«Tut u pałovy «karčoŭ» z Bresta dzirki skotčam zaleplenyja». Što mohuć pravieryć u aŭtamabili na biełaruska-polskaj miažy i kali raźviernuć?
Pry ŭjeździe ŭ Polšču mohuć uźniknuć pytańni da techničnaha stanu aŭtamabila. U pamiežnych čatach pieryjadyčna abmiarkoŭvajuć, z-za jakich niaspraŭnaściaŭ abo adsutnaści abstalavańnia heta moža adbycca.
Pryčyny dla turboty ŭ kiroŭcaŭ roznyja: ad raskoliny na łabavym škle da čyrvonych zadnich pakazalnikaŭ pavarotu na amierykanskich aŭtamabilach. Most vyvučyŭ, jakaja ciapier praktyka pravierak i što pra heta kaža polskaje zakanadaŭstva.
«Usiudy zvyčajny čałaviečy faktar»
Z paviedamleńniaŭ u profilnym čacie «HranicaBY Biełaruś — ES» składvajecca ŭražańnie, što dośvied kiroŭcaŭ mocna adroźnivajecca. Adny raspaviadajuć, što aŭtamabil praktyčna nie ahladali, inšyja — pra padrabiaznuju pravierku jaho techničnaha stanu.
«Usiudy zvyčajny čałaviečy faktar: kali pamiežnik nastrojeny prydziracca, jon metanakiravana idzie i hladzić, a kali płanavy kantrol — nichto nie ŭhladajecca ŭ skoły abo ŭvahnutaści. U Tarespali ŭ asnoŭnym na pakazalniki pavarotu nie źviartajuć uvahi, a ŭ Bruzhach čas ad času pravodziać dyjahnastyčny kantrol až da abmyvalnika zadniaha škła», — piša adzin z karystalnikaŭ čata (tut i dalej paviedamleńni adredahavanyja dla zručnaści čytańnia).
Raskolina na škle — jak pašancuje
Rozny dośvied źviazany i z raskolinami na škle. U adnaho z kiroŭcaŭ raskolina dasiahała prykładna paŭmietra.
«Pamiežnica ni słova nie skazała i prapuściła, moža, pašancavała», — napisaŭ Alaksandr u čacie.
Inšyja ŭdzielniki padtrymali zdahadku: biełarusu sapraŭdy pašancavała.
«Jana prosta nie źviarnuła ŭvahi i nie ŭbačyła. A tak pajechali b na razvarot. Ale heta jašče nie ŭsie pryhody. Vas z hetaj raskolinaj moža nadrać lubaja palicyja».
Alena raspaviała, što ŭ mai jaje aŭtamabil z raskolinaj na škle nie prapuścili, choć da hetaha niekalki razoŭ prapuskali.
«Jak pašancuje», — ličyć jana.
Što kaža zakon
Polskaje zakanadaŭstva ŭstanaŭlivaje ahulnyja patrabavańni da techničnaha stanu aŭtamabilaŭ, a asobnyja normy rehulujuć, u pryvatnaści, stan škłoŭ, śvietłavych pryboraŭ i abaviazkovaha abstalavańnia.
Ahulnaje praviła źmiaščajecca ŭ artykule 66 zakona ab darožnym ruchu. Aŭtamabil pavinien być skanstrujavany, abstalavany i ŭtrymlivacca takim čynam, kab jaho vykarystańnie nie stvarała pahrozy dla ludziej, jakija znachodziacca ŭ mašynie, abo inšych udzielnikaŭ ruchu. Jon taksama pavinien zabiaśpiečvać kiroŭcu dastatkovaje pole zroku i biaśpiečnaje vykarystańnie sistem kiravańnia, tarmažeńnia, sihnalizacyi i aśviatleńnia.
Hetyja patrabavańni raspaŭsiudžvajucca i na aŭtamabili z zamiežnaj rehistracyjaj. Zhodna z art. 71 č. 5 zakona, aŭtamabil, zarehistravany za miažoj, dapuskajecca da ruchu ŭ Polščy, kali jon adpaviadaje patrabavanym techničnym umovam, maje adpaviednyja rehistracyjnyja znaki, a kiroŭca maje dakumient, jaki paćviardžaje jaho rehistracyju.
Polskija praviły nie ŭstanaŭlivajuć kankretnaj daŭžyni raskoliny na łabavym škle, paśla jakoj aŭtamabil aŭtamatyčna ličycca niaspraŭnym.
U § 8 pastanovy ab techničnych umovach transpartnych srodkaŭ havorycca, što łabavoje škło pavinna zabiaśpiečvać kiroŭcu poŭnuju i vyraznuju bačnaść biez skažeńnia vyjavy. Navat pry paškodžańni škła bačnaść darohi pavinna zastavacca dastatkovaj.
Padčas techničnaha kantrolu stan škłoŭ aceńvajecca asobna: uličvajucca raskoliny i inšyja paškodžańni škła, a taksama abmiežavańnie bačnaści ŭ zonie, jakuju ačyščajuć dvorniki. Značeńnie maje charaktar paškodžańnia i toje, ci ŭpłyvaje jano na bačnaść i biaśpieku.
Irža na kuzavie. «Ja i nie takich «karčoŭ» na miažy bačyŭ»
Kiroŭcy taksama abmiarkoŭvajuć stan kuzava. Ci mohuć irža, uvahnutaści abo paškodžańnie asobnych elemientaŭ aŭtamabila stać pryčynaj prablem na miažy?
«Z Polščy ŭ Biełaruś prapuściać, i prablem z hetym nie budzie. Ź Biełarusi ŭ Polšču — sprava vypadku: mohuć i nie prapuścić, kali zaŭvažać», — napisaŭ adzin z udzielnikaŭ abmierkavańnia.
Inšy kiroŭca śćviardžaje, što surjoznyja źniešnija paškodžańni rehularna sustrakajucca na miažy:
«Tut u pałovy «karčoŭ» z Bresta skraznyja dzirki skotčam i izastužkaj zaleplenyja, i hłušyciel na drocie visić — i ničoha, šastajuć praź miažu».
Jašče adzin udzielnik prapanavaŭ pierad pajezdkaj prosta «zakryć paškodžańni skotčam i pafarbavać ich z bałončyka»:
«Ja i nie takich «karčoŭ» na miažy bačyŭ — prapuskali».
Inšy kiroŭca pastaviŭsia da hetaj parady skieptyčna i patłumačyŭ, što značeńnie maje nie stolki źniešni vyhlad aŭtamabila, kolki najaŭnaść niebiaśpiečnych paškodžańniaŭ:
«Kab nie było traŭmaniebiaśpiečnych paškodžańniaŭ — hladziać. Kali techahlad u Biełarusi prajści nie atrymlivajecca, to i ŭ Polšču nie puściać».
Što kaža zakon
Pry acency techničnaha stanu maje značeńnie nie stolki sama najaŭnaść iržy na kuzavie, kolki jaje stupień i miesca raźmiaščeńnia.
U kryteryjach techničnaha kantrolu asobna ŭkazvajecca praźmiernaja karozija, jakaja ŭpłyvaje na žorstkaść kanstrukcyi, a taksama paškodžańni, z-za jakich detali hublajuć nieabchodnuju tryvałaść.
Tamu tolki pa adnoj iržy nielha skazać, što aŭtamabil niaspraŭny. Ale kali karozija pryviała da asłableńnia elemientaŭ kuzava abo kanstrukcyi, heta ŭžo moža stać padstavaj dla admoŭnaj acenki techničnaha stanu.
Štraf za adsutnaść vohnietušyciela
Asobnaja tema — abstalavańnie aŭtamabila: vohnietušycielem, aptečkaj i avaryjnymi znakami.
«U nas niamieckija numary, i pry vyjeździe z Polščy ŭ Biełaruś polski pamiežnik skazaŭ, što pry ŭjeździe ŭ Polšču [biez vohnietušyciela] mohuć albo razharnuć u Biełaruś — vohnietušyciel kupić, albo vypisać štraf da 1500 złotych (350 jeŭra). Ja nie dumaju, što hramadzian ES u hety samy ES nie puściać, ale štraf całkam vierahodny», — napisaŭ adzin z karystalnikaŭ.
Inšyja ŭdzielniki čata raspaviadali, što adsutnaść vohnietušyciela nie zaŭsiody vyklikała prablemy. Ale jość i paviedamleńni pra vypadki, kali kiroŭcam prapanoŭvali albo razvarot, albo štraf.
«Nam prapanavali albo viarnucca ŭ Biełaruś za vohnietušycielem, albo zapłacić 1000 złotych (230 jeŭra). Tak što lepš kupić zahadzia. Pa darozie ź Biełastoka — u bližejšy pierad miažoj budaŭničuju kramu — tam adździeł zapčastak. 28 złotych (6,5 jeŭra) kaštuje vohnietušyciel», — napisaŭ karystalnik pad nikam Redskin Redskin.
Što kaža zakon
U Polščy pavodle zakona ŭ lehkavym aŭtamabili abaviazkova pavinny być znak avaryjnaha prypynku i vohnietušyciel, jaki pavinien znachodzicca ŭ lohkadastupnym miescy. Aptečka pieršaj dapamohi dla zvyčajnaha lehkavoha aŭtamabila ŭ pieraliku abaviazkovaha abstalavańnia nie paznačanaja.
«Unieśli z čyrvonymi lichtarami ŭ niejki śpis»
Jašče adna tema, jakaja apošnim časam aktyŭna abmiarkoŭvajecca ŭ pamiežnych čatach, — aŭtamabili amierykanskaha pachodžańnia z čyrvonymi zadnimi pakazalnikami pavarotu. Niekatoryja kiroŭcy raspaviadajuć, što z-za hetaha ŭ ich uźnikli prablemy pry ŭjeździe ŭ Polšču.
«Mianie ŭnieśli z čyrvonymi lichtarami ŭ niejki śpis, skazali, što bolš nie prajedu», — napisaŭ Roma.
Niekatoryja kiroŭcy pryznajucca, što ich razharnuli, inšyja kažuć, što spakojna prajechali.
«Časam pišuć, što prajechali, i pišuć, što razharnuli. Suadnosiny zrazumieć niemahčyma. Ale, uličvajučy niadaŭna atrymanyja tłumačeńni, lepšym rašeńniem budzie zamiena lichtaroŭ», — ličyć udzielnik abmierkavańnia.
Što kaža zakon
Dla zadnich pakazalnikaŭ pavarotu polskija praviły ŭstanaŭlivajuć kankretnaje patrabavańnie da koleru. U dadatku № 6 da pastanovy ab techničnych umovach transpartnych srodkaŭ dla zadnich pakazalnikaŭ pavarotu paznačany koler żółta samochodowa — aŭtamabilny žoŭty.
Tamu čyrvonyja zadnija pakazalniki pavarotu, charakternyja dla niekatorych aŭtamabilaŭ amierykanskaha pachodžańnia, jak praviła, nie adpaviadajuć ustanoŭlenym u Polščy patrabavańniam.
Ciapier čytajuć
Vital z-pad Vilejki, jaki padpaliŭ chatu z ułasnymi dziećmi, zavierbavaŭsia ŭ rasijskaje vojska. I prapaŭ na pieršym ža bajavym zadańni2
Kamientary