Tramp choča pazbavić prava hołasu ŭ NATA tyja krainy, jakija traciać na abaronu mienš za 5% VUP
Pavodle infarmacyi brytanskaha vydańnia The Telegraph, prezident ZŠA Donald Tramp razhladaje mahčymaść radykalna źmianić praviły ŭnutry aljansu.
Havorka idzie pra toje, kab krainy, jakija traciać na abaronu mienš za 5% svajho VUP, mahli stracić prava hołasu pry pryniaćci važnych rašeńniaŭ. Heta tyčycca, naprykład, pytańniaŭ pašyreńnia aljansu, vykarystańnia artykuła ab kalektyŭnaj abaronie i praviadzieńnia sumiesnych apieracyj. Pavodle krynic, ideja zaklučajecca ŭ tym, što krainy nie pavinny ŭpłyvać na rašeńni, kali jany nie niasuć dastatkovych vydatkaŭ.
Paviedamlajecca, što Tramp pačaŭ surjozna razvažać nad hetym paśla taho, jak sajuźniki pa NATA faktyčna nie padtrymali ZŠA ŭ situacyi na Blizkim Uschodzie.
Taksama ŭ Vašynhtonie abmiarkoŭvajuć mahčymaść vyvadu amierykanskich vojskaŭ z Hiermanii — hetaja ideja źjaviłasia adrazu paśla viartańnia Trampa ŭ Bieły dom.
Pry hetym aficyjna hetyja prapanovy pakul nie pradstaŭlalisia ŭ Brusieli. Unutry NATA ŭsie rašeńni prymajucca tolki z ahulnaj zhody ŭsich krain, tamu padobnyja inicyjatyvy mohuć być zabłakavanyja i pryvieści da napružanaści pamiž sajuźnikami.
Varta adznačyć, adnak, što na siońniašni dzień nivodnaja kraina aljansu, uklučajučy ZŠA, nie dasiahaje ŭzroŭniu ŭ 5% VUP, vydatkavanych na abaronu. Najbolš traciać Polšča, Litva, Łatvija i Estonija (ad 4,8% da 3,43%), ale navat jany nie daciahvajuć da hetaj adznaki. Sami ž ZŠA płanujuć u 2026 hodzie vydatkavać na vajskovyja vydatki kala 3,3—3,4% svajho VUP.
Kamientary