Rasijskich ahientaŭ padazrajuć u praniknieńni ŭ damy finskich deputataŭ. U adnaho pakinuli ekskremienty
Kala 20 finskich parłamientaryjaŭ paviedamili pra zahadkavyja praniknieńni ŭ ich damy. Ničoha nie źnikała, ale nieviadomyja pakidali vyraznyja ślady svajoj prysutnaści. U adnym vypadku — ekskremienty ŭ prybiralni. Finskija palityki padazrajuć, što tak rasijskija śpiecsłužby sprabujuć ich zapałochać. Pra mahčymuju apieracyju rasijskich śpiecsłužbaŭ piša The Telegraph.
Siarod tych, chto źviazvaje zdareńni z Rasijaj, — vieteran finskaj palityki, deputat ad kiroŭnaj Nacyjanalnaj kaalicyjnaj partyi Ben Ziuskovič.
«Heta sposab rasijskaj raźviedki pakazać, što za ludźmi sočać, sposab pasiejać razhublenaść i tryvohu», — zajaviŭ jon.
Pavodle finskaha Yle, pra padazronyja vypadki paviedamili kala 20 deputataŭ. Śladoŭ uzłomu ŭ ich damach nie znajšli, ničoha nie było skradziena abo paškodžana. Adnak haspadary zaŭvažali adčynienyja dźviery, uklučanaje śviatło i inšyja prykmiety taho, što ŭ pamiaškańniach niechta pabyvaŭ.
U adnym z damoŭ nieviadomy pakinuŭ ekskremienty ŭ prybiralni.
Takija dziejańni mohuć być svojeasablivaj «vizitoŭkaj»: achviary dajuć zrazumieć, što śpiecsłužby zdolnyja niezaŭvažna praniknuć u jaje žyllo ŭ luby momant.
Rasijskija śpiecsłužby i raniej vykarystoŭvali padobnyja mietady suprać dypłamataŭ i žurnalistaŭ. Ahienty pranikali ŭ kvatery, pierastaŭlali asabistyja rečy, adčyniali vokny, zavodzili budzilniki, a taksama mačylisia ci pakidali ekskremienty ŭ prybiralniach.
U 2023 hodzie The Wall Street Journal paviedamlała, što supracoŭnik FSB sparažniŭsia ŭ valizku vysokapastaŭlenaha amierykanskaha čynoŭnika padčas jaho pajezdki ŭ Rasiju.
Byłaja karespandentka BBC u Rasii Sara Rejnsfard taksama pisała va ŭspaminach, što ahienty pranikli ŭ jaje kvateru i pakinuli ŭ kožnaj prybiralni «vialikija sparažnieńni».
Žurnalist The Guardian Luk Hardynh raskazvaŭ, što supracoŭniki FSB rehularna ŭryvalisia ŭ jaho maskoŭskuju kvateru. Adnojčy jany pakinuli tam dapamožnik seksu. U 2011 hodzie žurnalista vysłali z Rasii.
Hetaja taktyka biare pačatak jašče z časoŭ chałodnaj vajny. Saviecki KDB vykarystoŭvaŭ «apieratyŭnuju psichałohiju», kab prymusić čałavieka adčuvać siabie biezabaronnym i sumniavacca va ŭłasnym usprymańni realnaści.
Padobnyja mietady šyroka ŭžyvała ŭschodnieniamieckaja Štazi. Jaje supracoŭniki mahli źniać karcinu sa ściany, zamianić adzin hatunak harbaty na inšy abo pakinuć niezvyčajny pradmiet. Metaj było nie naniasieńnie materyjalnaj škody, a psichałahičny cisk.
Vypadki adbyvalisia na praciahu minułaha hoda. Palicyja Chielsinki viadzie papiaredniaje rasśledavańnie.
Rasśledavańnie idzie za paŭhoda da parłamienckich vybaraŭ — na fonie aściaroh, što Kreml moža pasprabavać paŭpłyvać na ich abo arhanizavać dyviersii ŭ krainie, jakaja paśla rasijskaha ŭvarvańnia va Ukrainu ŭstupiła ŭ NATA.
Kamientary
- Bolšie vsieho ludi bojatsia nieponiatnoho!