Navukoŭcy znajšli pach, jaki prymušaje ludziej bolš tracić u sekand-chendach

Psichołahi z Univiersiteta imia Radboda ŭ Niejmiehienie (Niderłandy) zacikavilisia, ci možna źmianić pavodziny pakupnikoŭ u sekand-chendach z dapamohaj pachu. Vyniki daśledavańnia apublikavanyja ŭ časopisie Evolution and Human Behavior.

Ekśpierymient praviali ŭ sapraŭdnaj kramie

U daśledavańni ŭdzielničali 257 pakupnikoŭ sekand-chendu ŭ niderłandskim Arniemie. Na praciahu šaści tydniaŭ daśledčyki čarhavali dni z pacham śviežaj bializny, pacham cytrusaŭ i zvyčajnym pacham kramy. Dyfuzary stajali nieprykmietna dla naviedvalnikaŭ.

Vynik pakazaŭ, što prosta pryjemnaha pachu niedastatkova. Cytrusavy vodar nie paŭpłyvaŭ na toje, kolki hrošaj pakupniki pakidali ŭ kramie. A voś kali ŭ sekand-chendzie pachła śviežaj bializnaj, ludzi tracili bolš.

Paśla pakupki ŭdzielniki taksama zapaŭniali ankietu, jakaja dazvalała acanić, nakolki mocna jany bajacca zabrudžvańnia i mahčymych krynic infiekcyi. Akazałasia, što pach śviežaj bializny asabliva mocna ŭpłyvaŭ na pakupki ludziej, u jakich hetaja aściaroha była vyšejšaj.

Čamu mienavita pach śviežaj bializny

Hety vynik padkazaŭ daśledčykam mahčymaje tłumačeńnie. Na ich dumku, sprava moža być u evalucyjna sfarmavanaj schilnaści čałavieka paźbiahać patencyjnych krynic infiekcyi.

Jak heta pracuje, dobra vidać na prykładzie ježy. Čałaviek, chutčej za ŭsio, nie stanie jeści pradukt, na jakim źjaviłasia ćvil abo jaki niepryjemna pachnie. Psichołahi miarkujuć, što padobnaja naściarožanaść moža ŭpłyvać i na staŭleńnie da rečaŭ, jakimi raniej karystalisia inšyja ludzi.

Pach śviežaj bializny asacyjujecca z čyścinioj i tamu moža źmianšać adčuvańnie, što patrymanaje adzieńnie zabrudžanaje. Toje, što zvyčajny pryjemny pach cytrusaŭ nie pavialičyŭ vydatki pakupnikoŭ, taksama havoryć na karyść takoha tłumačeńnia.

Pach paŭpłyvaŭ i na ŭsprymańnie adzieńnia

Kab lepš zrazumieć hety efiekt, daśledčyki praviali jašče adzin ekśpierymient, užo ŭ łabaratoryi. Jaho ŭdzielniki aceńvali patrymanaje adzieńnie.

Kali ludzi adčuvali pach śviežaj bializny, rečy zdavalisia bolš pryvabnymi i darahimi, a aściaroha nakont mahčymaj prysutnaści bakteryj, hrybkoŭ ci inšych patahienaŭ źmianšałasia.

Daśledčyki bačać u hetym i praktyčnaje značeńnie. Adnoj ź pieraškod dla kupli patrymanaha adzieńnia moža być nie tolki jaho vyhlad, košt ci jakaść. Važna i toje, nakolki čystaj zdajecca reč. Pryčym adčuvańnie čyścini moža padśviadoma ŭpłyvać na vybar, navat kali čałaviek nie zadumvajecca pra mahčymaść zaražeńnia i nie adčuvaje ahidy abo strachu.

Prostyja sihnały čyścini, naprykład pach śviežaj bializny abo achajny vyhlad samoj kramy, mohuć zrabić patrymanyja rečy bolš pryvabnymi dla pakupnikoŭ. U vyniku adzieńnie moža daŭžej zastavacca va ŭžytku, a patreba kuplać novaje źnižajecca.

• 2
• 0
• 0
• 0
• 0
• 0
• 0
• 0