Харысава расказала, чаму павялася на правакацыю КДБ

Учора ў эфіры сваёй праграмы «Без прыкрыцця» на СТБ прапагандыст Раман Пратасевіч паказаў відэа, на якім палітолаг, экспертка Офіса Святланы Ціханоўскай і член Каардынацыйнай рады Аліна Харысава дае згоду на супрацоўніцтва са Службай бяспекі Украіны, а пасля прадэманстраваў вытрымкі з яе паведамленняў, перасыланых «куратарам» (якімі насамрэч аказаліся супрацоўнікі КДБ ці іншых падобных структур).

Харысава адразу па гарачых слядах выклала ў фэйсбуку сваю версію таго, што адбылося, сёння яна дапоўніла свае тлумачэнні.

«Невялікае абнаўленне, каб закрыць некалькі дадатковых пытанняў. І даць каментары пасля поўнага дэталёвага прагляду відэа.

1. Мне не прапаноўвалі аплату, я не прадавалася, я нічога не брала. Гэта выдумка дзеля сюжэту.
2. Калі вы прыслухаецеся да аўдыязапісаў у відэа, стане зразумела, што там згенеравана нейрасеткай 3 з 4. Чацвёртае — агульная інфармацыя, якая была агучана вялікай колькасцю людзей дзе толькі можна і дзе нельга.
3. У скрыншотах я наўмысна хлусіла або пераключала тэму: я хлусіла пра адсутнасць планаў пераезду з Літвы, пераключала тэму з Карыма (маецца на ўвазе Карым Педэрсэн — кіраўнік аддзела міжнародных камунікацый Офіса. — НН) на тое, што мы можам гаварыць на адной мове, ухілялася ад прамых адказаў пра Сяргея (маецца на ўвазе Сяргей Ціханоўскі. — НН) да таго, што было ў публічным дыскурсе. Калі мяне спытаюць мае сябры або проста выпадковы чалавек напіша мне ў асабістыя з фармулёўкамі гэтых пытанняў — гэта тое, што я магу дазволіць сабе напісаць у адказ. У далейшай публічнай камунікацыі я прайдуся па кожным скрыншоце дэталёва, як і падчас праверкі.
4. З усяго, што ў іх на мяне ёсць — гэта гэты чортаў кружок, і яны з яго зрабілі цэлы сюжэт (маецца на ўвазе відэа, дзе Харысава кажа, што пагаджаецца на супрацу з СБУ. — НН).
5. Згаджацца на супрацоўніцтва з любымі спецслужбамі — дрэнна, так. Але я ў той момант не ўспрыняла гэта як згоду на супрацоўніцтва. Гэта чортаў кружок. Мяне не ўгаварылі нічога падпісваць.
6. Яны вялі ў той момант гульню на двух франтах. Ціснулі на мяне з боку КДБ, лавілі маіх сваякоў нават у бальніцах, выводзілі іх да сябе ў машыны, тэлефанавалі мне з тэлефонаў маёй радні, якую затрымалі, прымушаючы адказаць на паведамленне ад КДБ з іх жа тэлефонаў. Паралельна пісалі мне з гэтага акаўнта «нібыта СБУ», прапаноўваючы дапамогу і падказваючы, як сябе паводзіць са спецслужбоўцамі ў сітуацыі такой масіраванай атакі. У момант, калі ніхто не можа дапамагчы, а ты проста хочаш выратаваць жыцці людзей унутры краіны, гэта стала маёй балючай кропкай.
7. Прапанова запісаць кружок паступіла ў пачатку камунікацыі. Узамен мне паабяцалі сказаць, што рабіць з гэбнёй, каб ад мяне адчапіліся, а таксама паведаміць нешта з унутранай інфармацыі ўкраінскага боку, што будзе нам карысна. Ні пра які сліў даных з майго боку на той момант гаворкі не ішло.
8. Яны кажуць, што я перадавала ім скрыншоты з закрытых чатаў, даныя пра валанцёраў і г.д. Але я не перадавала ім НІЧОГА такога. НІВОДНАГА ДОКАЗУ яны не змаглі і не змогуць прадставіць. Калі, вядома, таксама нешта не згенеруюць».

• 9
• 0
• 3
• 10
• 2
• 1
• 1
• 0