Cichanoŭskaja: Płan «Pieramoha» byŭ pamyłkaj

«Ja nie nazavu nijakich takich hłabalnych palityčnych pamyłak, bo my pracavali ŭ vielmi abmiežavanaj prastory, i nichto nikoli nie viedaje, što budzie pamyłkaj, što — nie, kali ty heta nie pasprabuješ», — zajaviła biełaruskaja demakratyčnaja lidarka Śviatłana Cichanoŭskaja 7 lutaha ŭ Varšavie, adkazvajučy na pytańni padčas słuchańniaŭ u Kaardynacyjnaj radzie, paviedamlaje «Pozirk».

Razam z tym palityk nazvała pamyłkaj płan «Pieramoha» (stvareńnie sietki aktyvistaŭ, jakija ŭ peŭny momant atrymali b instrukcyju dla aktyŭnych dziejańniaŭ suprać režymu Alaksandra Łukašenki). Palityk kanstatavała, što na hety płan «było ŭskładziena šmat čakańniaŭ», ale jany nie spraŭdzilisia.

Siarod «palityčnych ci hramadskich» pamyłak Cichanoŭskaja nazvała toje, što, «mahčyma, niedapracavali ź litoŭskim hramadstvam».

«My dumali, što litoŭcy ŭsio viedajuć, litoŭcy ŭsio razumiejuć, i tyja naratyvy, jakija prasoŭvajuć niekatoryja parłamientaryi i ŭzmacniajucca prapahandysckimi naratyvami, nie pracujuć. A jany ŭvieś hety čas pracavali», — adznačyła demlidar.

Pavodle jaje słoŭ, naratyŭ pra tak zvany «lićvinizm» staŭsia pryčynaj taho, što «litoŭcy ŭ Litvie pačali stavicca da biełarusaŭ kryšku niehatyŭna».

«My, kaniešnie, uvieś hety čas sprabavali heta vyraŭniać, pravodzili šmatlikija i kruhłyja stały, i kansultacyi, i publična vystupali ŭ miedyja. Ale ž nie chapiła našych resursaŭ, kab zmahacca z hetaj vialikaj prapahandycskaj mašynaj», — pryznała palityk.

Jašče adnoj pamyłkaj, «za jakuju nie adkaznyja palityčnyja struktury», Cichanoŭskaja ličyć toje, što ŭ biełaruskim hramadskim ruchu niekatoryja dyskusii stanoviacca publičnymi svarkami. Heta, pavodle jaje mierkavańnia, upłyvaje na ahulny nastroj, bo «bolš uvahi kancentrujecca vakoł niejkich tam drobnych kanfliktaŭ pamiž arhanizacyjami ci asobami».

«My hublajem fokus. I, viadoma, ja chacieła b, kab my nie hublali našuju metu i kancentravali našu enierhiju nie vakoł sprečak, a vakoł pracy», — padsumavała demlidar.

Pra stvareńnie płana «Pieramoha» stała viadoma ŭ 2021 hodzie. Udzielnikam płana, jakija chočuć praciahvać baraćbu z režymam Łukašenki, abjadnańnie «Bajpoł» abiacała razasłać mabilizacyjnyja pradpisańni pra kankretnyja dziejańni. Mierkavałasia, što pratesty ŭ ramkach płana buduć nasić aktyŭny charaktar. U žniŭni 2025 hoda «Bajpoł» abviaściła pra zakryćcio płana da «asobnaha rasparadžeńnia».

• 24
• 1
• 6
• 20
• 1
• 6
• 0
• 0