Homielski biznesoviec-łukašyst, jaki vajuje za Stalina, napisaŭ danos sam na siabie
Vital Drabyšeŭski sam dasłaŭ čynoŭnikam razdrukoŭki skrynšotaŭ niezaležnych ŚMI, za jakija možna trapić na sutki.
Aktyvist «Patryjotaŭ Biełarusi» Vital Drabyšeŭski niadaŭna straciŭ svaju zabiahałaŭku. Pra hetu historyju «Naša Niva» raspaviadała: čynoŭniki nie padoŭžyli jamu arendu, a jašče raniej źniščyli vialiki płakat sa Stalinym, jaki visieŭ u kafe.
Drabyšeŭski zasypaŭ skarhami ŭsie instancyi i navat zapisaŭ videazvarot da Łukašenki, ale ničoha nie dapamahło. A zaraz usio vyhladaje tak, što praŭładny aktyvist uvohule moža atrymać palityčnuju administratyŭku. Pryčym faktyčna jon sam na siabie napisaŭ danos.
Volha Bondarava, jakaja aktyŭna padtrymlivaje Drabyšeŭskaha ŭ sacyjalnych sietkach, apublikavała adkaz na adzin sa zvarotaŭ Drabyšeŭskaha da čynoŭnikaŭ.
Pra što išła havorka ŭ samoj skarzie, nie zusim zrazumieła — miarkujučy pa ŭsim, jon paskardziŭsia na paškodžańnie taho samaha płakata sa Stalinym. Ale Homielskaja pryrodaachova pieradała zvarot Drabyšeŭskaha ŭ milicyju.
Akazałasia, stalinist bieź cieni sumnievu prymacavaŭ da skarhi razdrukoŭki skrynšotaŭ z sajtaŭ «Lusterka» i «Fłahštok», navat nie abrezaŭšy adrasny radok i łahatypy. Hetyja niezaležnyja ŚMI ŭłady ličać «ekstremisckimi». Za reposty biełarusaŭ aktyŭna sadziać na sutki.
Možna tolki ŭjavić, jak ździvilisia siłaviki ŭ AUS Centralnaha rajona Homiela, kali im pryjšoŭ aficyjny zvarot z takimi razdrukoŭkami. I jany adrazu ž paleźli ŭ sacyjalnyja sietki Drabyšeŭskaha.
A tam znajšlisia padpiski na inšyja «ekstremisckija» staronki: «Maja kraina Biełaruś», «Małanka» i «By soul» (vidać, milicyjaniery mieli na ŭvazie BySol). U vyniku inśpiektar paprasiŭ AUS pravieści pravierku i, kali što, pakarać praŭładnaha aktyvista za reposty i padpiski.
Drabyšeŭski prydumaŭ takoje apraŭdańnie: jon padpisaŭsia na «ekstremistaŭ» «z metaj vyvučeńnia dziejnaści i pieradačy infarmacyi ŭ centr ch». Ale zvyčajna takija apraŭdańni dla prostych prychilnikaŭ Łukašenki nie pracujuć. Heta na svaim dośviedzie niadaŭna adčuła i Bondarava.
U Homieli zakryli zabiahałaŭku pradprymalnika-łukašysta i źniščyli jaho płakat sa Stalinym
Volhu Bondaravu pasadzili na 13 sutak
«Advažna vyjšli na pieradavuju»: jak «Patryjoty Biełarusi» vučać školnikaŭ lubić krainu
Homielskaha kamunista zatrymali za padpisku na «ekstremisckija» resursy — ciapier jon jeździć pa kałhasnych palach
Kamientary
Daj im volu, oni rašistov s Biełaruś budut zvať.