Palitviaźnia ź invalidnaściu Uładzimira Hundara pieraviali z turmy ŭ kałoniju. Paśla turemnaha terminu jamu zastajecca jašče 13 hadoŭ
Jak stała viadoma ad infarmavanaj krynicy, u pačatku kastryčnika palitviaźnia Uładzimira Hundara pieravieźli dla adbyćcia dalejšaha pakarańnia z mahiloŭskaj turmy № 4 u babrujskuju kałoniju № 2, piša «Svaboda».
U hetaj kałonii Uładzimir Hundar užo adbyvaŭ pakarańnie raniej, ale ŭ kastryčniku 2023 hodu sud pryznačyŭ palitviaźniu bolš strohi, turemny režym i jaho adpravili ŭ mahiloŭskuju viaźnicu. Ciapier trochhadovy termin skončyŭsia. Ale, pavodle prysudu, za kratami Hundaru zastavacca jašče 13 hadoŭ.
Aktyvista i krajaznaŭcu z Baranavičaŭ Uładzimira Hundara zatrymali 30 śniežnia 2020 hodu ŭ «spravie Aŭtuchoviča» — nibyta za padrychtoŭku teraktu. U 2023 hodzie ŭ vyniku dvuch sudoŭ pavodle čatyroch artykułaŭ Kryminalnaha kodeksu palitviaźnia asudzili ahułam na 20 hadoŭ źniavoleńnia.
U turmie Uładzimir Hundar pačaŭ pisać vieršy
Zdolnaść da paezii była i raniej, ale vyjaviłasia ŭ niavoli praz asabliva składanyja abstaviny, razvažaje surazmoŭca «Svabody».
«Raniej jon dapamahaŭ baranavickim paetam publikavać svaje tvory, rabiŭ makiety knih, rychtavaŭ ich da druku, ale sam vieršaŭ nie pisaŭ, a voś u viaźnicach pačaŭ», — zhadała krynica. Vieršy ad Hundara dachodzili na volu rehularna, adnak try hady tamu, kali palitviazień patrapiŭ u mahiloŭskuju turmu, heta spyniłasia.
U apošnija miesiacy ŭ mahiloŭskaj turmie, pavodle krynicy, palitviazień šmat čytaŭ, zapisvaŭ svaje ŭražańni paśla turemnych prahułak, dzialiŭsia pačućciami.
«U krai majoj niavoli jaskravaj vosieni soniečnaść źmianiłasia chałodnaj chmurnaściu. Nieba zaviesili chmary sivyja, iduć chałodnyja daždžy, a žyćcio haryć u połymi času. I majo žyćcio ŭ niavoli, pazbaŭlenaje kalarovaj pryhažości, zharaje ŭ niavolnickim połymi», — niadaŭna napisaŭ Uładzimir Hundar u liście ź viaźnicy.
Čamu ŭ spravie Hundara asabliva važny faktar — zdaroŭje
Uładzimir Hundar maje invalidnaść druhoj hrupy, u mužčyny amputavanaja naha vyšej kalena. U viaźnicach Hundaru zabaraniajuć karystacca pratezam, jon pierasoŭvajecca na mylicach. Padčas zaniavoleńnia ŭ haradzienskaj turmie № 1 Uładzimir Hundar mieŭ prablemy sa słycham, ciapier u jaho tryvała padvyšany cisk.
«Bolš stała baleć śpina, navat dazvolili dasłać abiazbolvajučyja ŭkoły», — taksama paviedamlała krynica pra stan zdaroŭja Hundara.
Uładzimiru Hundaru 66 hadoŭ. Pravaabaroncy ŭklučyli Hundara ŭ śpis 170 palitviaźniaŭ, jakija pavodle zdaroŭja znachodziacca ŭ asabliva ŭraźlivym stanie i damahajucca jaho najraniejšaha vyzvaleńnia.
Ciapier čytajuć
Rasijski repier Jahor Kryd źniaŭsia ŭ majcy z vyjavaj hieroja filma «Idzi i hladzi», jakomu damalavali pirsinh i tatuiroŭki. Cišotku vypuścili krama biełaruski1010
Kamientary