Pry naviedvańni Kitaja budźcie aściarožny z seksam. Vas mohuć zdymać schavanaj kamieraj

Adnym ź ludziej, jakija vypadkova sutyknulisia z nastupstvami hetaj industryi, staŭ 30-hadovy mužčyna z Hankonha, jakoha vydańnie nazyvaje Erykam. Jaho historyju raskazvaje Bi-Bi-Si.

Adnojčy ŭviečary ŭ 2023 hodzie Eryk, hartajučy stužku ŭ sacyjalnych sietkach, jakuju jon zvyčajna vykarystoŭvaŭ dla prahladu parnahrafii, raptam zrazumieŭ, što bačyć na ekranie samoha siabie. Na videa była para, jakaja zachodzić u hatelny numar, pakidaje rečy, a paźniej zajmajecca seksam.

Eryk paznaŭ siabie i svaju dziaŭčynu: za try tydni da hetaha jany praviali noč u hateli ŭ Šeńčženi, nie padazrajučy, što ŭ numary staić schavanaja kamiera. Ich intymnyja momanty byli tajemna zapisanyja i vykładzienyja dla prahladu tysiačam nieznajomych ludziej

— u tym liku na tym samym kanale špijonskaj parnahrafii, jakim Eryk sam karystaŭsia raniej. Takim čynam, sa spažyŭca hetaj industryi mužčyna staŭ jaje achviaraj.

Jak adznačaje Bi-Bi-Si, havorka idzie pra źjavu značna šyrejšuju za adnu asabistuju historyju.

Tak zvanaja špijonskaja parnahrafija (spy-cam porn) isnuje ŭ Kitai jak minimum dziesiać hadoŭ, niahledziačy na toje, što vytvorčaść i raspaŭsiudžańnie parnahrafii ŭ krainie zabaronienyja. Adnak apošnija hady prablema nabyła novy maštab i pamiery.

Žurnalisty adznačajuć, što asabliva vostra heta ŭsprymajecca žančynami: u internecie jany abmieńvajucca paradami, jak vyjavić schavanyja kamiery, jakija ciapier mohuć być zusim małyja, dyjamietram jak ałovak. Niekatoryja iduć na krajnija miery: voziać z saboj pałatki i staviać ich prosta ŭ hatelnych numarach, kab nie trapić u pole zroku kamier.

U krasaviku sioleta ŭłady Kitaja ŭviali novyja praviły, jakija abaviazvajuć uładalnikaŭ hatelaŭ rehularna praviarać numary na najaŭnaść schavanych kamier. Adnak rasśledavańnie Bi-Bi-Si pakazvaje, što hetyja miery nie spynili nielehalnaj industryi.

Jak pracuje industryja spy-cam porn

Industryja špijonskaj parnahrafii pabudavanaja jak kamiercyjnaja sietka, u miežach jakoj praz pasrednikaŭ pradajecca dostup da žyvych pakazaŭ i archivaŭ videa.

Jak piša BBC, adnym z najbolš prykmietnych pasrednikaŭ, na jakoha ŭdałosia vyjści padčas rasśledavańnia, byŭ ahient pad psieŭdanimam «AKA». Žurnalist BBC, vydajučy siabie za zvyčajnaha klijenta, zapłaciŭ jamu za dostup da adnaho z sajtaŭ z anłajn-pakazami. Štomiesiačnaja padpiska kaštavała 450 juaniaŭ (65 dalaraŭ).

Paśla ŭvachodu na płatformu, adznačaje vydańnie, karystalnik moh vybirać pamiž niekalkimi videastrymami, kožny ź jakich achoplivaŭ adrazu niekalki hatelnych numaroŭ. Vyjava źjaŭlałasia, jak tolki hości aktyvavali śviatło ŭ numary, ustaŭlajučy kartu-kluč. Na płatformie možna jak nazirać za ludźmi ŭ žyvym efiry, tak i pieramotvać tranślacyju nazad i spampoŭvać archiŭnyja zapisy.

Pavialičyć

Bi-Bi-Si padkreślivaje, što asnoŭnym kanałam prasoŭvańnia hetaha kantentu staŭ Telegram — mesendžar, zabaronieny ŭ Kitai, ale jaki šyroka vykarysoŭvajecca dla nielehalnaj dziejnaści. U adnym z kanałaŭ, jaki rekłamavaŭ «AKA», padčas rasśledavańnia naličvałasia kala 10 tysiač udzielnikaŭ.

Biblijateki zmantavanych klipaŭ taksama dastupnyja ŭ Telegram za fiksavanuju płatu. U archivie žurnalist naličyŭ bolš za 6000 videa, datavanych jašče 2017 hodam.

Jak piša BBC, padčas 18‑miesiačnaha rasśledavańnia žurnalisty vydańnia vyjavili šeść sajtaŭ i prykładańniaŭ, praź jakija vialisia tajemnyja zdymki ŭ hatelnych numarach. Usie jany aktyŭna prasoŭvalisia praz Telegram, a ich stvaralniki zajaŭlali, što kirujuć bolš jak 180 schavanymi kamierami.

Za siem miesiacaŭ nazirańnia za kantentam adnaho z takich sajtaŭ žurnalisty zafiksavali zdymki z 54 roznych kamier, prykładna pałova ź jakich pracavała adnačasova. Na padstavie siaredniaj zapaŭnialnaści hatelaŭ BBC aceńvaje, što za hety pieryjad źniatymi mahli być tysiačy haściej, bolšaść ź jakich pra heta navat nie zdahadvajecca.

Žurnalistam BBC atrymałasia adsačyć adnu z kamier da kankretnaha hatela ŭ horadzie Čženčžoŭ u centralnym Kitai. Daśledčyki na miescy znajšli kamieru, schavanuju ŭ vientylacyjnaj adtulinie i padklučanuju da elektrasietki budynka. Pry hetym papularnyja detektary schavanych kamier, jakija pradajucca jak srodak abarony dla haściej, nie zdoleli vyjavić pryładu.

Kali kamieru adklučyli, infarmacyja pra heta chutka razyšłasia pa Telegram. Adnak, jak adznačaje BBC, užo praź niekalki hadzin arhanizatary paviedamili pra zapusk novaj kamiery ŭ inšym hateli, prademanstravaŭšy, nakolki chutka sietka adnaŭlajecca.

Za čas rasśledavańnia BBC identyfikavała kala tuzina ahientaŭ, jak AKA. Ź ich pierapisak z padpisčykami vynikała, što jany pracujuć nie samastojna, a na ludziej, jakich nazyvajuć «uładalnikami kamier» — tych, chto arhanizuje ŭstanoŭku kamier i kiruje stryminhavymi płatformami.

Prybytki navat asobnych ahientaŭ značna pieravyšajuć siaredni hadavy dachod u Kitai. Zhodna z acenkami Bi-Bi-Si, zasnavanymi na kolkaści ŭdzielnikaŭ kanałaŭ i abanienckaj płacie, tolki AKA zarabiŭ jak minimum 22 000 dalaraŭ z krasavika minułaha hoda. Dla paraŭnańnia: pavodle źviestak Statystyčnaha biuro Kitaja, siaredni hadavy dachod u krainie ŭ minułym hodzie skłaŭ 6200 dalaraŭ.

Jak adznačaje vydańnie, u Kitai isnujuć strohija praviły prodažu i vykarystańnia špijonskich kamier, ale žurnalisty vyjavili, što kupić takuju kamieru davoli prosta na najbujniejšym rynku elektroniki ŭ rajonie Chuacianbej horada Šeńčžeń.

Pravaabaroncy z arhanizacyi RainLily adznačajuć, što vydalić taki kantent amal niemahčyma. Telegram ihnaruje zapyty na vydaleńnie, a administratary hrup nie majuć matyvacyi prybirać prybytkovyja videa.

Na aficyjnyja zvaroty Bi-Bi-Si Telegram adkazaŭ standartnaj frazaj, što zabaraniaje parnahrafičny kantent, stvorany biez zhody ŭdzielnikaŭ, i maderuje kantent, adnak na praktycy paśla rasśledavańnia źnikli tolki akaŭnty ahientaŭ, u toj čas jak sajty z tranślacyjami praciahnuli svaju pracu.

U vyniku, niahledziačy na farmalnyja zabarony i novyja praviły, industryja sačeńnia za ludźmi ŭ hatelach praciahvaje isnavać jak ustojlivaja i prybytkovaja sistema, a jaje achviarami zastajucca ludzi, jakija navat nie viedajuć, što ich pryvatnaść była raskrytaja. Što tyčycca Eryka i jaho dziaŭčyny, to ciapier jany žyvuć z pastajannym adčuvańniem strachu i niedavieru. Maładyja ludzi paźbiahajuć hatelaŭ i navat na vulicy nosiać kapielušy, bajučysia być paznanymi pa videa, jakoje nazaŭsiody zastałosia ŭ internecie.

• 0
• 0
• 2
• 1
• 1
• 1
• 5
• 0