U Efiopii paśla niekalkich hadoŭ pierapynku znoŭ razharajecca poŭnamaštabnaja hramadzianskaja vajna. Moža destabilizavacca i ŭvieś rehijon
U stalicy Efiopii Adys-Abiebie ŭ noč na čaćvier prahrymieła niekalki vybuchaŭ. Miascovyja žychary i zamiežnyja dypłamaty paviedamili, što čuli ich u rajonie hienieralnaha štaba na zachadzie horada, a taksama ŭ paŭdniovych rajonach stalicy, piša Bi-bi-si.
Pradstaŭnik adnaho z uzbrojenych farmavańniaŭ na poŭnačy krainy zajaviŭ Reuters, što ŭ stalicy mahli vybuchnuć bieśpiłotniki, zapuščanyja ŭzbrojenaj apazicyjaj. Adnak ułady Efiopii nie paviedamlali ni pra pryčyny vybuchaŭ, ni pra miescy ich dakładnaha adbyćcia, ni pra mahčymych paciarpiełych i razbureńni.
Napiaredadni ŭłady ŭviali zabaronu na paloty lubych bieśpiłotnikaŭ nad Adys-Abiebaj.
Vybuchi adbylisia na fonie novaha abvastreńnia ŭzbrojenaha kanfliktu na poŭnačy Efiopii. Kala tydnia tamu ŭ rehijonie Tyhraj i susiednich rajonach adnavilisia bai pamiž efijopskaj armijaj i miascovymi ŭzbrojenymi farmavańniami.
U žniŭni siem uzbrojenych hrupovak, u tym liku Narodny front vyzvaleńnia Tyhraja, jaki kantraluje rehijon Tyhraj, i amcharskaje apałčeńnie Fano, stvaryli aljans. Jany zajavili pra namier zrynuć ciapierašni centralny ŭrad.
Baki pa-roznamu apisvajuć pačatak novych bajavych dziejańniaŭ. Narodny front vyzvaleńnia Tyhraja śćviardžaje, što byŭ vymušany adkazać na nastupleńnie ŭradavych sił i ich ataki bieśpiłotnikami. Urad Efiopii, u svaju čarhu, zajaŭlaje, što bajavyja dziejańni pačali tyhrajskija farmavańni, zachapiŭšy aeraporty ŭ rehijonie.
Takim čynam, abiedźvie storany abvinavačvajuć adna adnu ŭ parušeńni mirnaha pahadnieńnia 2022 hoda, jakoje pakłała kaniec dvuchhadovaj vajnie ŭ Tyhrai. Pavodle acenki Afrykanskaha sajuza, u vyniku toj vajny zahinuli kala 600 tysiač čałaviek.
Pavodle dastupnaj infarmacyi, ciapier efiopskaje vojska i praŭradavyja ŭzbrojenyja farmavańni prasoŭvajucca ŭ bok Mekele — stalicy Tyhraja. Miedyk z horada Ałamata na poŭdni rehijona paviedamiŭ Bi-bi-si, što za try dni bajoŭ tam zahinuli 52 mirnyja žychary.
Bai taksama iduć u susiednim rehijonie Afar. Praź jaho prachodziać asnoŭnyja naziemnyja šlachi z Efiopii da Džybuci i jaho partoŭ. Pavodle acenki surazmoŭcy ahienctva AFP z humanitarnaj arhanizacyi, u Afary dziasiatki tysiač ludziej byli vymušanyja pakinuć svaje damy.
Na zachadzie krainy, u rehijonie Amchara, efiopskaje vojska viadzie bai z hrupoŭkaj Fano kala horada Łalibeła. Jon viadomy vysiečanymi ŭ skałach cerkvami, uklučanymi ŭ śpis suśvietnaj spadčyny JUNIESKA. Praz bajavyja dziejańni zamiežnyja turysty ŭžo bolš za tydzień nie mohuć pakinuć Łalibełu.
Efiopija taksama abvinavačvaje susiedniuju Erytreju ŭ padtrymcy paŭnočnych uzbrojenych hrupovak. Kamandzir adnaho z praŭradavych farmavańniaŭ zajaviŭ BBC, što ŭ bajach u Tyhrai ŭdzielničajuć erytrejskija vajskoŭcy.
Ministr infarmacyi Erytrei Jemane Hiebremeskiel hetyja abvinavačańni adchiliŭ. Jon, u svaju čarhu, zajaviŭ, što ŭrad Efiopii vykarystoŭvaje susiednija krainy jak vinavatych, kab adciahnuć uvahu ad unutranych kanfliktaŭ. U papiaredniaj vajnie ŭ Tyhrai Erytreja vystupała sajuźnicaj Efiopii i vajavała suprać Narodnaha frontu vyzvaleńnia Tyhraja.
Paśla hetaha adnosiny pamiž Efiopijaj i Erytrejaj znoŭ pahoršylisia, u tym liku praz zajavy premjer-ministra Efiopii Abija Achmieda pra nieabchodnaść atrymać ułasny vychad da mora.
Efiopija straciła niepasredny vychad da mora paśla taho, jak Erytreja stała niezaležnaj u 1993 hodzie. Abij Achmied zajaŭlaje, što marski port nieabchodny Efiopii, i raniej namiakaŭ na mahčymaść siłavoha ŭstalavańnia kantrolu nad erytrejskim portam Aseb, raźmieščanym prykładna za 60 kiłamietraŭ ad miažy.
Ciapier čytajuć
U biełaruski ŭ Italii zabrali dvuch synoŭ — bo jana nie pryznavała dziaržavu i nie adpuskała dziaciej u škołu i da doktara9
Kamientary