Abvieščany šort-list litaraturnaj premii «Hliniany Viales»: nivodnaj knihi ź Biełarusi
Stali viadomyja finalisty adnoj z najstarejšych niezaležnych litaraturnych uznaharod Biełarusi. U šort-list premii Tavarystva volnych litarataraŭ pa vynikach 2025 hoda ŭvajšli dzieviać knih, jakija achoplivajuć amal usie žanry — ad ramanaŭ i pjes da ekśpierymientalnaj paezii. Admietnaj rysaj sioletniaha adboru stała toje, što ŭsie knihi-pretendenty pabačyli śviet za miežami krainy.
Staršynia arhkamiteta premii, piśmieńnik Aleś Arkuš, jak paviedamlaje vydańnie Reform.news, adznačyŭ, što sioleta śpis finalistaŭ achapiŭ praktyčna ŭsie asnoŭnyja litaraturnyja žanry: tut jość dva ramany, zbornik apaviadańniaŭ, kniha pjes, reparciorskaja i eseistyčnaja proza, a taksama try paetyčnyja zborniki.
Śpis finalistaŭ:
- Źmicier Višnioŭ — «Ja — toje miasa, jakoje pryhatavaŭ Źmicier» (raman, Skaryna Press, Łondan).
- Alaksandr Karnaŭch — «Chałodnyja ziemli» (raman, Gutenberg Publisher, Krakaŭ).
- Siarhiej Kavaloŭ — «Kamiedyja Judzifi» (pjesy, Kamunikat, Biełastok).
- Hanna Kandraciuk — «Prosta ź lubovi. Reparciorskija partrety pamiaci» (reparciorskaja proza, Centr biełaruskaj kultury ŭ Biełastoku).
- Vanda Marcinš duš Rejš — «Tajamnicy vysokaha dvara» (paezija, dvuchmoŭnaja kniha, Slinktys, Vilnia).
- Uładzimir Ściapan — «Vaŭka» (apaviadańni, Mianie niama, Varšava).
- Siarhiej Sys — «Pieralot trava» (eseistyka/proza, Łohvinaŭ, Vilnia).
- Jula Cimafiejeva — «Režu historyju saboj» (Ich zerschneide die Geschichte) (paezija i kałažy, dvuchmoŭny zbornik, Edition Frölich, Bierlin).
- Maks Ščur — «Čajny zbor» (postpaezija, SayBeat, Varšava).
Aleś Arkuš źviarnuŭ uvahu na admietnaść hetaha hoda: usie knihi šort-lista vydadzieny vyklučna za miažoj. Bolš za toje, upieršyniu siarod naminantaŭ jość vydańni, vypuščanyja zamiežnymi, nie biełaruskimi vydaviectvami, jak knihi Vandy Marcinš duš Rejš i Julii Cimafiejevaj.
Premija «Hliniany Viales» zasnavanaja ŭ 1993 hodzie i ŭručajecca za najlepšuju mastackuju biełaruskamoŭnuju knihu hoda. Pieramožca tradycyjna atrymlivaje hliniany stod apiekuna mastactvaŭ.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj29
Kamientary