажылі кіраўніку гарадской адміністрацыі Алене Дзятлавай, якая неадкладна ўзяла справу пад свой кантроль. Ёй дапамагалі Яўген Маслаў, кіраўнік мясцовай службы аховы аб’ектаў культурнай спадчыны, і Андрэй Ермак, міністр культуры і турызму Калінінградскай вобласці.
Апошні асабліва хваляваўся, што самаспаленне адбылося каля помніка Вялікай Айчыннай — занадта сімвалічна.
Чыноўнікі вырашылі схаваць здарэнне. Ужо да 09:15 сляды самаспалення прыбралі, а ўлады горада адрапартавалі начальству, што ніхто нічога не бачыў. У выніку інфармацыя сапраўды не з’явілася ні ў адным са СМІ і не згадвалася ў сацсетках. Родныя Окунева пра самаспаленне таксама не расказвалі.
Члены сям’і распавялі пра нейкія «экспертызы» ў межах расследавання, якія ўстанавілі — «ніякага ўплыву звонку не было».
Родных дапыталі ў Следчым камітэце; паліцыя прыходзіла да былых калег Окунева па «характарыстыку», але пайшла ні з чым: «Сказалі, працаваў добра, ні з кім не камунікаваў. Як яшчэ ахарактарызаваць?»
Блізкі Окунева пераказаў «Важным историям» змест яго перадсмяротнай запіскі:
«Напісаў, што ёсць іншы шлях.
У яго свеце, відаць, павінен быў быць мір ва ўсім свеце. Ён не захацеў больш жыць у такім свеце, таму прыняў такое рашэнне».
Падрабязней можна пачытаць тут.
Каментары