Ukrainca pakarali ŭmoŭnym terminam za pieradaču Biełarusi prahramy dla vajskovaha avijacyjnaha trenažora
Hramadzianina Ukrainy asudzili za niezakonnuju pieradaču Biełarusi prahramnaha zabieśpiačeńnia dla vajskovaha trenažora «KTS-21M», jaki vykarystoŭvajecca dla padrychtoŭki piłotaŭ źniščalnikaŭ MiH-29. Mužčyna pryznaŭ vinu i zaklučyŭ pahadnieńnie sa śledstvam, piša «Radyjo Svaboda».
Sud pryznačyŭ abvinavačanamu dva hady pazbaŭleńnia voli, ale vyzvaliŭ ad adbyvańnia pakarańnia z dvuchhadovym vyprabavalnym terminam. U hety pieryjad jon budzie znachodzicca pad nahladam orhanaŭ prabacyi. Taksama asudžanamu zabaranili vyjazdžać za miežy Ukrainy bieź śpiecyjalnaha dazvołu.
Pavodle materyjałaŭ spravy, pieradača technałohij adbyłasia nie paźniej za červień 2025 hoda praz adzin ź miesiendžaraŭ. Za heta ŭkrainiec atrymaŭ 1000 dalaraŭ.
U spravie fihuravali niekalki hramadzian Ukrainy. Adzin ź ich, jak śćviardžajuć śledčyja, pracuje ŭ Biełarusi ŭ ZAT «Hrupa vytvorčych technałohij i avijacyjnaha mašynabudavańnia «Aeramaš» u Mačuliščach pad Minskam. Pradpryjemstva zajmajecca raspracoŭkaj, vytvorčaściu, ramontam i madernizacyjaj avijacyjnaj techniki, a taksama stvaraje trenažory i prahramy dla padrychtoŭki lotnaha i inžyniernaha składu.
Na trenažorach «KTS-21M» rychtujuć piłotaŭ vajskovych samalotaŭ MiH-29. Asudžany raniej pracavaŭ kanstruktaram modulnych elektronnych avijacyjnych trenažoraŭ dla vajskovych viertalotaŭ Mi-8 i Mi-24, źniščalnikaŭ MiH-29 i transpartnych samalotaŭ Ił-76. Pieradadzienyja technałohii jon atrymaŭ praz svajho byłoha kalehu ź Instytuta aŭtamatyzavanych sistem Akademii navuk Ukrainy.
Sprava była źviazanaja z abychodam sankcyj i parušeńniem pravił mižnarodnaj pieradačy tavaraŭ i pasłuh padvojnaha pryznačeńnia.
«Z rasijan-naviednikaŭ pracentaŭ 70 akazvalisia vatnikami». Eks-hid z muzieja VAV, jakoha zatrymlivali jaho ž ekskursanty, ciapier papularny ŭ Varšavie — pahutaryli ź im14
Kamientary