Danija papiaredziła, što ŭ najbližejšyja miesiacy Rasija moža atakavać adnu z krain NATA
Słužba vajskovaj raźviedki i biaśpieki Danii (DDIS) zajaviła, što ŭ najbližejšyja miesiacy Rasija moža pravieści abmiežavanuju vajennuju apieracyju suprać adnoj z krain NATA. Pry hetym dackaja raźviedka aceńvaje vierahodnaść takoha scenaru jak nizkuju, ale takuju, što raście, piša The Moscow Times.
Kiraŭnik DDIS Tomas Arenkjel dapuściŭ, što Rasija moža pierakinuć nievialikuju kolkaść vajskoŭcaŭ, u tym liku biez apaznavalnych znakaŭ, na terytoryju susiedniaj ź joj krainy NATA. U jakaści mahčymaha abhruntavańnia jon nazvaŭ nieabchodnaść «abarony miascovych ruskich mienšaściaŭ».
Inšym varyjantam moža stać vykarystańnie dalnabojnaj zbroi suprać infrastruktury, jakaja vykarystoŭvajecca dla padtrymki Ukrainy. Pavodle kiraŭnika raźviedki, takija dziejańni mahli b być nakiravanyja na raskoł Paŭnočnaatłantyčnaha aljansu.
U toj ža čas poŭnamaštabnaje ŭvarvańnie Rasii ŭ krainu NATA dackaja raźviedka ličyć vielmi małavierahodnym. Pavodle jaje acenki, dla padrychtoŭki takoj apieracyi Kramlu spatrebiłasia b kala šaści miesiacaŭ dla naroščvańnia vajskovaj hrupoŭki.
Danija taksama papiaredžvaje pra ŭzmacnieńnie rasijskich hibrydnych apieracyj suprać jeŭrapiejskich krain. Siarod mahčymych dziejańniaŭ nazyvajucca razburalnyja kibierataki, zdolnyja vyvieści sa stroju važnyja dla hramadstva sistemy, a taksama dyviersii, jakija mohuć pryvieści da čałaviečych achviar.
Ministr abarony Danii Jepe Brus zajaviŭ, što Rasija ciapier sutykajecca z bolšym ciskam, čym u luby momant z pačatku vajny ŭ lutym 2022 hoda, ale nie dasiahaje svaich metaŭ i tamu, pavodle jaho słoŭ, atakuje krainy, jakija padtrymlivajuć Ukrainu. Pry hetym dackija ŭłady ličać, što ŭ najbližejšyja šeść miesiacaŭ Rasija nie zmoža damahčysia značnaha praryvu na froncie.
Raniej zachodnija śpiecsłužby nieadnarazova zajaŭlali, što praź niekalki hadoŭ Rasija moža pieraklučyć uvahu na krainy NATA. Aściarohi sajuźnikaŭ uzmacnilisia paśla sieryi atak na jeŭrapiejskuju infrastrukturu, jakija, adnak, nie dasiahali ŭzroŭniu, nieabchodnaha dla prymianieńnia artykuła 5 Paŭnočnaatłantyčnaj damovy ab kalektyŭnaj abaronie.
Pavodle acenki dackaj raźviedki, Rasii pa-raniejšamu spatrebicca kala dvuch hadoŭ dla stvareńnia realnaj pahrozy rehijanalnaj vajny, i kala piaci hadoŭ — dla pačatku maštabnaj vajny ŭ Jeŭropie.
Papiaredžańni pra mahčymuju sprobu Rasii pravieryć hatoŭnaść NATA da adkazu raniej taksama rabili śpiecsłužby Čechii, Šviecyi, Łatvii i Polščy. Kiraŭnik češskaj Słužby biaśpieki i infarmacyi Michał Koŭdełka kazaŭ, što havorka moža iści pra abmiežavanaje ŭvarvańnie, pravakacyi pad čužym ściaham abo maštabnuju kampaniju ŭpłyvu, jakaja moža adbycca ŭžo ŭ najbližejšyja miesiacy.
Kamientary