Va Ukrainie mabilizavali chasida, jaki pryjechaŭ ź Izraila va Umań na śviatkavańnie jaŭrejskaha Novaha hoda
Va Ukrainie zatrymali 49‑hadovaha chasida, jaki viartaŭsia ŭ Izrail paśla śviatkavańnia iŭdziejskaha Novaha hoda Roš cha-Šana va Umani. Izrailskaje vydańnie The Jerusalem Post paviedamiła, što mužčynu nibyta mabilizavali va ŭkrainskaje vojska. Adnak Dziaržaŭnaja pamiežnaja słužba Ukrainy zajaviła, što havorka idzie nie pra hramadzianina Izraila, a pra čałavieka, jaki maje taksama ŭkrainskaje hramadzianstva, piša Ukrainskaja słužba Bi-bi-si.
Pa słovach pamiežnikaŭ, padčas pravierki dakumientaŭ vyśvietliłasia, što mužčyna, jaki pakazaŭ izrailski pašpart, źjaŭlajecca taksama hramadzianinam Ukrainy. Akramia taho, u vajskovych ulikovych bazach była infarmacyja pra toje, što jon znachodzicca ŭ vyšuku. Tamu pamiežniki pieradali jaho Nacyjanalnaj palicyi dla dalejšaj pravierki.
Pamiežnaja słužba padkreśliła, što zamiežnikaŭ pry pierasiačeńni ŭkrainskaj miažy nie praviarajuć na pradmiet znachodžańnia na vajskovym uliku. Akramia taho, pamiežniki sami nie pravodziać mabilizacyju niepasredna ŭ punktach propusku.
Pavodle paviedamleńnia The Jerusalem Post, mužčynu zavuć Džonatan Karlinski Mašak. Jon naradziŭsia va Ukrainie, kala 14 hadoŭ tamu pierajechaŭ u Izrail i ciapier žyvie ŭ Ijerusalimie. Paviedamlajecca, što jon vychoŭvaje šaściarych dziaciej. Jahony siabar, jaki jechaŭ ź im u adnym aŭtobusie, raskazaŭ, što Mašak mieŭ izrailski pašpart, dzie miescam naradžeńnia byŭ paznačany Saviecki Sajuz.
Pa słovach siabra, pamiežniki źviarnuli ŭvahu na toje, što mužčyna razmaŭlaŭ pa-ŭkrainsku, paśla čaho vyrašyli pravieryć jahonyja danyja. Jaho źniali z aŭtobusa, jaki naležaŭ kampanii Derech Tzadikim. Paśla hetaha rodnyja i znajomyja doŭhi čas nie mahli ź im źviazacca.
Paźniej Mašak zmoh adpravić elektronny list, u jakim raskazaŭ pra toje, što ź im adbyłosia. Jon taksama dvojčy sprabavaŭ patelefanavać žoncy, ale kali jana pieratelefanavała, pačuła tolki aŭtamatyčnaje paviedamleńnie na ŭkrainskaj movie.
Siabar Mašaka Natan śćviardžaŭ, što mužčynu nibyta dastavili ŭ Adesu dla pryzyvu va ŭkrainskaje vojska. The Jerusalem Post taksama paviedamiła, što mužčynu mahli mabilizavać, adnak ukrainskija pamiežniki aficyjna paćvierdzili tolki fakt jaho zatrymańnia i pieradačy palicyi. Nacyjanalnaja palicyja i Ministerstva abarony Ukrainy na momant publikacyi materyjału jašče nie dali Ukrainskaj słužbie Bi-bi-si padrabiaznych tłumačeńniaŭ.
Ukrainskija ŭłady raniej tłumačyli, što padčas vajennaha stanovišča mabilizacyi padlahajuć mužčyny va ŭzroście ad 25 da 60 hadoŭ, u tym liku hramadzianie Ukrainy, jakija majuć pašparty inšych dziaržaŭ. Pry hetym baćka troch niepaŭnaletnich dziaciej pavodle zakanadaŭstva maje prava na adterminoŭku ad mabilizacyi.
U materyjale taksama adznačajecca, što ŭžo byli vypadki, kali hramadzianie Ukrainy, jakija doŭhi čas žyli za miažoj, pryjazdžali ŭ krainu, a pry sprobie vyjechać nazad sutykalisia z prablemami na miažy i paśla mahli być mabilizavanyja.
Štohod tysiačy chasidaŭ pryjazdžajuć va Umań na Roš cha-Šana, kab pamalicca kala mahiły rabina Nachmana z Bracłava — zasnavalnika bracłaŭskaha chasidyzmu. Paśla pačatku poŭnamaštabnaj vajny ŭkrainskija i izrailskija ŭłady nieadnarazova zaklikali pałomnikaŭ ustrymlivacca ad pajezdak va Ukrainu, ale jany da takich zaściaroh zvyčajna nie prysłuchoŭvajucca.
«Svaju nabožnaść jany prajaŭlajuć šumna i viesieła». Chto takija chasidy i što im treba va Ukrainie?
Što viadoma pra straty Rasii va Ukrainie na kaniec žniŭnia?
Ukraincy, jakija vajavali za Rasiju i byli ŭziatyja ŭ pałon, raskazali, čamu praciahvajuć jaje lubić
Błohiera Zołkina, jaki braŭ skandalnaje intervju ŭ Babaryki, mabilizavali
U Estonii aryštavany Aleh Maisiejeŭ, kažuć jaho znajomyja. Heta były kiroŭca Cichanoŭskaj, jaki z časam staŭ jaje zaciatym krytykam23
Kamientary
Nazvaŭsia hrybam - leź u koš.
A toje niekatoryja dumajuć, što druhi pašpart patrebny tolki dla aptymizacyi padatkaŭ i kab čerhi na miažy nie stajać.