Skarynaŭskaj biblijatecy ŭ Łondanie biełaruski miecenat padaryŭ 15 karcin Ćvirki, Ždanava i Klinava
Biełaruski kalekcyjanier z ZŠA Iosif Levitan pieradaŭ biblijatecy 13 tvoraŭ kłasika nacyjanalnaha piejzaža Vitala Ćvirki i pa adnoj pracy pradstaŭnikoŭ biełaruskaha mastackaha andehraŭndu Alaksieja Ždanava i Artura Klinava.
Novaja kalekcyja achoplivaje niekalki važnych płyniaŭ biełaruskaha žyvapisu kanca XX stahodździa — ad kłasičnaha piejzaža da postavanhardu 1980-ch.
Asnovu zboru składajuć 12 piejzažaŭ Vitala Ćvirki, napisanych u 1970‑ia — pačatku 1980‑ch hadoŭ, i adzin jaho naciurmort. Mastak viadomy asablivym pohladam na biełaruski krajavid.
Ćvirka byŭ narodnym mastakom Biełarusi, rektaram Biełaruskaha teatralna-mastackaha instytuta i staršynioj Sajuza mastakoŭ Biełarusi. Bolšaść jaho rabot zachoŭvajecca ŭ Nacyjanalnym mastackim muziei.
Jašče dva pałotny pradstaŭlajuć novuju biełaruskuju płyń kanca 1980-ch.
Karcina Alaksieja Ždanava «Mutanty. Siamja IV» była stvoranaja ŭ 1989 hodzie. Ždanaŭ naležaŭ da biełaruskaha nieaficyjnaha mastactva, udzielničaŭ u hrupach «Pluralis», «Forma» i «Korvus Cekus». Svaju sieryju pra mutantaŭ jon tłumačyŭ jak adlustravańnie hramadskaj mutacyi, jakaja pačałasia paśla revalucyi 1917 hoda.
Artur Klinaŭ pradstaŭleny rańniaj pracaj «Piejzaž z trubami», taksama napisanaj u 1989 hodzie. Heta redki prykład ekspresijanisckaha pieryjadu mastaka, jaki paźniej pierajšoŭ da instalacyj, sac-artu, fatahrafii, litaratury i kino.
Abiedźvie karciny — Ždanava i Klinava — ekspanavalisia ŭ 1989 hodzie na Pieršaj respublikanskaj vystavie nietradycyjnaha mastactva «Panarama» ŭ zakinutym domie na minskaj vulicy Handlovaj. Paśla ich pakazvali na vystavach novaha ŭschodniejeŭrapiejskaha mastactva ŭ Amsterdamie.
Inšyja tvory sa svajoj kalekcyi Iosif Levitan pieradaŭ muziejam ZŠA i arhanizacyi biełaruskaj dyjaspary ŭ Amierycy.
Usie 15 karcin ciapier možna ŭbačyć u Skarynaŭskaj biblijatecy ŭ Łondanie.
«Bulba» z Oršy pajšoŭ vajavać za Rasiju — ciapier siastra šukaje jaho ci chacia b jaho pareštki9
Kamientary