Ułady Vieniesueły paabiacali vyzvalić usich palitźniavolenych na nastupnym tydni
Ułady Vieniesueły paabiacali na praciahu nastupnaha tydnia vyzvalić usich źniavolenych pa palityčnych matyvach. Pra heta zajaviŭ staršynia Nacyjanalnaj asamblei krainy Chorchie Radryhies paśla sustrečy sa svajakami viaźniaŭ, paviedamlaje Euronews.
Śpikier miascovaha parłamienta zapeŭniŭ, što vyzvaleńnie adbudziecca adrazu paśla kančatkovaha zaćviardžeńnia zakona ab amnistyi, jaki prasoŭvajecca vykanaŭčaj uładaj i padtrymlivajecca jak apazicyjaj, tak i Złučanymi Štatami Amieryki.
Pavodle słoŭ Radryhiesa, praces pačniecca pamiž aŭtorkam i piatnicaj nastupnaha tydnia. Jon adznačyŭ, što paśla ŭstupleńnia zakona ŭ siłu ŭsie palitźniavolenyja buduć na voli, adnak kankretnych detalaŭ miechanizma vyzvaleńnia nie ahučyŭ. Zajava była zroblena kala budynkaŭ Nacyjanalnaj palicyi ŭ Karakasie, viadomych jak Zona 7.
Sustreča adbyłasia na nastupny dzień paśla taho, jak parłamient uchvaliŭ zakonaprajekt ab amnistyi ŭ pieršym čytańni. Dakumient byŭ uniesieny časovaj prezidentkaj Vieniesueły Dełsi Radryhies i praduhledžvaje masavaje vyzvaleńnie apazicyjnych lidaraŭ, prafsajuznych dziejačaŭ, žurnalistaŭ, studentaŭ i hramadskich aktyvistaŭ, asudžanych abo zatrymanych z palityčnych pryčyn.
Kab zakon ustupiŭ u siłu, jon pavinien być razhledžany i pryniaty ŭ druhim čytańni na adnoj z čarhovych siesij parłamienta, zapłanavanych na nastupny tydzień. Paśla hetaha dakumient pieradaduć na podpis kiraŭniku dziaržavy i apublikujuć aficyjna.
Zakonaprajekt źjaviŭsia praź niekalki tydniaŭ paśla vajennaj apieracyi ZŠA, u vyniku jakoj były prezident Nikałas Madura byŭ zatrymany i dastaŭleny ŭ Ńju-Jork dla sudovaha razhladu pa abvinavačańni ŭ narkateraryźmie.
Dełsi Radryhies zajaviła, što meta amnistyi — «zalačyć rany», naniesienyja šmathadovym palityčnym supraćstajańniem, jakoje pačałosia z prychodam da ŭłady čavizmu ŭ 1999 hodzie pry Uha Čaviesie i praciahvałasia padčas kiravańnia Madura. Zakon raspaŭsiudžvajecca na padziei pieryjadu z 1999 pa 2026 hod, ale nie tyčycca ciažkich złačynstvaŭ, takich jak zabojstvy, niezakonny abarot narkotykaŭ i surjoznyja parušeńni pravoŭ čałavieka.
Amnistyja doŭhi čas zastavałasia adnym z hałoŭnych patrabavańniaŭ vieniesuelskaj apazicyi i pravaabarončych arhanizacyj. Paśla adchileńnia Madura ad ułady hetaja ideja taksama atrymała vyraznuju padtrymku z boku Złučanych Štataŭ.
U Vieniesuele budzie nie prosta vyzvaleńnie palitviaźniaŭ, a amnistyja, pryčym za ŭsie hady. A miascovuju «amierykanku» pieratvorać u hramadskuju prastoru
Što ciapier z ekanomikaj Vieniesueły? I ci stała bolš svabody?
Dełsi Radryhies zaklikała palitykaŭ Vieniesueły da dyjałohu dla pieraadoleńnia kryzisu
U Vieniesuele vyzvaleny jašče kala 80 palityčnych źniavolenych. Hetaha patrabavali ZŠA
Tramp pryznaŭsia, što Madura zachapili pry dapamozie sakretnaha dyskambabulatara
Ciapier čytajuć
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal7
Kamientary