Adklučeńnie ad Starlink zapavoliła tempy rasijskaha nastupleńnia. Ale ci nadoŭha?

Zasnavalnik hrupy Conflict Intelligence Team (CIT) Rusłan Lavijeŭ, adnak, zaklikaje stavicca da hetych paviedamleńniaŭ skieptyčna, piša «Ahientstvo».

Jon padkreślivaje, što Starlink nie byŭ asnoŭnaj sistemaj vajskova-palavoj suviazi Rasii, tamu čakać praryvu ŭkrainskich vojskaŭ z-za błakady nie varta. Pa słovach Lavijeva, asobnyja prablemy ŭ rasijskich vajskoŭcaŭ buduć, ale jany nie źjaŭlajucca krytyčnymi dla ŭsioj suviazi na froncie.

Pavodle słoŭ ananimnych vajskovych krynic, prablemy ŭ rasijskaj armii pryviali da zatrymki apracoŭki kamandaŭ i častkovaj stratehičnaj dezaryjentacyi vojskaŭ. Situacyja na niekatorych učastkach frontu apisvajecca jak «katastrofa»: kiravańnie vojskami časova paralizavana, šturmy prypynienyja, a niekatoryja hrupy zastalisia biez mahčymaści kamunikavać pamiž saboj.

Daradca Ministerstva abarony Ukrainy Siarhiej Biaskrestnaŭ adznačaje, što prablemy zakranuli i apieracyi ŭdarnych dronaŭ, a taksama evakuacyju paciarpiełych. Niekatoryja rasijskija padraździaleńni akazalisia «jak ślapyja kacianiaty», bo nie mieli dostupu da efiektyŭnaha kiravańnia vojskami.

Pavodle danych Politico, ukrainskija vajskoŭcy taksama sutykalisia z prablemami i z ułasnymi terminałami Starlink. Heta adbyvałasia z-za taho, što padraździaleńni nie svoječasova padavali śpisy na pryvatnyja terminały. Kali ŭ ich nie było aŭtaryzacyi, to heta časova parušała rabotu dronaŭ i apieracyi na froncie. Adnak situacyja pačała palapšacca: niekatoryja zabłakavanyja terminały ŭžo pracujuć i ŭkrainskija padraździaleńni čakajuć poŭnaha adnaŭleńnia ŭsich sistem.

Abmiežavańnie dostupu dla rasijskich vajskoŭcaŭ stała mahčymym paśla zvarotu Ministerstva abarony Ukrainy ŭ SpaceX. Rašeńnie było pryniata paśla taho, jak rasijskija vojski stali vykarystoŭvać spadarožnikavy internet dla kiravańnia ŭdarnymi dronami Shahed.

1 lutaha było abvieščana, što ŭkrainskija terminały Starlink buduć pracavać tolki pa aŭtaryzacyi, a niepierapravieranyja — adklučanyja. Uładalnik SpaceX Iłan Mask adznačyŭ, što hetyja miery «prynosiać svoj plon».

U internecie źjaviłasia vialikaja kolkaść paviedamleńniaŭ ad z-błohieraŭ, jakija skardzilisia na prablemy z terminałami ŭ rasijskich vojskach, častka vajenkaraŭ nazyvała Maska «fašystam». Pavodle hetych krynic, błakada Starlink najbolš mocna adbiłasia na šturmavych hrupach, pakolki jany stracili suviaź i kiravańnie na froncie.

• 8
• 0
• 0
• 0
• 0
• 0
• 0
• 0