Palitołah Alina Charysava pahadziłasia supracoŭničać z SBU. Akazałasia, heta było KDB

U efiry svajoj prahramy «Biez prykryćcia» prapahandyst Raman Pratasievič pakazaŭ videa, na jakim palitołah, ekśpiertka Ofisa Śviatłany Cichanoŭskaj i člen Kaardynacyjnaj rady Alina Charysava daje zhodu na supracoŭnictva sa Słužbaj biaśpieki Ukrainy, a paśla prademanstravaŭ vytrymki ź jaje paviedamleńniaŭ, pierasyłanych «kurataram».

Charysava adrazu pa haračych śladach vykłała ŭ fejsbuku svaju viersiju taho, što adbyłosia:

«Mnie napisali «z SBU» kala hoda tamu, u toj čas na mianie akazvaŭsia vielizarny cisk z boku KDB, maich svajakoŭ zatrymlivali, a mnie pahražali i pastajanna telefanavali. Paralelna ŭ mianie byli suicydalnyja dumki, mnie dyjahnastavali depresiju siaredniaj ciažkaści, pasadzili na tabletki.

Prykładna ŭ hety ž čas mianie źbiła mašyna z pjanym kiroŭcam… Nu, vy razumiejecie, jaki stan u mianie byŭ.

Ja była ŭ vielmi ŭraźlivym stanoviščy, kali «pradstaŭnik SBU» na praciahu niekalkich dzion uhavorvaŭ mianie pajści ź imi na kantakt, pierakonvajučy mianie, što heta robicca dla taho, kab Ukraina i biełaruskija demakratyčnyja siły naładžvali kantakt.

Praz hetyja pierakanańni ja vyjšła na suviaź. Čałaviek dziŭna pavodziŭ siabie. Ja prasiła pra vieryfikacyju: kazała, što kali jon z SBU, to vieryfikacyju možna zrabić va Ukrainie. Na što jon pahadziŭsia, a ja skazała, što da sustrečy va Ukrainie i ŭbačanaj užyvuju korački ja nie mahu havaryć ź im pra siensityŭnyja temy.

Paźniej ź jaho boku pačalisia pytańni pra ofis, pra Siarhieja, pra pierajezd. Ja nivodnaha razu nie napisała ničoha zvyš taho, što jość u pabliku / što ja ahučvała na efirach «Jeŭraradyjo». Kali ja bačyła, što pytańni pastupajuć pa spravach, jakija nijak nie tyčacca Ukrainy, ja kazała, što heta nijak nie tyčycca Ukrainy.

U bolšaści momantaŭ ja stroiła ź siabie durničku i ihnaravała paviedamleńni pa niekalki sutak, tamu što ja zrazumieła, što situacyja vielmi dziŭnaja. Ja vydalała dyjałoh dla dvuch bakoŭ, błakavała kantakt, ale jon pisaŭ z novych, telefanavaŭ pa šmat razoŭ na dzień (ja ni razu nie padniała słuchaŭku), paśla čaho zabaraniła telefanavać nie kantaktam, ale jon pisaŭ mnie i pahražaŭ raspravaj.

Na hetym momancie mnie kančatkova stała zrazumieła, z kim ja maju spravu, tamu na niepračytanych pahrozach kamunikacyja skončyłasia.

Ja pryznaju, što zrabiła kiepska, zapisaŭšy kružočak pra hatoŭnaść supracoŭničać z SBU, znachodziačysia ŭ tym stanie. Ale ja nie źliła nivodnaha słova i nivodnaha faktu.

Prapahanda ŭmieje vielmi dobra rabić siužety z haŭna i pałak. Dastatkova prydumać pryhožuju apaviadalnuju historyju i pryhoža intryhujuča ahučyć jaje.

Kali ŭ kahości zastalisia da mianie pytańni ci ličycie patrebnym mianie na palihraf zaprasić — ja adkrytaja.

Upd: Ja prypyniaju svajo supracoŭnictva ź lubymi arhanizacyjami i asabista inicyjuju pravierku ŭ svoj bok. Baču heta adzinym sposabam dakazać vam, što toje, što ja kažu — absalutnaja praŭda».

• 4
• 0
• 7
• 6
• 0
• 0
• 0
• 3