«Čaroŭny trusik» Juryj Dziemidovič uznačaliŭ rasijski pravincyjny opierny teatr
Kalektyvu teatra opiery i baleta Respubliki Komi ŭračysta pradstavili novaha mastackaha kiraŭnika — im staŭ biełarus. Havorka idzie pra maładoha dyryžora Juryja Dziemidoviča, jakoha suajčyńniki pamiatajuć jak «Čaroŭnaha trusika» ź dziciačaha «Jeŭrabačańnia».
Miascovyja čynoŭniki čakajuć, što Juryj zrobić tak, kab «rehijanalny teatr byŭ bačny na fiederalnaj karcie kultury». Sam ža Dziemidovič padkreśliŭ: «Dla mianie Teatr opiery i baleta Respubliki Komi — heta teatr z patencyjałam i charaktaram. Maja zadača jak mastackaha kiraŭnika — vybudavać vyraznuju stratehiju, pavysić vykanalnicki ŭzrovień i stvaryć umovy, pry jakich teatr zmoža ŭvajści ŭ lik viadučych opiernych teatraŭ Rasii. Heta ambitnaja, ale absalutna dasiahalnaja meta pry sumiesnaj prafiesijnaj pracy».
Nahadajem, Juryj Dziemidovič pradstaŭlaŭ Biełaruś na dziciačym «Jeŭrabačańni» ŭ 2009 hodzie. Tady jon ź pieśniaj «Čaroŭny trusik» zaniaŭ tolki dziaviataje miesca, ale staŭ šalona papularnym nie tolki na radzimie, ale i za jaje miežami. Videa z konkursnaj pieśniaj chłopca ź niezvyčajnaj źniešnaściu amal adrazu zavirusiłasia.
Ale samomu Juryju takaja słava nie padabałasia — jon ros u davoli relihijnaj siamji, z troch hadoŭ pieŭ u carkoŭnym chory. A hledačy biaskonca žartavali, što pieśniaj «Čaroŭny trusik» možna lohka vyklikać djabła. Tamu ŭ niejki momant chłopiec zajaviŭ, što bolš nikoli nie budzie vykonvać svoj hałoŭny chit — i strymaŭ abiacańnie. Navat admoviŭsia vystupać na razahrevie ŭ hurta The Prodigy, kali toj pryjazdžaŭ u Minsk.
U vyniku talenavity chłopiec vyrašyŭ vučycca na dyryžora. Karjera jaho składvajecca davoli paśpiachova. Juryj staŭ łaŭreatam mnohich muzyčnych konkursaŭ, jon dyryžyravaŭ arkiestrami ŭ roznych teatrach Biełarusi i Rasii.
Minskija ŭłady raskazali, jak buduć zmahacca z «akijanam aŭtamabilaŭ» u dvarach2
Kamientary
škada,što jon vučyŭsia na rasiejskaj kultury i realizuje siabie tam....