Vaha paŭnočnakarejskaha lidara pieravysiła 140 kiłahramaŭ.
Lidar Paŭnočnaj Karei pakutuje ad «krajniaj stupieni atłuścieńnia» i maje vysokuju ryzyku sardečna-sasudzistych zachvorvańniaŭ, paviedamlaje AFP sa spasyłkaj na paŭdniovakarejskuju raźviedku.
Pra apošniuju acenku stanu zdaroŭja Kim Čen Yna raskazaŭ deputat parłamienta Paŭdniovaj Karei Jun Kon Jon.
«Jaho stan zdaroŭja kłasifikujecca jak krajniaja stupień atłuścieńnia, vaha pieravyšaje 140 kiłahramaŭ», — paviedamiŭ jon sa spasyłkaj na Nacyjanalnuju raźviedvalnuju słužbu.
Pavodle raźviedki, u Kima vysokaja ryzyka raźvićcia sardečna-sasudzistych zachvorvańniaŭ. Adnak jon nie maje zaŭvažnych ciažkaściaŭ ź fizičnaj aktyŭnaściu i, u pryvatnaści, moža ŭźbiahać pa leśvicy.
«Z ulikam pastajannaha nazirańnia z boku asabistaj miedycynskaj kamandy ličycca, što prablem sa zdaroŭjem niama», — dadaŭ deputat.
Stan zdaroŭja kiraŭnika KNDR pilna adsočvajuć za miažoj: jaho raptoŭnaja śmierć moža vyklikać pytańni nakont pieradačy ŭłady i stabilnaści ŭ krainie ź jadziernaj zbrojaj.
Čutki pra ciažkuju chvarobu Kim Čen Yna ŭžo ŭźnikali ŭ 2020 hodzie, kali jon prapuściŭ uračystaści z nahody dnia naradžeńnia svajho dzieda Kim Ir Siena i amal na 20 dzion źnik z publičnaj prastory.
Baćka i dzied paŭnočnakarejskaha lidara taksama mieli lišniuju vahu i šmat palili. Abodva pamierli ad sardečnych prystupaŭ.
Były supracoŭnik hatela Metropole u Chanoi Poł Smart, jaki padčas samitu KNDR i ZŠA ŭ 2019 hodzie pracavaŭ z asabistymi kucharami Kima, raskazvaŭ, što paŭnočnakarejski lidar lubić ikru, amaraŭ, fua-hra.
Ciapier čytajuć
Aryštavany sienatar Karpicki, hałoŭny doktar Bresckaj abłasnoj balnicy13
Kamientary