«Jon jašče svajo słova skaža». Cichanoŭskaja — pra Cichanoŭskaha
Śviatłana Cichanoŭskaja ŭ «Studyi Biełsat» prakamientavała toje, što jak muž Siarhiej Cichanoŭski ciapier u Złučanych Štatach razam ź dziećmi, i adkazała na čutki, što jahony adjezd nibyta byŭ źviazany z žadańniem nie pieraškadžać jaje palityčnaj pracy.
Pavodle Śviatłany Cichanoŭskaj, takaja viersija nie adpaviadaje rečaisnaści. Jana adznačyła, što Siarhiej Cichanoŭski sapraŭdy płanavaŭ pajechać u ZŠA, kab vyvučać anhielskuju movu i bolš pracavać ź biełaruskaj dyjasparaj. Kančatkovaje rašeńnie ab tym, što dzieci pajeduć razam ź im, było pryniataje z ulikam siamiejnych abstavin.
«Ja była ŭ padviešanym stanie: ci zastavacca, ci pierajazdžać ź Vilni, bo dzieci chadzili ŭ škołu, i vyryvać ich z navučalnaha pracesu było składana. Siarhiej prapanavaŭ, što dzieci časova pabuduć ź im. Bolš za toje, jon nie bačyŭ ich piać hadoŭ. Jon chacieŭ znoŭ pryvyknuć da dziaciej, naładzić ź imi stasunki», — skazała jana.
Demakratyčnaja lidarka dadała, što ŭdziačnaja mužu za takoje rašeńnie, bo inakš pierajezdy byli b značna ciažejšymi, asabliva ź dziećmi. Pavodle jaje, jany razmaŭlajuć kožny viečar, a jana praciahvaje dapamahać dzieciam z vučobaj.
Taksama Cichanoŭskaja viarnułasia da svaich słoŭ 2020 hoda, kali padčas zboru podpisaŭ za jejnuju kandydaturu jana zajaŭlała, što ludzi iduć nie da jaje, a da Siarhieja Cichanoŭskaha jak lidara. Jana kaža, što za minułyja piać hadoŭ nabyła ŭłasny dośvied, adnak jaje pazicyja adnosna roli muža nie źmianiłasia.
«Siarhiej zastajecca lidaram. Jon dla mianie toj čałaviek, jaki adkryŭ Novuju Biełaruś, adkryŭ pačućci, jakich ja nie adčuvała da taho, jak jon źjaviŭsia na ekranach. Dla mianie jon vialiki hieroj — taksama, jak Maryja Kaleśnikava i Viktar Babaryka», — adznačyła jana.
Pavodle Cichanoŭskaj, ludzi paśla turmy mohuć być razhublenymi i viartacca da łohiki 2020 hoda, dapuskajučy pamyłki, adnak «usio možna zrazumieć i zaŭsiody treba davać druhi šaniec».
«Ciapier tak skłalisia abstaviny, što jon nie moža być pobač. Ale jon zastajecca tym samym Siarhiejem Cichanoŭskim, jaki zapaliŭ ahoń u sercach ludziej. I jon jašče svajo słova skaža», — adznačyła Śviatłana Cichanoŭskaja.
Ciapier čytajuć
Voś chto toj chłopiec, jaki pajechaŭ na prapołku bulby i staŭ hierojem sacsietak6
Kamientary