Ananimnaści ŭ siecivie bolš niama: ŠI znachodzić realnych ludziej za chviliny
Štučny intelekt ciapier moža raskryvać asoby ludziej, jakija chavajucca pad psieŭdanimami ŭ internecie, za ličanyja chviliny i ŭsiaho za niekalki dalaraŭ, piša Devby.io.
Da takoj vysnovy pryjšli daśledčyki sa Šviejcarskaj vyšejšaj techničnaj škoły Ciurycha i Anthropic. Navukoŭcy pakazali, što sučasnyja ŠI-madeli zdolnyja aŭtamatyčna supastaŭlać ananimnyja profili z realnymi ludźmi, vykarystoŭvajučy tolki teksty paviedamleńniaŭ biez strukturavanych źviestak, nakštałt tablic abo rejtynhaŭ.
Kali raniej dla takich rasśledavańniaŭ patrabavalisia hadziny ručnoj pracy, to ciapier ŠI robić heta ŭ całkam aŭtamatyčnym režymie.
U adnym z ekśpierymientaŭ daśledčyki ŭziali 338 karystalnikaŭ partała Hacker News, jakija raniej sami davali spasyłki na svaje profili ŭ LinkedIn. Z apisańniaŭ vydalili imiony i pramyja spasyłki. Paśla hetaha ŠI-ahientu dali tolki biezasabovyja teksty publikacyj i daručyli znajści realnuju asobu ŭładalnika akaŭnta. Madel pravilna supastaviła 226 profilaŭ z 338 pry dakładnaści kala 90%. Inšymi słovami, pieravažnaja bolšaść sprob vyjavić profil była pravilnaj.
Sistema pracuje paetapna: moŭnaja madel analizuje paviedamleńni i zdabyvaje ź ich prykmiety — prafiesiju, miesca žycharstva, intaresy i inšyja detali. Na asnovie hetych źviestak farmujecca profil, jaki aŭtamatyčna supastaŭlajecca z mahčymymi kandydatami ŭ adkrytych krynicach. Zatym madel praviaraje najbolš vierahodnyja supadzieńni i aceńvaje ŭzrovień upeŭnienaści ŭ vyniku.
Asobna daśledčyki pravieryli mietad na publičnych intervju vučonych ab vykarystańni ŠI ŭ ich pracy. Niahledziačy na častkovuju redakturu tekstaŭ, ahient zmoh vyznačyć asoby jak minimum 9 z 33 udzielnikaŭ z vysokaj dakładnaściu.
Daśledčyki źviartajuć uvahu, što prablema nie ŭ tym, što ŠI «razumniejšy» za čałavieka-rasśledčyka. Madel vykarystoŭvaje tyja ž uskosnyja prykmiety: zhadki pra ŭniviersitet, prajekt, horad, chobi. Roźnica ŭ chutkaści i canie, bo toje, što raniej patrabavała značnych namahańniaŭ i tamu vykarystoŭvałasia redka, ciapier možna maštabavać.
Aŭtary papiaredžvajuć, što heta źmianiaje bazavyja ŭjaŭleńni pra ananimnaść u internecie. Ź ich słoŭ, «praktyčnaja schavanaść», na jakuju raźličvali karystalniki — pierakanańnie, što ich tearetyčna možna raskryć, ale nichto nie stanie hetym zajmacca — bolš nie pracuje. Mahčymyja nastupstvy prymianieńnia takoha instrumienta, pakazvajuć daśledčyki, nadzvyčaj šyrokija: ad pieraśledu aktyvistaŭ i žurnalistaŭ da masavaha tarhietavanaha machlarstva.
Ciapier čytajuć
«Viedajecie, Łukašenka nie prezident». Jany tak uśmichnulisia, kiŭnuli». Departavany z Hruzii Leŭ Michiejeŭ raskazaŭ, jak ź im abychodzilisia ŭ Armienii33
Kamientary