Viktar Babaryka ŭ Brusieli prezientavaŭ partyju «Razam» i raskazaŭ pra try važnyja kirunki jaje pracy

4 sakavika Viktar Babaryka pradstaviŭ svaju partyju «Razam» i vystupiŭ z pramovaj na Mižpartyjnym forumie «8+100», jaki adbyvajecca ŭ Jeŭraparłamiencie, paviedamlaje «Biełsat».

Na forumie prysutničali pradstaŭniki dzieviaci biełaruskich demakratyčnych partyj, jakija byli likvidavanyja paśla padziejaŭ 2020 hoda.

U svaim vystupleńni, zroblenym pa-anhlijsku, Viktar Babaryka źviarnuŭsia da prysutnych na forumie i adznačyŭ, što chacieŭ by skazać šmat dobrych słovaŭ pra ich pracu ciaham doŭhich šaści hadoŭ. Bo, na jahonuju dumku, biełarusam było ciažka «zastavacca na paradku dnia jeŭrapiejskaj palityki i być častkaj jeŭrapiejskaj siamji», asabliva tady, kali možna było pačuć pra toje, što «vy — suahresary, z krainy, jakaja pačała vajnu suprać svabody».

«Ale ja dumaju, što režym — heta nie [prostyja] ludzi. Biełarusy nie padtrymlivajuć hety režym. I kali ja byŭ u turmie, šmat ludziej, palityčnych i nie tolki palityčnych źniavolenych, kazali, što jany nie padtrymlivajuć hetuju vajnu», — zaŭvažyŭ Babaryka.

Jon skazaŭ, što zaraz sa svajoj partyjaj «Razam» dumaje, što možna zrabić, kab palepšyć hetuju situacyju, i nazvaŭ try asnoŭnyja kirunki pracy, na jakich varta skancentravać svaje namahańni. 

«U mianie było šmat sustreč ź ludźmi ŭ Varšavie, u Vilni, u Bierlinie. I my razumiejem, što my pavinny praciahvać našu pracu ŭ niekalkich kirunkach. Pieršy: my pavinny pracavać, kab vyzvalić usich źniavolenych. Usie zhodnyja z hetym. Druhi: my pavinny spynić płan stvareńnia źniavolenych, palitźniavolenych. Treci, vielmi, vielmi składany: jak prymusić jeŭrapiejskija partyi, jeŭrapiejskija ŭrady pavieryć, što biełarusy… što biełaruski narod — heta nie režym. I taksama, što Biełaruś — heta adna z častak biaśpieki Jeŭropy», — skazaŭ Viktar Babaryka.

Jon zaŭvažyŭ, što zaraz važna ŭkłaści ŭ hałovy jeŭrapiejskich palitykaŭ i kiraŭnikoŭ uradaŭ, što Biełaruś pavinna być častkaj Jeŭropy, bo heta «nie tolki naša svaboda, heta biaśpieka Jeŭropy». Bo 40 hadoŭ tamu ŭ Biełarusi zdaryłasia čarnobylskaja katastrofa, a zaraz adbyłasia inšaja, «hramadzianskaja katastrofa», i Biełaruś i Ukraina — častka hetaj katastrofy.

«I tamu ja dumaju, što dla nas vielmi važna stvaryć novuju suviaź pamiž Ukrainaj i Biełaruśsiu… My pavinny razarvać pryviazku Biełarusi da Rasiei. I absalutna ŭpeŭnieny, što my možam heta zrabić. I my sprabujem zrabić usio nieabchodnaje, kab heta adbyłosia», — skazaŭ Viktar Babaryka, skončyŭšy svaju pramovu słovami «Žyvie Biełaruś!».

Paźniej, padčas dyskusii, Babaryka jašče raz udakładniŭ svaju dumku pra nieabchodnaść vybudoŭvańnia sistemy biaśpieki jeŭrapiejskaha kantynientu, pry jakim Biełaruś nie budzie pryviazanaja da Rasiei. 

«Heta klučavy momant. Biez taho, kab Biełaruś stała «nie rasiejskaj», ja pierakanany, biaśpieki Jeŭropy nie budzie. I ŭ pieršuju čarhu heta budzie tyčycca mienavita situacyi ŭ tym liku i Ukrainy», — skazaŭ Viktar Babaryka. 

• 36
• 7
• 7
• 2
• 0
• 1
• 0
• 0