Pra što išła razmova na sustrečy Cichanoŭskaj i Starmiera

Jak paviedamlaje pres-słužba Śviatłany Cichanoŭskaj, padčas sustrečy jana padziakavała Vialikabrytanii za paśladoŭnuju padtrymku demakratyčnaj Biełarusi, niepryznańnie režymu Łukašenki i sankcyi suprać pradstaŭnikoŭ režymu.

Što abmierkavali na sustrečy:

— nieabchodnaść dalejšaj padtrymki niezaležnych miedyja i hramadzianskaj supolnaści;

— vyzvaleńnie i padtrymku palitviaźniaŭ;

— padtrymku Ukrainy i rolu demakratyčnaj Biełarusi ŭ jeŭrapiejskaj biaśpiecy;

— raźvićcio stratehičnych kansultacyj pamiž Vialikabrytanijaj i demakratyčnymi siłami;

— pytańnie adkaznaści režymu Łukašenki za złačynstvy, u tym liku ŭ kantekście vykradańnia ŭkrainskich dziaciej i mižnarodnych miechanizmaŭ pravasudździa;

— biahučuju situacyju ŭ Biełarusi i praciah represij;

— sinchranizacyju palityki Vialikabrytanii i Jeŭrasajuza pa Biełarusi, u tym liku ŭ pytańni sankcyj;

— nieabchodnaść uzdymać biełaruskaje pytańnie na mižnarodnych placoŭkach, u tym liku ŭ miežach G7 i G20 (Vialikabrytanija prymie staršynstva ŭ G20 u 2027 hodzie);

— zaležnaść režymu Łukašenki ad Rasii.

Asobna Cichanoŭskaja padkreśliła, što padtrymka demakratyčnaj Biełarusi važnaja dla biaśpieki ŭsioj Jeŭropy, u tym liku Vialikabrytanii. Jana adznačyła, što biełaruskaje hramadstva zastajecca prajeŭrapiejskim i antyvajennym, a niezaležnyja miedyja i hramadzianskaja supolnaść dapamahajuć biełarusam unutry krainy atrymlivać praŭdzivuju infarmacyju i zachoŭvać suviaź ź Jeŭropaj.

Cichanoŭskaja taksama adznačyła vyklučnuju rolu premjer-ministra Starmiera ŭ stvareńni «Kaalicyi achvotnych» u padtrymku Ukrainy. Jana padkreśliła, što demakratyčnaja Biełaruś hatovaja być častkaj mižnarodnaj padtrymki Ukrainy, bo budučynia Biełarusi i biaśpieka Ukrainy niepasredna źviazanyja.

Da taho ž, Cichanoŭskaja zaklikała Vialikabrytaniju razhledzieć mahčymaść dałučycca da Mižnarodnaha humanitarnaha fondu.

«Ja ŭdziačnaja premjer-ministru Kiru Starmieru i Vialikabrytanii za pryncypovuju pazicyju pa Biełarusi. Dla nas vielmi važna, što Łondan praciahvaje padtrymlivać biełaruskaje hramadstva i nie pryznaje lehitymnaść režymu Łukašenki.

Padtrymka demakratyčnaj Biełarusi — heta ŭkład u biaśpieku ŭsioj Jeŭropy. Biełaruś nie pavinna zastavacca ŭ cieni Rasii ci być raźmiennaj manietaj u mižnarodnych pieramovach. Biełarusy chočuć žyć u svabodnaj, niezaležnaj i jeŭrapiejskaj krainie.

Siońnia nam važna, kab partniory praciahvali padtrymlivać palitviaźniaŭ, niezaležnyja miedyja, hramadzianskuju supolnaść i ŭsich, chto zachoŭvaje suviaź Biełarusi ź Jeŭropaj», — adznačyła Cichanoŭskaja. 

• 25
• 1
• 0
• 0
• 0
• 1
• 0
• 0