ZŠA zaprasili prezidenta Rasii Uładzimira Pucina na samit «Vialikaj dvaccatki» (G20), jaki projdzie 14—15 śniežnia ŭ Majami. Pra heta paviedamiŭ dziaržsakratar ZŠA Marka Rubia. Pavodle jaho słoŭ, samit moža stać mahčymaściu dla Pucina pahutaryć nie tolki z prezidentam ZŠA Donaldam Trampam, ale i ź inšymi suśvietnymi lidarami.
Pucin nie naviedvaŭ samity G20 z 2019 hoda. Napiaredadni Tramp vykazaŭ sumnieŭ, što rasijski prezident pryjedzie ŭ Majami, adnak dapuściŭ mahčymaść jašče adnoj asabistaj sustrečy ź im. Rubia paviedamiŭ, što takaja sustreča pakul nie abmiarkoŭvałasia.
Apošni raz Pucin i Tramp sustrakalisia na samicie ŭ Ankorydžy na Alascy ŭ žniŭni 2025 hoda. Hałoŭnaj temaj toj sustrečy było zaviaršeńnie vajny va Ukrainie.
Tym časam krynicy ahienctva Bloomberg, blizkija da Kramla, śćviardžali, što Pucin, vierahodna, prapuścić samit G20 u ZŠA. Pavodle ich, zamiest hetaha jon płanuje naviedać samit Azijacka-Cichaakijanskaha ekanamičnaha supracoŭnictva (ACES) u Kitai, jaki projdzie 18—19 listapada pad staršynstvam kiraŭnika KNR Si Czińpina.
Bloomberg adznačaŭ, što Pucin imkniecca paźbiahać šmatbakovych mižnarodnych forumaŭ, dzie jamu daviałosia b sustrakacca ź jeŭrapiejskimi sajuźnikami Ukrainy, a taksama lidarami Kanady, Japonii, Paŭdniovaj Karei i Aŭstralii. Akramia taho, u Kramli aścierahajucca mahčymaj prysutnaści na samicie G20 prezidenta Ukrainy Uładzimira Zialenskaha. Raniej Zialenski prapanoŭvaŭ Pucinu pravieści padčas samitu dvuchbakovuju sustreču, pryśviečanuju zaviaršeńniu vajny.
U pačatku vosieni pamočnik prezidenta Rasii Juryj Ušakoŭ paviedamlaŭ, što Pucin i Si Dzińpin abmiarkoŭvali mahčymaść trochbakovaj sustrečy z Trampam padčas samitu ACES. Adnak jaje praviadzieńnie budzie zaležać ad taho, ci pajedzie amierykanski prezident u Kitaj.
23 vieraśnia pres-sakratar Kramla Dźmitryj Piaskoŭ zajaviŭ, što Pucin hatovy da novaj asabistaj sustrečy z Trampam. Pry hetym jon pryznaŭ, što kankretnych damoŭlenaściaŭ nakont takoj sustrečy pakul niama. Sam Tramp jašče ŭ pačatku vieraśnia kazaŭ, što hatovy znoŭ sustrecca z Pucinym, ale chacieŭ by, kab heta adbyłosia paśla dasiahnieńnia pahadnieńnia pa Ukrainie.
Ciapier čytajuć
Vinakurniu Lubanskaha ŭ Minsku zakryŭ sakretny hmach, dzie zaprajektavanyja kabiniety dla dopytaŭ i pamiaškańnie dla spalvańnia dakumientaŭ9
Vinakurniu Lubanskaha ŭ Minsku zakryŭ sakretny hmach, dzie zaprajektavanyja kabiniety dla dopytaŭ i pamiaškańnie dla spalvańnia dakumientaŭ
Biełarus-vachtavik na Jamale stvaraje pieśni na biełaruskaj movie z dapamohaj ŠI. «Raniej muzyka była zakrytym kłubam. Niejrasietki adčynili hetyja dźviery z nahi»1919
Kamientary