Biełarusy ŭ Varšavie da narodzinaŭ lehiendarnaha fatohrafa Johnny Cosmic adkryli vystavu bieź jaho viedama, kab padziakavać za pracu
«Ja kažu, što vam buduć padarunki. I ŭsie napružvajucca», — apisvaje svaju pracu biełaruski fatohraf Johnny Cosmic (Ivan Smalar). Jahonaja vystava adkryłasia ŭ Varšaŭskaj Community Cup 3 lutaha. Dla samoha Ivana, jaki šmat hadoŭ fatahrafuje biełarusaŭ na viečarynach i inšych padziejach, a paśla doryć im zdymki, vystava akazałasia siurpryzam. Hetak ludzi vykazali svaju padziaku da dnia naradžeńnia fatohrafa. Johnny Cosmic raskazaŭ «Ranicy z «Biełsatam» pra svaju pracu, a ŭdzielniki imprezy, za što ŭdziačnyja jamu.
«Prosta ŭ niejki momant na Zybickaj [vulica z barami, kłubami i restaranami ŭ Miensku] źjaviŭsia čuvak, jaki da ciabie padychodziŭ i addavaŭ tabie razdrukavanuju fotku. I ty taki: «Vaŭ!», — raspaviadaje trenier Andrej Tkačoŭ, jak Johnny Cosmic staŭsia viadomym u Miensku.
Sam Johnny Cosmic kaža «Biełsatu», što dla jaho fatahrafija — heta sposab skazać ludziam dziakuj.
«Ja kažu, što vam buduć padarunki. I ŭsie napružvajucca: «Što? Jakija padarunki? Navošta?». A heta ŭsiaho tolki fatahrafija», — kaža fatohraf.
Johnny Cosmic dzielicca, što razdaŭ užo tysiačy zdymkaŭ.
«Usie my, ludzi, chodzim adnymi i tymi ž darohami i pa tych ža miescach. Možna ž čałavieka sfatahrafavać, a potym padaryć jamu fatahrafiju, bo my dakładna ŭbačymsia», — kaža surazmoŭca.
Fatahrafii mohuć znajści svaich uładalnikaŭ navat praz hady. Paet i viadoŭca Mikita Najdzionaŭ kaža, što niadaŭna atrymaŭ svaju fatahrafiju, jakaja była zroblenaja jašče ŭ 2021 hodzie.
«Byli navat rekordy. Voś u 2020 hodzie ja sustreŭ znajomaha z žonkaju. Ja ich sfotkaŭ i nastupny raz ja ich ubačyŭ praź piać hadoŭ na kancercie Słavy Kamisaranki. Kłasna? Kłasna!» — kaža Johnny Cosmic.
Što tyčycca pracesu, to fatahrafavać nieznajomcaŭ zusim nie strašna, dzielicca fatohraf.
«Časam pa čałavieku adrazu vidać, možna jaho fatahrafavać ci nie, — kaža Johnny Cosmic. — Ludzi časta ździŭlajucca, jak ty pamiataješ, kali ty kaho fatahrafavaŭ, dzie lažyć hetaja fatahrafija. A dla mianie heta ŭvohule nie składana. Ja čamuści realna pamiataju, dzie my bačylisia, dzie lažyć fatahrafija. U mianie jość žart, što heta nazyvajecca fatahrafičnaja pamiać. Ale za ŭvieś čas było šeść čałaviek, kali ja pierabłytaŭ».
U Minsku ŭ fatohrafa zastałosia jašče bahata fatahrafij. Było b vydatna sieści sa skryniaj la Pałaca mastactvaŭ na vulicy Kazłova ŭ Minsku i razdavać ludziam «pryvitańni ź minułaha», adznačaje Johnny Cosmic.
Za hetuju pracu ludzi i nadumali padziakavać fatohrafu, zładziŭšy vystavu, što pieratvaryłasia ŭ vialikuju viečarynu.
«Mnie zdajecca, my ŭ emihracyi troški zabyvajemsia, jakija my vialikija. My horbimsia i fizična, i maralna, i zabyvajemsia, jakija my talenavityja i vialikija. I chočacca, kab jon uspomniŭ, jaki jon vialiki majstar, jaki jon maestra. Chočacca, kab jon vyprastaŭsia i palacieŭ dalej», — zaklučaje aśvietnica na temu hiendarnaj roŭnaści i viadoŭca YouTube-šou «Obyčnoje utro» Maryna Mientusava.
U Minsku adbylisia masavyja zatrymańni vydaŭcoŭ i kniharaspaŭsiudnikaŭ33
Kamientary