U Vieniesuele budzie nie prosta vyzvaleńnie palitviaźniaŭ, a amnistyja, pryčym za ŭsie hady. A miascovuju «amierykanku» pieratvorać u hramadskuju prastoru
Ułady krainy abviaścili pra płany maštabnaj amnistyi dla sotniaŭ palitźniavolenych časoŭ kiravańnia Uha Čaviesa i Nikałasa Madura.
Jak paviedamlaje Le Monde, vykanaŭca abaviazkaŭ prezidenta Vieniesueły Delsi Radryhies padčas svajho vystupu ŭ Viarchoŭnym sudzie 30 studzienia anansavała zakryćcio sumnaviadomaj turmy «El-Chielikoide» — vieniesuelskaha anałaha minskaj «amierykanki».
Hety abjekt, jaki pavodle pieršapačatkovaj zadumy mieŭ być futurystyčnym handlovym centram, za režymam Madura pieratvaryŭsia ŭ śledčy izalatar śpiecsłužbaŭ. Tam na praciahu mnohich hadoŭ utrymlivali palityčnych apanientaŭ ułady.
Ciapier kiraŭnictva krainy abiacaje viarnuć budynku jaho mirnaje pryznačeńnie. Zhodna z płanami ŭrada, «El-Chielikoide» pieratvorycca ŭ šmatfunkcyjanalnuju hramadskuju prastoru: tam źjavicca spartyŭny, kulturny i kamiercyjny centr, adkryty jak dla miascovych žycharoŭ, tak i dla siemjaŭ supracoŭnikaŭ palicyi.
Vystupajučy ŭ Viarchoŭnym sudzie, Delsi Radryhies pradstaviła zakonaprajekt ab usieahulnaj amnistyi. Jana pavinna achapić uvieś pieryjad palityčnaha hvałtu ŭ krainie — z momantu prychodu da ŭłady Uha Čaviesa ŭ 1999 hodzie i da siońniašnich dzion.
«Hety zakon pasłužyć tamu, kab zahaić rany, pakinutyja palityčnym supraćstajańniem, jakoje raspalvałasia hvałtam i ekstremizmam. Jon dazvolić nam viarnuć pravasudździe ŭ našaj krainie na pravilny šlach», — cytuje vydańnie słovy Radryhies.
Akramia abviaščeńnia amnistyi, vykanaŭca abaviazkaŭ prezidenta anansavała maštabnyja nacyjanalnyja kansultacyi pa stvareńni novaj sudovaj sistemy Vieniesueły.
U svaju čarhu, lidarka apazicyi i łaŭreatka Nobieleŭskaj premii miru Maryja Karyna Mačada padkreśliła, što niadaŭnija kroki režymu — heta nie žest dobraj voli, a vynik rašučaha cisku z boku ŭrada Złučanych Štataŭ. Tym nie mienš, jana vykazała nadzieju, što sotni źniavolenych narešcie zmohuć viarnucca da svaich rodnych.
Razam z tym źviestki pra kolkaść vyzvalenych asob pakul zastajucca supiarečlivyja. Kali aficyjnyja ŭłady zajaŭlajuć pra vyzvaleńnie ad 600 da 800 čałaviek, to pravaabarončaja arhanizacyja Foro Penal paviedamlaje pra značna bolš ścipłyja ličby — mienš za 300—400 čałaviek sa śpisaŭ palitviaźniaŭ.
Pavodle infarmacyi pravaabaroncaŭ, za kratami ŭsio jašče mohuć zastavacca sotni aktyvistaŭ i žurnalistaŭ. U toj ža čas pytańnie z zamiežnikami ŭžo vyrašanaje: Vašynhton paćvierdziŭ vyzvaleńnie ŭsich amierykanskich hramadzian, jakija ŭtrymlivalisia ŭ vieniesuelskich turmach.
Staruju kamianicu kala ratušy ŭ Mahilovie rychtavali dla haradskoha muzieja. Ciapier tam robiać ofis rasijskaha pasolstva na čale z byłym ministram «ŁNR»1414
Kamientary