Charysava raskazała, čamu paviałasia na pravakacyju KDB

Učora ŭ efiry svajoj prahramy «Biez prykryćcia» na STB prapahandyst Raman Pratasievič pakazaŭ videa, na jakim palitołah, ekśpiertka Ofisa Śviatłany Cichanoŭskaj i člen Kaardynacyjnaj rady Alina Charysava daje zhodu na supracoŭnictva sa Słužbaj biaśpieki Ukrainy, a paśla prademanstravaŭ vytrymki ź jaje paviedamleńniaŭ, pierasyłanych «kurataram» (jakimi nasamreč akazalisia supracoŭniki KDB ci inšych padobnych struktur).

Charysava adrazu pa haračych śladach vykłała ŭ fejsbuku svaju viersiju taho, što adbyłosia, siońnia jana dapoŭniła svaje tłumačeńni.

«Nievialikaje abnaŭleńnie, kab zakryć niekalki dadatkovych pytańniaŭ. I dać kamientary paśla poŭnaha detalovaha prahladu videa.

1. Mnie nie prapanoŭvali apłatu, ja nie pradavałasia, ja ničoha nie brała. Heta vydumka dziela siužetu.
2. Kali vy prysłuchajeciesia da aŭdyjazapisaŭ u videa, stanie zrazumieła, što tam zhienieravana niejrasietkaj 3 z 4. Čaćviortaje — ahulnaja infarmacyja, jakaja była ahučana vialikaj kolkaściu ludziej dzie tolki možna i dzie nielha.
3. U skrynšotach ja naŭmysna chłusiła abo pieraklučała temu: ja chłusiła pra adsutnaść płanaŭ pierajezdu ź Litvy, pieraklučała temu z Karyma (majecca na ŭvazie Karym Piedersen — kiraŭnik adździeła mižnarodnych kamunikacyj Ofisa. — NN) na toje, što my možam havaryć na adnoj movie, uchilałasia ad pramych adkazaŭ pra Siarhieja (majecca na ŭvazie Siarhiej Cichanoŭski. — NN) da taho, što było ŭ publičnym dyskursie. Kali mianie spytajuć maje siabry abo prosta vypadkovy čałaviek napiša mnie ŭ asabistyja z farmuloŭkami hetych pytańniaŭ — heta toje, što ja mahu dazvolić sabie napisać u adkaz. U dalejšaj publičnaj kamunikacyi ja prajdusia pa kožnym skrynšocie detalova, jak i padčas pravierki.
4. Z usiaho, što ŭ ich na mianie jość — heta hety čortaŭ kružok, i jany ź jaho zrabili ceły siužet (majecca na ŭvazie videa, dzie Charysava kaža, što pahadžajecca na supracu z SBU. — NN).
5. Zhadžacca na supracoŭnictva ź lubymi śpiecsłužbami — drenna, tak. Ale ja ŭ toj momant nie ŭspryniała heta jak zhodu na supracoŭnictva. Heta čortaŭ kružok. Mianie nie ŭhavaryli ničoha padpisvać.
6. Jany viali ŭ toj momant hulniu na dvuch frantach. Cisnuli na mianie z boku KDB, łavili maich svajakoŭ navat u balnicach, vyvodzili ich da siabie ŭ mašyny, telefanavali mnie z telefonaŭ majoj radni, jakuju zatrymali, prymušajučy adkazać na paviedamleńnie ad KDB ź ich ža telefonaŭ. Paralelna pisali mnie z hetaha akaŭnta «nibyta SBU», prapanoŭvajučy dapamohu i padkazvajučy, jak siabie pavodzić sa śpiecsłužboŭcami ŭ situacyi takoj masiravanaj ataki. U momant, kali nichto nie moža dapamahčy, a ty prosta chočaš vyratavać žyćci ludziej unutry krainy, heta stała majoj balučaj kropkaj.
7. Prapanova zapisać kružok pastupiła ŭ pačatku kamunikacyi. Uzamien mnie paabiacali skazać, što rabić z hebnioj, kab ad mianie adčapilisia, a taksama paviedamić niešta z unutranaj infarmacyi ŭkrainskaha boku, što budzie nam karysna. Ni pra jaki śliŭ danych z majho boku na toj momant havorki nie išło.
8. Jany kažuć, što ja pieradavała im skrynšoty z zakrytych čataŭ, danyja pra vałancioraŭ i h.d. Ale ja nie pieradavała im NIČOHA takoha. NIVODNAHA DOKAZU jany nie zmahli i nie zmohuć pradstavić. Kali, viadoma, taksama niešta nie zhienierujuć».

• 9
• 0
• 3
• 10
• 2
• 1
• 1
• 0